විධායක ජනාධිපති ක‍්‍රමය අහෝසි කිරීම සදහා පාර්ලිමේන්තුවේ සභාගත කර ඇති 20 වන සංශෝධන කෙටුම්පත,  මාර්තු 5 වැනිදායින් පසුව ආණ්ඩුවේ සහයෝගය නොලබන පෞද්ගලික මන්ත‍්‍රී යෝජනාවක් ලෙස පාර්ලිමේන්තුවේ න්‍යායපත‍්‍රයට ඇතුළත් කරනු ඇතැයි වාර්තා වෙයි.

එම කෙටුම්පතට සහාය දක්වනවාද නැද්ද යන්න පිළිබඳව කැබිනට් මණ්ඩලයේ නිරීක්ෂණ ඉදිරිපත් කළ යුතුව තිබුණද, කැබිනට් මණ්ඩලය විසින් ඒ පිළිබඳව නිරීක්ෂණ ඉදිරිපත් කිරීමට සැලසුම් කර නැතැයි අනිද්දා සමග අදහස් දැක්වූ එක්සත් ජාතික පක්ෂයේ ප‍්‍රබලයෙකු පැවසීය.

මේ පිළිබඳව අදහස් දක්වමින් ජනතා විමුක්ති පෙරමුණේ පාර්ලිමේන්තු මන්ත‍්‍රී විජිත හේරත් මහතා ප‍්‍රකාශ කළේ ආණ්ඩු පක්ෂය විසින් මාර්තු 5 වැනිදාට පෙර මෙම කෙටුම්පතට පක්ෂ බව ප‍්‍රකාශ කළහොත් 20 වන සංශෝධන කෙටුම්පත ආණ්ඩුවේ යෝජනාවක් ලෙස ඉදිරියට ගෙන යා හැකි බවයි. ආණ්ඩුව කෙටුම්පතට විරුද්ධ බව ප‍්‍රකාශ කළහොත් එය තමන්ගේ පෞද්ගලික මන්ත‍්‍රී යෝජනාවක් ලෙස පාර්ලිමේන්තු න්‍යායපත‍්‍රයට ඇතුළත් කළ හැකි බව ඔහු පැවසීය. ආණ්ඩුව මාර්තු 05 දක්වා කිසිදු නිරීක්ෂණයක් ඉදිරිපත් නොකළහොත්, එවිටද එය තමන්ගේ පෞද්ගලික මන්ත‍්‍රී යෝජනාවක් ලෙස පාර්ලිමේන්තුවේ න්‍යායපත‍්‍රයට ඇතුළත් කළ හැකි බව ඔහු වැඩිදුරටත් කීය.

කෙසේ වෙතත් ආණ්ඩුව විසින් මෙම කෙටුම්පතට සහාය දක්වන බව ප‍්‍රකාශ කළහොත් එය සංකේතාත්මකව වැදගත් වන බවත්, ආණ්ඩු පක්ෂය සහයෝගය නොදක්වන පසුබිමක මෙවැනි කෙටුම්පතක් සම්මත කරගැනීම අසීරු බවත් ඔහු පෙන්වාදුන්නේය.

අනුරංග ජයසිංහ