හිටපු පාර්ලිමේන්තු මන්ත්‍රී ඉඳුනිල් තුෂාර අමරසේන – සමඟි ජන බලවේගය

ඔබ ජීවත්වන ප්‍රදේශයෙන් කොවිඩ්-19 රෝගීන් වාර්තා වුණාද?

කුරුණෑගල ප්‍රදේශයේ  කොවිඞ් ආසාදිත රෝගීන් 25කට ආසන්න ප්‍රමාණයක් වාර්තා වුණා. රෝගී වූ අය නාවික හමුදාවේ කොවිඞ් ආසාදනය වූ අය සමඟ සමීප සම්බන්ධතාවක් තිබුණු අය. අපේ වාසනාවකට කොවිඩ්-19 ආසාදනය වු නාවික සෙබළුන් සහ ඔවුන් පදිංචි වී සිටි ගම් නිරෝධායනය කිරීම නිසා කුරුණෑගල දිස්ත්‍රික්කය යම් කිසි මට්ටමකට කොවිඩ් 19 පැතිරීමෙන් බේරගන්න හැකි වුණා.

ඇඳිරි නීතිය සමයේ ජනජීවිතය ගැන අදහස මොකක්ද?

ගමක් වසා දමන්න ලේසියෙන් පුළුවන්. ගමක් වහලා දැමීමෙන් අනතුරුව ඒ ගමේ ජීවත් වන ජනතාවගේ එදිනෙදා අවශ්‍යතා, එදිනෙදා ජීවනෝපායන් කඩා වැටෙනවා. ඒ අසරණ වුණ ජනතාවට ජීවත් වෙන්න මේ වගේ අවස්ථාවක රජය මැදිහත් විය යුතුයි. කුරුණෑගල ප්‍රදේශයේ හිටපු දානපතියන් සහ අසල්වැසියන්ගේ පිහිටෙන් බොහෝ ජනතාව ජීවත් වුණේ. ආණ්ඩුවේ දේශපාලනඥයන් ගමට ඇවිත් තමන්ගේ ෆෙස්බුක් එකට පින්තූරයක් දාන්න ජනතාවට සුළු බඩු මල්ලක් බෙදලා ගියා. නමුත් ජනතාව සුරක්ෂිත කරන්න නිසි රාජ්‍ය යාන්ත්‍රණයක්  කිසිම කෙනෙක් ක්‍රියාත්මක කරනවා අපි දැක්කේ නැහැ. කුරුණෑගල ජනතාවට ලබා දීලා තිබුණු එක සහනයක් තමයි සමුපකාරයට ගිහින් ණයට බඩු ගන්නට ලැබුණු සහනය. ඒ ක්‍රියාවලිය හොඳයි. එහෙත් එයින් පවා අන්තිමේදී සිදුවුණේ අසරණ වෙලා හිටපු ජනතාව ණයකාරයෝ කරපු එක පමණයි. ආණ්ඩුවට තිබුණා, ජනතාව  අසරණ කරන්නේ නැතිව සහනයක් සලසන ක්‍රියාවලියක් හදන්න.

දැන් කුරුණෑගල ප්‍රදේශයේ සමාජයෙහි සිටින, රෝගය ඇතැයි සැක සහිත පුද්ගලයන් පීසීආර් පරික්ෂාවට ලක් කරනවාද?

මේ  වෙනකොට පීසීආර් පරික්ෂණ කරන්නේ නැහැ. විශේෂයෙන්ම අපි දැක්කා පොල්ගහවෙල පදිංචි වෙලා හිටපු නාවික හමුදා සෙබලෙකුගේ අසල්වාසීන් නිරෝධායනය කිරීම සදහා ගෙන්වලා තිබුණේ කුඩා බස් රථයක්. ඒ බස් රථයෙන් මිනිස්සුන්ව කොට්ට පොල් ගාණට පටවගෙන යන්න තමයි ඇවිත් තිබුණේ. ඉන්පස්සේ ගමේ අය විරෝධය පළ කළා. ඒ බස් රථයෙන් යෑම ප්‍රතික්ෂේප කළා. ඒකේ ගියොත් සමාජ දූරස්ථකරණය රකින්නත් බෑ. ගම්වාසීන් දවසක්ම ගෙවල්වලට වෙලා වෙනත් බස් රථයක් පැමිණ ඔවුන්ව රැගෙන යනතුරු හිටියා. මේ වගේ අඩුපාඩු  අපි විශාල වශයෙන් දැක්කා පසුගිය කාලය පුරාවටම.

රුපියල් 5000 දීමනාව ලබාදීමේ ක්‍රියාවලිය ගැන ඔබේ අත්දැකීම මොකක්ද?

සම්පූර්ණයෙන්ම රුපියල් 5000 දීමනාව  ගෙවිය යුතුව තිබුණේ ආදායම් මාර්ගයක් නැති අයට. නමුත් අපි දැක්කා ප්‍රාදේශීය දේශපාලනඥයන්  එම දීමනාව දෙන තැන්වලට ගිහින් ඒ දීමනාව දෙන ඒක බාල දේශපාලනීයකරණයක් කරපු බව. දේශපාලනඥයාගේ රුචි අරුචිකම් මැද සමහර දීමනා වළක්වනු ලැබුවා.  කොන්දේසි  විරහිතව තමන්ගේ කණ්ඩායම්වලට දේශපාලනඥයාගේ වුවමනාව මත  මුදල් ලබාදෙන්න සිදු වුණා. හරි පිළිකුල් සහගත විදියට ඒ දීමනාව දේශපාලනඥයන් මෙහෙයවූවා.

අටවැනි පාර්ලිමේන්තුව මැරුණු පාර්ලිමේන්තුවක් ලෙස ආණ්ඩුව කියනවා නේද?

මේ පාර්ලිමේන්තුව මැරුණ පාර්ලිමේන්තුවක් හැටියට හැඳින්වීම සම්පූර්ණයෙන්ම වැරදියි. ඔක්තෝබර් මාසය වන තෙක් මේ පාර්ලිමේන්තුවේ නිල කාලය වලංගුයි. ඉතිං එතකොට කොහොමද  මේක අවලංගු පාර්ලිමේන්තුවක් කියන්නේ.  වලංගු පාර්ලිමේන්තුවක් තමයි බලෙන් අකල් විසුරුවාහැරීමට ලක් කළේ. ලංකාවේ මිනිස්සුම තමයි අවුරුදු පහක් සඳහා මේ පාර්ලිමේන්තුවට ජීවය දුන්නේ. කොරෝනා  වසංගතය ආවාට පස්සේ තමයි පාර්ලිමේන්තුව විසිරුවා හැරියේ. රෝගීන් විසි නවයක් හම්බවෙලා තිබෙද්දී තමයි මේ පාර්ලිමේන්තුව විසිරුවා හැරියේ. රට අර්බුදයක තියෙද්දි මේ ආකාරයට පාර්ලිමේන්තුව විසුරුවා හැරීම බරපතළ කාරණයක්. අපිට විශ්‍රාම වැටුප ලබා ගන්න හෝ වරප්‍රසාද ගන්න වුවමනා නිසා පාර්ලිමේන්තුව රැස් කරන්න කියලා අපි කියන්නේ නැහැ. අපිට ඒ කිසිවක් වුවමනා නැහැ. අපි කියන්නේ පාර්ලිමේන්තුව රැස් කරලා මේ අර්බුදයට අපි සාමූහිකව විසඳුමක් ලබා ගත යුතු බව. රජයට අතපසු වෙන දේවල් අපි පෙන්වා දීලා සහයෝගයෙන් මේ වසංගතයට මුහුණ දිය යුතු නිසයි අපි කියන්නේ පාර්ලිමේන්තුව කැඳවන්න කියලා.

පසුගිය සතියේ රාජිත සේනාරත්න මහත්මයාව නිදහස් කරන්න කියා කළුතරදී උද්ඝෝෂණයක් සිදු කළා. එය ප්‍රසිද්ධියේ නිරෝධායන නීතිය කැඩීමක් නේද?

සාමාන්‍යයෙන් පිරිසක් විරෝධතාවක් පළකරන්නේම යම් ප්‍රශ්නයක් ගැන පෙන්වාදීමේ අරමුණෙන් යම් නීති රීති උල්ලංඝනය කරමින් තමයි. රාජිත සේනාරත්න මැතිතුමාට ආදරය කරන කණ්ඩායමක් මේ විරෝධතාවලට සහභාගි වුණා. රාජිත සේනාරත්න මහත්මයා මේ රටේ සෞඛ්‍ය ක්ෂේත්‍රයට විශාල සේවයක් කරපු පුද්ගලයෙක්. ඒ වගේම ඔහු බරපතළ හදවත් ශල්‍යකර්මකට ලක් කරපු පුද්ගලයෙක්. මේ කොරෝනා අර්බුදය  තිබෙද්දී ඔහු අත්අඩංගුවට ගෙන සමූහ වශයෙන් සිටින සැකකරුවන් අතර ඔහුව සිරකිරීම කියන්නේ ආණ්ඩුව  ඉතා සූක්ෂ්මව සිදු කළ වැරැද්දක්. ඒ නිසා ඒ වැරුද්ද නිවැරදි කරන්න මේ විදියට ජනතාව එකතු වෙලා  ඉල්ලුවා. එකතුවීමෙන් අපි වැරැද්දක් කළා. අපි ඒක පිළිගන්නවා. නමුත් ඒ වැරැද්දට වඩා විශාල වැරැද්දක් නිවැරදි කරන්නැයි ඉල්ලන්න තමයි අපි ඒ විදියට රැස් වුණේ.

සෞඛ්‍යාරක්ෂිත ඇඳුම් ඉල්ලලා ඉදිරිපෙළ සෞඛ්‍ය සේවකයන් ගෙනයන සටන ගැන අදහස මොකක්ද?

කොරෝනා  මර්දන ව්‍යාපෘතිය වෙනුවෙන්  විශාල මෙහෙයක් කරන සෞඛ්‍ය කාර්ය මණ්ඩලවලට සහ ආරක්ෂ අංශවල නිලධාරීන්ට  අපි අමතර දීමනාවක් ගෙවන්න ඕනෑ. විශාල අවදානමක් මැද තමන්ගේ සේවා කාල වැඩි ප්‍රමාණයක් ඔවුන් අපි වෙනුවෙන් වැඩ කරනවා. ඒ නිසා ඔවුන්ට කරන උපහාරයක් විදියට අපි ඔවුන්ට අමතර  මුදලකුත් ලබා දිය යුතුයි කොන්දේසි විරහිතව. අද වෙනකොට ඒ නිලධාරීන්ට කිසිම මුදලක් ලබා දෙන්නේ නැහැ. අපිට ආරංචි වෙනවා රුපියල් 5000 දීමනාව ලබා දුන් සමෘද්ධි නිලධාරීන්ට ඒ වෙනුවෙන් අමතර දීමනාවක් ගෙවලා තියෙනවා තියලා. ඒ විදියට අමතර දීමනා දෙන ඒක කිසි වැරුද්දක් නැහැ. නමුත් සෞඛ්‍ය ක්ෂේත්‍රයේ නිලධාරීන් ගැනත් අපි මීට වඩා සැලකිලිමත් විය යුතුයි.

ආණ්ඩුව ගන්නා වැරදි ක්‍රියා සම්බන්ධයෙන් විපක්ෂයේ විවේචන ශක්තිමත් මදි කියලා චෝදනා එල්ලවෙනවා නේද?

මේ වෙනකොට විපක්ෂය සහ සහ සියලුම ආණ්ඩුවට එරෙහි මතවාද මර්දනය කරලා තිබෙනවා.  පාර්ලිමේන්තුව වහලා දාලා. බොහෝ මාධ්‍ය ආණ්ඩුවේ කිසිම වැරැද්දක් පෙන්වන්නේ නැහැ. ඔවුන් කරන්නේ ආණ්ඩුවට කොන්දේසි විරහිතව කඩේ යෑම. ආණ්ඩුවට විරුද්ධව විපක්ෂය  කතා කරන කිසිම දෙයක් හෝ ආණ්ඩුව විවේචනය කරන දේවල් ඒ මාධ්‍යවල පෙන්වන්නේ නැහැ. නමුත් විපක්ෂයට  මේ දේවල් ජනතාවට ගෙන යන්න විරෝධතා දක්වන්න  රැස් වෙන්න බැහැ. මේ වෙනකොට විපක්ෂය ගැට ගහලා අන්ත ඒකාධිපති විදියට ආණ්ඩුව ක්‍රියා කරන්නේ.

පාර්ලිමේන්තුවක් අනවශ්‍ය බවට ඇති මතය ඔබේ ප්‍රදේශයේ ජනතාව පිළිගන්නවාද?

ඔව්, මේ වෙනකොට එවැනි මතවාදයක් ගොඩනගමින් යනවා. එහෙම කතාකරන මිනිස්සුන් තමන්ගේ  ප්‍රජාතන්ත්‍රවාදය නැති කරගන්න තමයි මේ පාර කපා ගන්නේ කියලා තේරුම් යනකොට පරක්කු වැඩි වේවි. පසුගිය කාලේ අපි මිනිස්සුන්ට ප්‍රජාතන්ත්‍රවාදී සමාජයක් ගොඩනැඟුවා. ඔවුන් මේ විධියට ඒකාධිපති පාලනයක් ඉල්ලලා තමන් විසින් තමන්ගේ අත් දෙක ගැට ගසා ගන්න උත්සයක යෙදීම ගැන අපි කනගාටුවෙනවා. යම් කෙනෙක්ට දැන් පාර්ලිමේන්තුවේ ඉන්න මහජන නියෝජිතයන් පිළිබඳව අප්‍රසාදයක් තියෙනවා නම් ඔවුන්ට අවස්ථාවක් ලැබිලා තියෙනවා මේ නුදුරේදීම අලුත් මහජන නියෝජිතයින් පිරිසක් පත් කරගන්න. වහල් මානසිකත්වයෙන් ඉන්න අය ප්‍රජාතන්ත්‍රවාදයේ වැදගත්කමත් තේරුම් ගන්න ඕනෑ.