ආණ්ඩුව මේ වන විට දියත් කරන  ප්‍රජාතන්ත්‍ර විරෝධී ක්‍රියාවලට එරෙහිව කටයුතු කිරීමට උතුරේ දෙමළ දේශපාලන පක්ෂ එකතු වී සාකච්ඡාවක් කළ බව  ප්ලොට් පක්ෂයේ නායක ධර්මලිංගම් සිද්ධාර්ථන් අනිද්දාට පැවසීය.

මෙම සාකච්ඡාව ඉලංගයි තමිල් අරසු කච්චි නායක මාවයි සේනාධිරාජා මහතාගේ  ප්‍රධානත්වයෙන් සැප්තැම්බර් 15 වන දින යාපනය, තරුණ කලාකරුවන්ගේ  මණ්ඩපයේ පවත්වා ඇත.

උතුරේ  වර්තමාන දේශපාලන  වාතාවරණය සහ තිලීපන් සැමරුම සම්බන්ධයෙන් ඇති වුණු උණුසුම්කාරී වාතාවරණය පිළිබඳ එම සාකච්ඡාවේදී විශේෂ අවධානයක් යොමු වූ බවත් සැප්තැම්බර් 20 වන දින යළිත් හමුවී සාකච්ඡාවක් සිදු කිරීමට නියමිත බවත් සිද්ධාර්ථන් මහතා පැවසීය.

මෙම සාකච්ඡාවට දෙමළ ජාතික ජනතා පෙරමුණේ නායක ගජේන්ද්‍රකුමාර් පොන්නම්බලම්, තමිල් මක්කල් තේසිය කුට්ටනී පක්ෂයේ නායක සී.වී. විග්නේශ්වරන්, පාර්ලිමේන්තු මන්ත්‍රි ශ්‍රීධරන්, හිටපු පාර්ලිමේන්තු මන්ත්‍රී පී. සරවනපවන්, උතුරු පළාත් සභාවේ හිටපු  සභාපති සී.වී.කේ. සිවඥානම්, යාපනය නගර සභාවේ උපසභාපති තුරයිරාජා ඊසන්, උතුරු පළාත් සභාවේ හිටපු මන්ත්‍රීවරුන් වන පී. කජීපන්, වී කනගරත්නම් සහ ප්‍රජාතන්ත්‍රවාදී සටන්කාමීන්ගේ පක්ෂයේ නායන සී. වෙන්දන් සහ යාපනයේ සිවිල් සමාජ ක්‍රියාකාරීන් පිරිසක් සහභාගි වී ඇත.■