රජයට අයත් ලිට්රෝ ගෑස් සමාගම ගෑස් මිල වැඩිකිරීම සඳහා අවසර ලබාදී නැති තත්වය තුළ රුපියල් 1395කට ප්‍රීමියම් හයිබි්‍රඩ් නැමැති අලුත් ගෑස් සිලින්ඩරයක් හඳුන්වා දෙමින් පවතින ගෑස් මිල අබිබවා පාරිභෝගිකයන් ගසා කෑමක නිරතව සිටින බව වාර්තාවේ. අලුතින් හඳුන්වා දී ඇති මෙම ගෑස් සිලින්ඩරයේ බර ප්‍රමාණය ලීටර් 18ක් වශයෙන් සඳහන් කර ඇති අතර එහි බර කිලෝග්‍රෑම්වලින් දක්වා නැත. එහෙත් ලිට්රෝ ගෑස් සමාගමේ ගෑස් පිරවීමේ පර්යන්තවල අපගේ ආරංචි මාර්ග ප්‍රකාශ කරන්නේ මේ අලුත් ගෑස් සිලින්ඩරය සඳහා පුරවනු ලබන්නේ කිලෝ 9.7ක ප්‍රමාණයක් බවයි. කිලෝ ග්‍රෑම් 12.5 ගෘහස්ථ ගෑස් සිලින්ඩරයක වත්මන් මිල රුපියල් 1495ක් වන අතර ඒ අනුව ගෑස් කිලෝවක මිල රුපියල් 119.60ක් වශයෙන් ගණනය වේ. එම ගණනයන් අනුව මෙම අලුත් ගෑස් සිලින්ඩරයේ මිල විය යුත්තේ රුපියල් 1160කි. එම අලුත් සිලින්ඩරයට අය කරන මිල සමඟ සැසැදීමේඳී රුපියල් 235ක මිල ගසා කෑමක් පාරිභෝගිකයන් රවටා ලිට්රෝ ගෑස් සමාගම සිදුකරන බව හඳුනාගත හැකිය. මෙම නව ගෑස් සිලින්ඩරය දැනට පවතින කිලෝ 12.5 ගෑස් සිලින්ඩරයටම ගෑස් පුරවමින් අලුත් නම පින්තාරු කර වෙළඳපොළට නිකුත් කෙරේ. ඒ සඳහා ප්‍රචාරය දෙමින් එම සමාගම සඳහන් කරන්නේ පවුලකට මාසයක් සඳහා සරිලන ගෑස් ප්‍රමාණයක් අතේ ඇති මුදලට මෙම සිලින්ඩරය මගින් ලබාදෙන බවය.  ලිට්රෝ ගෑස් සමාගම දළ වශයෙන් දිනකට කිලෝ 12.5 ගෑස් සිලින්ඩර 80,000ක් වෙළඳපොළට නිකුත් කරන අතර එය මාසයක කාලයක් සඳහා ලක්ෂ 24ක පමණ පාරිභෝගික සංඛ්‍යාවකි. එම සමාගමේ වැඩිම නිෂ්පාදනය ඇති ගෑස් සිලින්ඩරයද මෙය වේ.මේ සම්බන්ධයෙන් විමසීම සඳහා එහි ප්‍රධාන කාර්යාලයෙන් ලබාදුන් දූරකථන අංකයක් අනුව එහි කළමනාකරුවකු වන කේතීස්වරන් මහතාට අප ඇමතූ අතර ඔහුගේ පිළිතුර වූයේ ඔවුන්ගේ ප්‍රචාරණ කටයුතු සිදුකරන සමාගම මගින් නිකුත් කරන නිවේදන මගින් හැර පිළිතුරු ලබාදීම් නොකරන බවයි. පිළිතුරක් අවශ්‍ය නම් ඔවුන්ගේ පාරිභෝගික සේවා අංකයට ෆැක්ස් හෝ ඊමේල් දැනුම්දීමක් කරන ලෙසයි.ඉන්පසු කේතීස්වරන් මහතා නැවත කතාකර විනුරි මහත්මිය අමතන ලෙස දැනුම් දුන් අතර අපගේ ප්‍රශ්න ඇයට යොමු කිරීමේදී ලැබුණ පිළිතුර වූයේ නව ගෑස් සිලින්ඩරයට අදාළ මාධ්‍ය නිවේදනය අදාළ කර ගන්නා ලෙසයි.■