එළැඹෙන ජනාධිපතිවරණයේදී එජාප පාර්ශ්වයේ ජනාධිපති අපේක්ෂකත්වය අමාත්‍ය සජිත් ප්‍රේමදාස වෙත රනිල් වික්‍රමසිංහ අග්‍රාමාත්‍යවරයා නොදෙන්නේ නම් අපේක්ෂකත්වය බලහත්කාරයෙන් හෝ ලබා ගන්නා ආකාරය පිළිබඳව සජිත් පාර්ශ්වයේ මන්ත්‍රී කණ්ඩායම සාකච්ඡා පවත්වා ඇත.

කොළඹ බාන්ස් පෙදෙසේ රාජ්‍ය අමාත්‍ය සුජීව සේනසිංහගේ සොහොයුරියකගේ නිවසේ පසුගිය 20වැනි දින රාත්‍රියේ මෙම සාකච්ඡාව පවත්වා ඇත. එහිදී රනිල් වික්‍රමසිංහගේ කල්මැරීමේ ප්‍රතිපත්තිය පිළිබඳව මෙන්ම එයට ප්‍රතිචාර දක්වා සැප්තැම්බර් 2වෙනි දාට ප්‍රථම අපේක්ෂකත්වය ලබා ගන්නා ආකාරය පිළිබඳව ද දීර්ඝව සාකච්ඡා කර ඇත.

ඒ අනුව සිරිකොත ඉදිරිපිට උපවාසයක්, අරලියගහ මන්දිරය පක්ෂිකයන් ලවා වැටලීම ආදි කරුණු ගණනාවක් පිළිබඳව එහිදී සාකච්ඡා වී ඇත. එහිදී මන්ත්‍රීවරුන් බොහෝ දෙනෙක් ප්‍රකාශ කර ඇත්තේ ගෝඨාභය රාජපක්ෂ සහ අනුර කුමාර දිසානායක ජනාධිපති අපේක්ෂකයන් ලෙස ඉදිරිපත් වී තිබෙන පසුබිමක තම පාර්ශ්වයෙන් ඉදිරිපත්වන්නේ කවුරුන්දැයි ඉක්මනින් ජනතාවට ප්‍රකාශ කළ යුතු බවය. මෙම සාකච්ඡාවේදී රනිල් වික්‍රමසිංහ අගමැති අපේක්ෂකයා ලෙස ඉදිරිපත් කරන්නට සජිත් පාර්ශ්වයේ බහුතරය කැමැත්ත පළ කර ඇත.

මෙම සාකච්ඡාවට සජිත් ප්‍රේමදාස, මංගල සමරවීර, තලතා අතුකෝරල, මලික් සමරවික්‍රම ඇතුළු එජාප මන්ත්‍රීවරුන් 50දෙනෙකු පමණ සහභාගිවී ඇත. පිරිස අතර ජේසී අලවතුවල, ලක්ෂ්මන් විජේමාන්න වැනි රනිල් හිතවාදී මන්ත්‍රීවරුන්ද සිට ඇත.■

කාශ්‍යප උඩවත්ත