මැණික් ව්‍යාපාරික කටයුතු සඳහා අප‍්‍රිකානු රටවලට ගොස් සිටින 700කට ආසන්න ශ‍්‍රී ලාංකිකයන් පිරිසක් නැවත රටට ගෙන්වාගැනීම සඳහා රාජ්‍ය බලධාරීන්ගේ අවසරය ලැබී නැතැයි වාර්තා වේ.

මැණික් ව්‍යාපාරික කටයුතු සඳහා ගොස් සිටින පිරිස මැඩගස්කරයේ 550ක්, ටැන්සානියාවේ 42ක්, මොසැම්බික් 50ක්, කෙන්යාවේ 25ක් ආදි වශයෙන් සිටින බව ශ‍්‍රී ලංකා මැණික් වෙළඳුන්ගේ සංගමය (අප‍්‍රිකා) සඳහන් කරයි.

මේ සම්බන්ධයෙන් එම සංගමයේ ලේකම් ලෆිර් ජමීල් මහතාගෙන් කරන ලද විමසීමකදී පැවසුවේ මෙම මැණික් ව්‍යාපාරික පිරිස රටට ගෙන්වාගැනීමට අවශ්‍ය ගුවන් ගමන් වියදම් ඇතුළු සියලූ වියදම් දැරීමට සූදානම් බව සිය සංගමය විදේශ කටයුතු අමාත්‍යාංශය ඇතුළු බලධාරීන්ට දැනුම් දුන්නද තවමත් ඒ සඳහා අවසර ලැබී නැති බවයි.

එමෙන්ම මැණික් ව්‍යාපාරිකයන් රැඳී සිටින රටවල තානාපති කාර්යාලද දැනුවත් කර ඇති බව පවසන ජමීල් මහතා අප‍්‍රිකානු කලාපය තුළ කොවිඞ්-19 පිළිබඳ දැඩි අවදානම් තත්වයක් පවතින බවත්, විදේශිකයන් එම වෛරසය බෝකරන බවට එම රටවල ජනයා නොරිස්සුම් ස්වභාවයෙන් කටයුතු කරන බවත් පවසයි. සිරවී සිටින ශ‍්‍රී ලාංකිකයන්ට සෞඛ්‍ය පහසුකම් ලබාගැනීමේ ගැටලූවක් පවතින බවද ඔහු පෙන්වාදෙයි.x