කේ. සංජීව

එළැඹෙන ජනපතිවරණයේදී විපක්ෂ අපේක්ෂකයා ලෙස ගෝඨාභය රාජපක්ෂ මහතා හෝ වෙනත් අපේක්ෂකයෙකු ඉදිරිපත් කිරීම පිළිබඳව ඒකාබද්ධ විපක්ෂයේ සිටින ශ‍්‍රී ලංකා නිදහස් පක්ෂ පාර්ලිමේන්තු මන්ත‍්‍රීවරුන් සහ ශ‍්‍රී ලංකා නිදහස් පක්ෂය නියෝජනය කරමින් සිට පසුගියදා විපක්ෂයේ අසුන් ගත් දහසය දෙනාගේ කණ්ඩායමේ මත ගැටුම් වර්ධනය වී ඇතැයි වාර්තා වෙයි.
ශ‍්‍රී ලංකා නිදහස් පක්ෂයේ දහසය දෙනාගේ කණ්ඩායමේ සාමාජිකයෙකු අප සමඟ අදහස් දක්වමින් ප‍්‍රකාශ කළේ එම කණ්ඩායමේ ඉහළින්ම සිටින ජෝන් සෙනෙවිරත්න, එස්බී දිසානායක, සුසිල් පේ‍්‍රම්ජයන්ත වැනි බහුතර කණ්ඩායමක් ගෝඨාභය රාජපක්ෂ අපේක්ෂකයා විය යුතු බවට හඩ නගන බවයි. ඒ අතරින් ඩිලාන් පෙරේරා, දයාසිරි ජයසේකර, තිලංග සුමතිපාල වැනි අය ගෝඨාභය රාජපක්ෂ ඒ සඳහා සුදුස්සා නොවන බවට ද මත ප‍්‍රකාශ කරන බවට ඔහු පැවසීය. ඔහු වැඩිදුරටත් පැවසුවේ ගෝඨාභය රාජපක්ෂට විරුද්ධව අවාසියකට තිබෙන්නේ ජාතිවාදී ලේබලය පමණක් බවය. එය ඔහු කෙරෙන් ඉවත් කර ඔහුට සුළුජන ප‍්‍රසාදය ලබා ගැනීම සඳහා ඉදිරියේදී ගෝඨාභය රාජපක්ෂ මහතා උතුරු නැගෙනහිර සංචාරය කරනු ඇති බවත් ඔහු ප‍්‍රකාශ කළේය.
ඒකාබද්ධ විපක්ෂයේ ශ‍්‍රීලනිප සාමාජිකයෙකු පැවසුවේ එම කණ්ඩායමේ බැසිල් රාජපක්ෂට සමීප කණ්ඩායම ලෙස කුමාර වෙල්ගම, ප‍්‍රසන්න රණතුංග, පවිත‍්‍රා වන්නිආරච්චි, රෝහිත අබේගුණවර්ධන, ගාමිණී ලොකුගේ ඇතුළු පිරිසක් කටයුතු කරන බවත්, ඔවුන් බැසිල් රාජපක්ෂ මහතා ජනාධිපති අපේක්ෂකයා ලෙස ඉදිරිපත් කළ යුතු බවට අදහස් පළ කරන බවත්ය. පොදුජන පෙරමුණ ගොඩනඟා කෙටි කාලයක් තුළ එම පක්ෂය ජයග‍්‍රහණය කරවීමත් මහින්ද රාජපක්ෂට වඩා සමීප ප‍්‍රතිරූපයක් ඇති නායකයා වීමත් නිසා බැසිල් රාජපක්ෂ මහතා එම තනතුරට සුදුසු බව එම කණ්ඩායමේ අදහස වී ඇත. මහින්ද රාජපක්ෂ මහතාද බැසිල් රාජපක්ෂ මහතාට වැඩි කැමැත්තක් දක්වන බව ඔවුහු කියතිි.
ගෝඨාභය රාජපක්ෂ පත් කරගත යුතු බවට මහින්දානන්ද අලූ‍ත්ගමගේ ඇතුළු පිරිසක් අදහස් දක්වා ඇති අතර ඒකාබද්ධ විපක්ෂය තුළ ගෝඨාභය රාජපක්ෂ මහතාට වැඩි සහයෝගයක් ලබාදෙන්නේ උදය ගම්මන්පිල, විමල් වීරවංශ වැනි ජාතිකවාදී නායකයන් විසින් බවත් ශ‍්‍රී ලංකා නිදහස් පක්ෂ මන්ත‍්‍රීවරුන් අතර ගෝඨාභය රාජපක්ෂ මහතාට වැඩි සහයෝගයක් නැති බවත් වාර්තා වෙයි.