තම පාර්ශ්වය මෛත්‍රීපාල සිරිසේනට ඉදිරි ජනාධිපතිවරණයේදී අපේක්ෂකත්වය නොදී සිටීමට තීරණයක් ගෙන ඇතැයි හිටපු ජනාධිපති මහින්ද රාජපක්ෂ මෛත්‍රීපාල සිරිසේනට ඔහුගේ සමීපතමයෙකු මාර්ගයෙන් දන්වා ඇතැයි දැනගන්නට ලැබේ.


මහින්ද රාජපක්ෂ ප්‍රකාශ කර ඇත්තේ, 2015 ජනවාරි 08 ජයග්‍රහණයෙන් පසුව තම පවුලේ කිසිවෙකුට විරුද්ධව අධිකරණ ක්‍රියාමාර්ග ගන්නේ නැතැයි මෛත්‍රීපාල සිරිසේන ජනාධිපතිවරයා පොරොන්දු ලබා දුන්නත් ඒවා ඉටුකරන්නට ඔහු අපොහොසත් වූ බවය. පසුගිය ඔක්තෝබර් 26 අගමැති ධුරය පිරිනැමීම පිළිබඳව එහිදී ප්‍රකාශ කර ඇති මහින්ද රාජපක්ෂ, පාර්ලිමේන්තුවේ බහුතර මන්ත්‍රී සංඛ්‍යාව සාදා දෙන බවට මෛත්‍රීපාල සිරිසේන මහතා පොරොන්දු වූවත් එම පොරොන්දුවද ඔහු ඉටු නොකළ බව කියා තිබේ. අයවැය දෙවනවර කියවීමේ ඡන්ද විමසීමේදීද ආණ්ඩුව පරාජයට පත්කරන්නට සිය මන්ත්‍රීවරුන්ගේ සහාය ලබාදෙන බව ප්‍රකාශ කළත් එම පොරොන්දුවද ඔහු ඉටු නොකළ බව එහිදී මහින්ද රාජපක්ෂ ප්‍රකාශ කර ඇත. ඒ අනුව තම පාර්ශ්වය මීළඟ ජනාධිපතිවරණයේදී ඔහුට අපේක්ෂකත්වය ලබා නොදෙන බවද පවසා ඇත.


මාර්තු 14 වෙනිදා විපක්ෂ නායක කාර්යාලයේදී පොදුජන පෙරමුණ සහ ශ්‍රීලනිපය අතර සාකච්ඡාවක් පැවති අතර එහිදී වර්තමාන ජනාධිපතිවරයාට අපේක්ෂකත්වය පිරිනැමිය යුතුයැයි දයාසිරි ජයසේකර මහතා යෝජනාවක් ඉදිරිපත් කර ඇත. එයට ඍජු ප්‍රතිචාරයක් නොදක්වා ඇති පොදුජන පෙරමුණු නියෝජිතයන් ප්‍රකාශ කර ඇත්තේ ජනාධිපතිවරණයට ඉදිරිපත් වෙන අපේක්ෂකයා පොදුජන පෙරමුණ යටතේ පොහොට්ටුව ලකුණින් ඉදිරිපත් විය යුතු බවය. මෙම සාකච්ඡාවට පසුව ජනාධිපති මහින්ද රාජපක්ෂගේ නිල නිවසේදී රාජපක්ෂ සොහොයුරන් සහ නාමල් රාජපක්ෂ, ශෂීන්ද්‍ර රාජපක්ෂ හමුවී ඇත. එම හමුවෙන් පසුව මහින්ද රාජපක්ෂ ඉහත පණිවිඩය මෛත්‍රීපාල සිරිසේන මහතාට යවා ඇත. මාර්තු 14 සාකච්ඡාවෙන් පසුව නැවත මාර්තු 21 පොදුජන පෙරමුණ සහ ශ්‍රීලනිපය අතර සාකච්ඡාවක් පැවැත්වෙන අතර බොහෝවිට එම සාකච්ඡාවද එකඟතාවකින් තොරව අවසන් වෙනු ඇතැයි දැනගන්නට ලැබේ. තමන්ට අපේක්ෂකත්වය මහින්ද පාර්ශ්වය නොදෙන්නේ නම් තවදුරටත් සාකච්ඡාකර පලක් නැතැයි මෛත්‍රීපාල සිරිසේන තම නියෝජිත කණ්ඩායමට දන්වා ඇත. ■