ජනාධිපති මෛතී‍්‍රපාල සිරිසේන මහතා සමග එක්ව හිටපු ජනාධිපති මහින්ද රාජපක්‍ෂ මහතා ආණ්ඩුවක් හදන්න යෝජනාවක් තියෙනවාද?
යෝජනාවක් නෙමේ තැන්තැන්වල ඒ සම්බන්ධව යම් යම් ප‍්‍රකාශ කරලා තියනවා. ජනාධිපතිතුමාට එහෙම තීරණක් ගන්න අයිතියක් නැත්තේත් නෑ. ඒවා ලොකු ලොකු තැන්වල කෙරෙන කථා. ඒ නිසා ඒ ගැන නිල වශයෙන් යමක් කියන්න අමාරුයි.

ඒ කියන්නේ ඉදිරි ජනාධිපතිවරණ අපේක්‍ෂකයා ශී‍්‍ර ලංකා පොදු ජන පෙරමුණේ එක්කෙනෙක් වෙයිද?
නෑ. නිශ්චිත වශයෙන්ම ශී‍්‍රලනිපයේ ඉදිරි ජනාධිපති අපේක්‍ෂකයා මෛතී‍්‍රපාල සිරිසේන මහතා. ඒකේ කිසිම වෙනසක් නෑ. ඕනෑම කෙනෙකුට අපට සහාය දෙන්න පුළුවන්. එජාපයට හරි පොදුජන පෙරමුණට හරි ජවිපෙට හරි මේ ඕනෑම කෙනෙකුට. ශී‍්‍රලනිප අපේක්‍ෂකයා තමයි පොදු අපේක්‍ෂකයා වෙන්නේ.

නමුත් පොදු ජන පෙරමුණ සිටින්නේ ඔවුන්ගේ වෙනම ජනාධිපති අපේක්‍ෂකයෙක් ඉදිරිපත් කෙරෙන ස්ථාවරයක නේද?
මම කිව්වේ අපේ අපේක්‍ෂකයා මෛතී‍්‍රපාල සිරිසේන මහතා කියලා. අපිට පොදුජන පෙරමුණට යන්නත් පුළුවන්, එයාලාට මෙතැනට එන්නත් පුළුවන්. කොහොමත් අපි හිටපු තැනනේ. අනවශ්‍ය කතා මොකටද දේශපාලනයෙදී අපි බාධාවක් කරගන්නේ.

එහෙම වුණොත් යහපාලනයට මොකද වෙන්නේ. එජාපය යහපාලන ආණ්ඩුවෙන් විසිවෙනවාද?
යහපාලනය ඉදිරියට ගෙනයන්න පුළුවන් එජාපය එක්ක කියලා කතාවක් නැහැනේ. ඔවුන්ට පුළුවන් අපිට එකතුවෙන්නත්, වෙනම ජනාධිපති අපේක්‍ෂයෙකු ඉදිරිපත් කරන්නත්, ඒක එයාලාගේ දේශපාලන කැමැත්ත.

නමුත් මේ ආණ්ඩුව බලයට ආවේ වංචා දුෂණවලට හා අපරාධවලට දඬුවම් දෙන බවට පොරොන්දු වෙමින්. පොදුජන පෙරමුණේ වැඩි දෙනෙකුට දුෂණ හා අපරාධ චෝදනා තියෙනවා..
චෝදනා තිබුණාට ඒ එකක්වත් ඔප්පුවෙලා නෑ.

චෝදනා ඔප්පු වෙන්න ආණ්ඩුව ඊට අධිකරණ කි‍්‍රයාමාර්ග ගත යුතුයිනේ.
ඇයි නැත්තේ? සේරම විමර්ශන වාර්තා තොරතුරු නීතිපතිතුමාට යවලා තියෙන්නේ. එතුමා තමයි අදාළ කි‍්‍රයාමාර්ග ගන්න ඕනෑ. අපි අපේ වගකීම අවසන් කරලායි තියෙන්නේ.

ධම්මික පි‍්‍රයදර්ශන