■ මේ සේවා මුක්තිය යනු කුමක්ද? වෙන වචනවලින් කිවහොත්, ‘දණ්ඩ මුක්තිය’යි.


■ මෙවැනි මුක්තියක් තිබෙන අයට, සිතු සේ සිය රාජකාරිය මුවාවෙන් මිනි මරන්නට පිළිවන.


■ මේ සැකකරුවන් වෙනුවෙන් කළගුණ සැලකිය යුතුයැයි ගෝඨාභය විශ්වාස කරනවා වන්නටද පිළිවන.

පාස්කු ඉරිදා ප්‍රහාරය වැන්නක් නැවත ඇති නොවීම සඳහා මහින්ද රාජපක්‍ෂ මහතා ජනාධිපති ව සිටි කාලයේ හමුදාපති සහ පොලිස්පති තනතුරු දැරූ කිහිප දෙනකු විසින් සකස් කරන ලද නිර්දේශ ඇතුළත් වාර්තාවක් මැයි 3 වැනිදා ජනාධිපති මෛත්‍රීපාල සිරිසේනට බාරදෙන ලදි. මැයි 7 වැනිදා, පාස්කු ප්‍රහාරය ගැන පැවැති පාර්ලිමේන්තු විවාදයේදී කතාකළ ජනාධිපතිවරයා, මෙවැනි වාර්තාවක් ලබාදීම ගැන මහින්ද රාජපක්‍ෂටත්, ඔහුගේ හිටපු හමුදාපතිවරුන් පිරිසටත් ප්‍රශංසාත්මක ස්තුතිය පළකළේය. මේ හිටපු හමුදාපතිවරුන් හා පොලිස්පතිවරුන් සමහරකු පසුගිය කාලය පුරා, විවිධ අපරාධකාරී චෝදනාවන් එල්ලවුණු පිරිසකි. හොඳම උදාහරණය අද්මිරාල් වසන්ත කරන්නාගොඩය. ඊට අමතරව, හිටපු පොලිස්පති මහින්ද බාලසූරිය යනු, රාජකාරි රැස්වීම්වලදී නිදාගැනීම දෛනික පුරුද්ද කරගත්, මහින්ද රාජපක්‍ෂ මහතාගේ රූකඩයක් බඳුව පොලිස්පති ධුරයේ කටයුතු කළ, කටුනායක රොෂේන් චානක ඝාතනයෙන් පසුව ඊට වගකීම පටවා පොලිස්පති පුටුවෙන් පලවාහැරුණු අතිශය අසාර්ථක හිටපු පොලිස්පතිවරයෙකි. ඒ සියල්ල්ටමත් වඩා මේ සියලු හිටපු හමුදාපතිවරුන්, ගෝඨාභය රාජපක්‍ෂගේ අන්තේවාසිකයන් වැනි පිරිසකි.


ඔවුන් විසින් සකස් කරන ලදුව, මහින්ද රාජපක්‍ෂ මහතාටත්, ජනාධිපති සිරිසේනටත් භාරදුන් වාර්තාවේ ඇත්තේ කුමක්දැයි හෙළිදරව් වී නැත. රටේ ආරක්‍ෂාවට අදාළ යෝජනා නිසා ඒවා එළිදරව් කෙරේද යන්නද සැකසහිතය.


කෙසේ වෙතත්, එම වාර්තාවේ අඩංගු වෙනවායැයි මේ වන විට ගෝඨාභය රාජපක්‍ෂගේ සහ අනෙකුත් සමහර හිටපු හමුදා ප්‍රධානීන්ගේ මුවින් පිටවී ඇති කාරණයක් තිබේ. එනම්, හමුදා නිලධාරීන්ට ‘සේවා මුක්තියක්’ ලබාදීම පිළිබඳ යෝජනාවයි. ඒ සඳහා රටේ නීති අලුතෙන් පැනවිය යුතුයැයි ගෝඨාභය ඇතුළු මේ හිටපු හමුදාපතිවරු කියති. ඊටත් වඩා, ගෝඨාබය රාජපක්‍ෂ දැනටමත් කියා ඇත්තේ, තමා ජනාධිපති ධුරයට පත්වුණොත්, හමුදා නිලධාරීන්ට සේවා මුක්තියක් ලබාදීමට කටයුතු කරන බවයි. ‘පසුගිය කාලය පුරා හමුදා බුද්ධි අංශවල සේවය හරිහැටි ඉටු නොවුණේ ඔවුන්ට සේවා මුක්තියක් නොතිබුණු නිසා, විවිධ නඩුහබවලට අත්අඩංගුවට ගැනීම්, ප්‍රශ්න කිරීම්, රිමාන්ඞ් භාරයේ තැබීම් ආදිය සිදුවුණු නිසා යැයිද, ඒ තත්ත්වය වළක්වා ගැනීමට නම්, හමුදාවලට සහ පොලිසියට සේවා මුක්තියක් නීතියෙන්ම ඇති කළ යුතුයැයිද ගෝඨාභය රාජපක්‍ෂ ප්‍රමුඛ මේ පිරිස ප්‍රචාරය කරන ප්‍රවාදයයි.


මේ සේවා මුක්තිය යනු කුමක්ද? වෙන වචනවලින් කිවහොත්, ‘දණ්ඩ මුක්තිය’යි. කිසියම් අපරාධයක් කොට, ඊට අදාළ ප්‍රතිවිපාක හෙවත් දඬුවම්වලින් ගැලවී සිටීමේ හැකියාව, නැතිනම් නිදහස, දණ්ඩ මුක්තිය වශයෙන් හඳුන්වනු ලැබේ. දණ්ඩ මුක්තිය තිබෙන අය කරන අපරාධවලට එරෙහිව නීතිය ක්‍රියාත්මක කිරීමක් නැත. නඩු ඇසීමක්, දඬුවම් ලැබීමක් නැත. හමුදාවල සහ පොලිසියේ සේවය කරන්නන්ට දණ්ඩ මුක්තියක් තිබීමෙන් අදහස් වන්නේ, ඔවුන් සිය ‘රාජකාරි හැටියට, නැතිනම් රාජකාරි මුවාවෙන්’ කරන අපරාධ සම්බන්ධයෙන් නීතිය ක්‍රියාත්මක වීමක් නොමැතිය යන්නයි.


ඉතින්, මෙවැනි මුක්තියක් තිබෙන අයට, සිතු සේ සිය රාජකාරිය මුවාවෙන් මිනි මරන්නට පිළිවන. ඕනෑම කෙනෙකු පැහැරගෙන යන්නට පිළිවන. පැහැරගෙන ගොස් රඳවා තබාගෙන කප්පම් ඉල්ලන්නට පිළිවන. ඕනෑම කෙනකු මරා දමන්නට පිළිවන. සුදුවෑන්වලින් පැහැරගෙන ගොස් අතපය කඩා මහමග දමා යන්නට පිළිවන.


අප්‍රේල් 21 වැනි ඛේදවාචකයක් යළි නොවන්නට, ඊට අදාළ දැනුම ඇති සියල්ලන්ගේම ඒ දැනුම, යෝජනා එකතු කරගත යුතු බව හැබෑය. එහෙත්, මේ කරන්නට හදන්නේ ඒ ඛේදවාචකයට මුවා වී, දැනට අපරාධවලට චුදිතයන් වී සිටින හා අනාගතයේ චුදිතයන් විය හැකි හමුදා හා පොලිස් නිලධාරීන් ඉන් ගලවාගැනීමේ අශුද්ධ මෙහෙයුමකි.


මෙවැනි සේවා මුක්තියක් ලද විටෙක හමුදා හා පොලිස් නිලධාරීන්ට විශාල නිදහසක් ලැබෙයි. ඒ කුමටද? රිසි රිසි ලෙස අපරාධ කරන්නටය. ඕනෑම අපරාධයක් කර, ‘එය රාජකාරියක් හැටියට කළායැ’යි කීමෙන් පමණක් ඒ අපරාධවලින් ගැලවී සිටීමේ හැකියාව මෙවැනි ‘සේවා මුක්තියක්’ යටතේ හමුදා හා පොලිස් නිලධාරීන්ට ලැබේ.


අප්‍රේල් 21ට මුවාවී මෙවැනි භයානක මුක්තියටක් ලබාගන්නට ගෝඨාභය රාජපක්‍ෂ ප්‍රමුඛ හමුදා හිටපු නිලධාරීන්ට වුවමනා වී තිබෙන්නේ ඇයි? විශේෂයෙන්ම ඒ කණ්ඩායමේ සාමාජිකයකු වන අද්මිරාල් කරන්නාගොඩට නම් ඒ ගැන පෞද්ගලික අත්දැකීමක්ම තිබේ. ඒ තරුණ ශිෂ්‍යයන් ඇතුළු 11 දෙනකු කප්පම් සඳහා පැහැරගෙන ගියායැයි කියන අපරාධය දැන ගෙන, එය වැළැක්වීමට උත්සාහ නොකළාය යන චෝදනාව ඔහු වෙත එල්ලවී තිබෙන බැවිනි. එම චෝදනා සම්බන්ධයෙන් තමා අත්අඩංගුවට ගැනීමෙන් වළක්වන්නැයි ඔහු ශ්‍රේෂ්ඨාධිකරණයෙන් කළ ඉල්ලීම පිළිගෙන, එවැනි ආරක්‍ෂාවක් ඔහුට දැන් ලැබී තිබේ.

මෙවැනි සේවා මුක්තියක් ආවොත්, ඔහුට කිසිම බයක් සැකක් නැතිව තමා කළ වරදවලින් මිදී සිටින්නට නීතියෙන්ම හැකියාව ලැබේ.
මෙවැනි මුක්තියක් තිබුණේ නම්, ලසන්ත වික්‍රමතුංග ඝාතනය ගැන හමුදා නිලධාරීන් චුදිතයන් වන්නේ නැත. එක්නැලිගොඩ පැහැරගෙන ගොස් අතුරුදහන් කිරීම, කිත් නොයර් පැහැරගෙන යෑම, උපාලි තෙන්නකෝන්ට පහරදීම, පුද්ගලයන් එකොලොස් දෙනකු පැහැරගෙන ගොස් මරාදැමීම ආදි සහගහන අපරාධවලට යුද හමුදාවේ සහ නාවික හමුදාවේ බුද්ධි අංශ ඉහළ නිලධාරීන් චුදිතයන් වන්නේ නැත. ඒ සියල්ලන්ටම, අපරාධ කර එහි විපාකවලින් ගැලවීමේ වරම නීතියෙන්ම සපයා දෙන බැවිනි.


ගෝඨාභය රාජපක්‍ෂ මහතාට, මේ තරම් උනන්දුවෙන්, අප්‍රේල් 21 ඛේදවාචකය අව්අස්සේ ‘සේවා මුක්තියක්’ ගැන යෝජනා කරන්නට ඇති කැක්කුම කුමක්ද? එය ඉතා පැහැදිලිය.
එක්නැලිගොඩ පැහැරගත්, ලසන්ත ඝාතනය කළ, නොයර් පැහැරගත් කිසිම හමුදා බුද්ධි නිලධාරියකුට ඒ ඒ වින්දිතයන් සමග කිසිම පෞද්ගලික අරෝවක්, තරහක් නොතිබුණි. අනෙක් අතට ඒ වින්දිතයෝ ත්‍රස්තවාදී ක්‍රියාවලට හෝ වෙනත් කඩාකප්පල්කාරී ක්‍රියාවකට සම්බන්ධවූවෝ නොවෙති. එහි තේරුම, මේ බුද්ධි නිලධාරීන් ඒ අපරාධ කර ඇත්තේ, ඒ අපරාධ කරවීමට වුවමනාවක් තිබෙන කිසිවකුගේ අණාඥාව පිට බවය. ඒ අණාඥාව කාගේද යන්න තවමත් පැහැදිලි නැත. සමහර විට එතැනදී, යම් හේතුවක් නිසා තමා මේ සැකකරුවන් වෙනුවෙන් කළගුණ සැලකිය යුතුයැයි ගෝඨාභය රාජපක්‍ෂ මහතා විශ්වාස කරනවා වන්නටද පිළිවන. එහි ප්‍රතිඵලයක් ලෙස යුහුසුළුව, සේවා (දණ්ඩ) මුක්තිය ලබාදීමට කැපවී කටයුතු කරනවා වන්නටද පිළිවන.


එහෙත්, රටක් හැටියට මෙවැනි දණ්ඩ මුක්තියක් හමුදාවල සහ පොලිසියේ නිලධාරීන්ට ලැබීම අතිශය විනාශකාරී බව අප තේරුම් ගත යුතුය. එවැනි මුක්තියක් නිසා සිතු සේ අපරාධ කර, කාගෙහෝ ඇණවුමක් ඇතිව හෝ නැතිව හෝ අපරාධ කර, ඒවායේ විපාකවලින් ගැලවීමේ හැකියාවක් ආයුධ අත දරන පුද්ගලයන්ට ලබාදෙනු ඇත.


යුද්ධයට මුවා වී විවිධාකාර අපරාධවල යෙදුණු හමුදාවේ ඉහළ සිට පහළ දක්වා විශාල පිරිසක් පසුගිය කාලයේ හෙළිදරව් වූහ. ඔවුන්ට එරෙහිව පැවැත්වෙන විමර්ශන මෙන්ම, මුලික පරීක්‍ෂණද ඉදිරියට යන්නේ බොහෝ සෙමින්ය. ඒ, හමුදාවල ඉහළ නිලධාරීන් ඒ විමර්ශනවලට වුවමනාවෙන්ම සහාය නොදෙන නිසාය. ජනාධිපතිවරයාද සිටින්නේ ඒ පැත්තේය. ඒ නිසා, ඒ අපරාධවලට ලක්වූ පුද්ගලයන් වෙනුවෙන් යුක්තිය ඉටුවීම නොපෙනෙනා දුරකට ඇදීගොස් තිබේ. ඒ අතර, මෙවැනි සම්පූර්ණ ආවරණයක් නීතියෙන්ම අපරාධකරුවන්ට ලැබුණහොත්, එනිසා යුක්තිය කිසිදා ඉටුනොවනු ඇත්තේය. ■