සිරිසේන-රාජපක්‍ෂ හොර ආණ්ඩුව ගමන් කරන්නේ කොයිබටද යන්න පෙන්නුම් කරන ආසන්නතම ප්‍රබල සංඥාව වූයේ අපරාධ පරීක්‍ෂණ දෙපාර්තමේන්තුවේ සමූහ අපරාධ පිළිබඳ ඒකකයේ ස්ථානාධිපති පොලිස් පරීක්‍ෂක නිශාන්ත සිල්වා මාරු කිරීමය.

එහි අනෙක් සිදුවීම වාර්තා වූයේ නොවැම්බර් 25දින සවස්වරුවේදීය. ඒ නාවික හමුදා මූලස්ථානයේදීය. එහිදී ජීවිත අනතුරකට මුහුණදුන්නේ නාවික හමුදා ලුතිනන් කමාන්ඩර් ගලගමගේ ලක්සිරිය. හිටපු නාවික හමුදාපතිවරයෙකු වූ වත්මන් ආරක්ෂක මාණ්ඩලික ප්‍රධානී අද්මිරාල් රවීන්ද්‍ර විජේගුණරත්නගේ නියෝග මත ඔහුගේ පෞද්ගලික ආරක්ෂකයන් පිරිසක් විසින් එහිදී ලුතිනන් කමාන්ඩර් ගලගමගේ ලක්සිරිගේ ජීවිතයට තර්ජනයක් සිදුකිරීමට උත්සාහ දරා ඇත. ඉන් ලුතිනන් කමාන්ඩර් ලක්සිරි බේරී කෙලින්ම දිවගොස් ඇත්තේ කොළඹ කොටුව පොලීසිය වෙතය.
පොලිසියට කර ඇති පැමිණිල්ල අනුව, නිලධාරී භෝජනාගාරයෙන් සවස පිටතට එන විට ඔහු දැක ඇත්තේ රවීන්ද්‍ර විජේගුණවරත්න එහි දොරටුව අසල සිටින අයුරුය. මුහුණට මුහුණ හමුවීම ප්‍රශ්නයකට මඟ පාදාගැනීමක්යැයි සැක සිතූ ඔහු භෝජනාගාරයෙන් පිටවීම වෙනුවට නැවත භෝජනාගාරය දෙසට ගමන් කර ඇත. එහිදී ලක්සිරි දැක ඇති රවින්ද්‍ර විජේගුණරත්න අසභ්‍ය වචනයෙන් බැන වදිමින් සිය පෞද්ගලික ආරක්ෂකයන්ද සමග ලක්සිරි ලුහුබැඳ ඇත. ඉන් බේරීම සඳහා ලක්සිරි සිදුකර ඇත්තේ භෝජනාගාරයේ නාන කාමරයකට ඇතුල්වී එහි දොරගුළු ලා ගැනීමය. ඒ අවස්ථාවේදී රවීන්ද්‍ර විජේගුණරත්න ඔහුගේ පෞද්ගලික ආරක්ෂකයන්ට පරුෂ වචන භාවිත කරමින් නියෝග කර ඇත්තේ ගලගමගේ ලක්සිරි අල්ලාගෙන එන ලෙසය. එම අවස්ථාවේදී ලක්සිරි නාන කාමරයේ පසුපස දොරකින් පිටවී පඩිපෙළකින් පළායෑමට උත්සාහ කරන විට ඔහු වටකර පිස්තෝල මානාගෙන සිටියෝ රවීන්ද්‍ර විජේගුණරත්නගේ පෞද්ගලික ආරක්ෂකයෝය. ඔහු එම අවස්ථාවෙන් බේරී පඩිපෙළින් පැන ඇති අතර විජේගුණරත්නගේ පෞද්ගලික ආරක්ෂකයෙකු සතුව තිබූ පිස්තෝලයක්ද එම අවස්ථාවේදී බිමට වැටි ඇත.

කොළඹ කොටුව පොලිස් ස්ථානාධිපතිවරයා ලුතිනන් කොමාන්ඩර් ගලගමගේ ලක්සිරිගේ පැමිණිල්ල සටහන් කරගැනීමෙන් පසු ශ්‍රී ලංකා නාවික හමුදා මූලස්ථානයට ඇතුළුවී පරීක්ෂණයක් සිදුකිරීමට උත්සාහ කර ඇතත් ඊට අවසර ලැබී නැති අතර ලක්සිරි රාජකාරි පොත්වල සටහන් තබා නැවත නාවික හමුදා මූලස්ථානයට බාරදී ඇත.
මෙම සිදුවීමට මුහුණ පෑ ලුතිනන් කොමාන්ඩර් ගලගමගේ ලක්සිරි යනු කවුද?

කප්පම් ලබා ගැනීම සඳහා තරුණයන් ඇතුළු පුද්ගලයන් 11 දෙනෙකු පැහැරගෙන ගොස් පසුව මරා දැමීමේ සිදුවීමේ එක් ප්‍රධාන සාක්ෂිකරුවෙක්ය. අපරාධ පරීක්‍ෂණ දෙපාර්තමේන්තුවේ සමූහ අපරාධ පිළිබඳ ඒකකයේ ප්‍රධානී නිශාන්ත සිල්වා විසින් සිදුකරන එක් ප්‍රධාන පරීක්‍ෂණයක් වන්නේ මෙයය.

මේ සාක්ෂිකරුට මරණ තර්ජන ඇති බව අපරාධ පරීක්‍ෂණ දෙපාර්තමේන්තුව අධිකරණයට කරුණු වාර්තාකරන්නේ පසුගිය සැප්තැම්බර් 26 දිනදීය. ලුතිනන් කොමාන්ඩර් ලක්සිරිට පමණක් නොව එම ඝාතන නඩුවේ අනෙක් සාක්ෂිකරුවා වූ ලුතිනන් කමාන්ඩර් වෙලගෙදරටද පසුගිය කාලය තුළ නාවික හමුදාව තුළ සිදුවූ අඩන්තේට්ටම්, ආසාධාරණකම් බොහෝය. ඒ ඔවුන් අපරාධයක් කළ නිසා නොව නාවික හමුදා ඇඳුමට මුවාවී කරන ලද සාහසික අපරාධයන් සම්බන්ධයෙන් තමන් දන්නා කරුණු හෙළිදරව් කළ සාක්ෂිකරුවන් වූ බැවින්ය.

රණවිරු ලේබලය යටතේ අපරාධකරුවන් ආරක්ෂා කරමින් අපරාධවලට ගොදුරු වූ වින්දිතයන්ට හා සාක්ෂිකරුවන්ට මඩ ගසන හා අවලාද නගන ‘දිවයින’ පුවත්පතේ ජඩ මාධ්‍යවේදීන්ට මෙවැනි මිනිසුන් ද්‍රෝහීන් වූවාට නීතියේ ආධිපත්‍යයට ගරු කරන, දණ්ඩ මුක්තිය පිටු දකින අයට නම් මෙවැනි පුද්ගලයන් ගරුකටයුතු හමුදා සාමාජිකයන්ය.
රටේ පවතින නීතිය අනුව අපරාධයක් පිළිබඳ කරුණු වසන් කිරීම දඬුවම් ලැබිය හැකි වරදකි. යම් අපරාධයක් පිළිබඳ කරුණු දන්නේ නම් පරීක්‍ෂණ කණ්ඩායම්වලට ඒවා පැවසීම ද්‍රෝහීකමක් හෝ පවාදීමක් නොවේ. ගරුකටයුතු පුරවැසියෙකුගේ, රාජ්‍ය සේවකයෙකුගේ හෝ හමුදා සාමාජිකයෙකුගේ නීත්‍යනුකූල වගකීමකි.

මේ වගකීම ඉටු කිරීමට ගොස් ලුතිනන් කොමාන්ඩර් ලක්සිරිට අද සිදුවී ඇත්තේ වයස අවුරුදු 55 දක්වා තවත් වසර 5ක කාලයක් නාවික හමුදාව තුළ සේවය කිරීමට කාලය ඉතිරිවී තිබියදී, දැන් විශ්‍රාම යෑමටය. ඊට හේතුව ඊළඟ නිලය වූ ස්ථිර කමාන්ඩර් තනතුරට උසස්වීමක් නොලැබුණහොත් වයස අවුරුදු 50දී විශ්‍රාම යා යුතු බවට නාවික හමුදා තුළ ඇති නීතිය නිසාය.

එම නිසාම ඔහු 2018 නොවැම්බර් 02 දින සහිතව නාවික හමුදාපතිවරයාට ලිපියක් ලියමින් සඳහන් කරන්නේ, 2018 දෙසැම්බර් 11 දින ඔහුට වයස අවුරුදු 50 සැපිරෙන බවත් එම දිනය තෙක්ම කොමාන්ඩර් නිලයට තමාට උසස්වීමක් නොලැබුණ හෙයින් නාවික හමුදා නීතිය අනුව සේවයෙන් විශ්‍රාම ගැන්වීමට සිදුවන බවත් ඒ අනුව ඔහුගේ විශ්‍රාමයට අවශ්‍ය කටයුතු සලසා දෙන ලෙසත්ය.

වසර 21කුත් මාස 9ක් හා දින 14ක සේවා කාලයක් සම්පූර්ණ කර තවදුරටත් රාජකාරි කිරීමට හැකියාව තිබියදී ඔහු විශ්‍රාම යන්නේ හෝ ඔහු විශ්‍රාම ගන්වන්නේ අහම්බයකින් නොවේ. වසර ගණනාවක් තිස්සේ ඊළඟ උසස්වීම ඔහුට ලබාදෙන ලෙසට ඔහු කරන ලද ඉල්ලීම්ද, නොඑසේ නම් සේවා දිගුවක් ලබාදෙන ලෙසට ඔහු කරන ලද ඉල්ලීම්ද නාවික හමුදා බලධාරීන් හා සේනාධිපතිනායක ජනාධිපති මෛත්‍රීපාල සිරිසේන විසින් නොතකා හැරීමේ ප්‍රතිඵලයක් වශයෙන්ය. මේ නොතකා හැරීම් සියල්ලම අතිශය පුද්ගලිකව ඔහුට පමණක් වන සේ කරන ලද නොකතා හැරීම්ය.

ලක්සිරිට එසේ වුවත් පසුගිය කාලය තුළ වයස අවුරුදු 50 සැපිරීමට තවත් වසර ගණනාවක් ඇති ඔහුට වඩා කනිෂ්ඨ නිලධාරීන්ට කමාන්ඩර් නිලයට උසස්වීම් ලබාදී ඇත. එසේ උසස්වීම් නොලැබුණ අයට ඊළඟ උසස්වීම් ලබාගැනීම සඳහා සේවා දිගු ලබාදී තිබේ. මේ සියල්ලම සිදුවන්නේ ඉහළ නාවික හමුදා නිලධාරීන්ගේ නාවික හමුදාපතිවරයාගේ හා අවසානයේ සේනාධිනායක වන ජනාධිපතිවරයාගේ තීන්දු තීරණය මතය. අප අමතක නොකළ යුතු කරුණ වන්නේ ගලගමගේ ලක්සිරි වසර දහයක කාලයක් වත්මන් තනතුරේ කටයුතු කරන බවය. ත්‍රිවිධ හමුදා නිලධාරීන්ට උසස්වීම් හා සේවා දිගු ලබා දෙන්නේ සේනාධිනායක ලෙස ජනාධිපතිවරයා විසිනි.

අසාධාරණයට ලක්ව ඇති ලුතිනන් කොමාන්ඩර් ලක්සිරිට උසස්වීම් ලබා නොදුන්නද තරුණයන් 11 දෙනෙකු පැහැර ගෙන ගොස් මරා දැමීමේ මහා අපරාධයේ හා තවත් අපරාධවලට සැකකරුවන් වී සිටින කමාන්ඩර් ඩී.කේ.පී දසනායක, කමාන්ඩර් ආර්.පී.එස්. රණසිංහ හා කමාන්ඩර් එම්.එම්.ඩී.ඒ මාපාට සේනාධිනායක ජනාධිපති මෛත්‍රීපාල සිරිසේන උසස්වීම් සේවා දිගුව ලබාදී ඇත්තේ ඔවුන් කළ අපරාධයන්ට උත්තම ලෙස සැලකීමක් ලෙස විය යුතුය.
නාවික හමුදාවේ වේවා, යුද හමුදාවේ වේවා, ගුවන් හමුදාවේ වේවා යම් සාමාජිකයෙකු අපරාධ පිළිබඳ චෝදනාවකට රිමාන්ඞ් බන්ධනාගාර ගතවීම පමණක් නොව සිවිල් ගණයට වැටෙන සිද්ධීන්වලට රිමාන්ඞ් බන්ධනාගාර ගතවුවද ඔවුන්ට උසස්වීම් ලබාදීම සිදු නොවේ. එමෙන්ම ඔවුන්ගේ වැඩ තහනම් කිරීමද සිදුවේ.

එහෙත් මෙම අපරාධකරුවන් සම්බන්ධයෙන් එවැනි පියවර අනුමගනය නොකිරීම විශේෂයක් ගනී. ඊට ඇති එක් හොඳම උදාහරණයක් වන්නේ මාධ්‍යවේදී ප්‍රගීත් එක්නැළිගොඩ අතුරුදන් කිරීමේ නඩුවේ ප්‍රධාන සැකකරුවන් වූ යුද හමුදාවේ ලුතිනල් කර්නල් ෂම්මි කුමාරරත්න, මාණ්ඩලික සැරයන් බාල සුබ්‍රමනියම්, සැරයන් ප්‍රියන්ත කුමාර රාජපක්‍ෂ, ලුතිනන් ඒමින්ද කුමාර අබේරත්න හා සැරයන් තරංග ප්‍රසාද් ඔවුන්ට ඇප ලැබුණ සැණින් සේනාධිනායක ජනාධිපති මෛත්‍රීපාල සිරිසේන විසින් නැවත සේවයේ පිහිටුවනු ලැබීමය.

මේ සෑම සිදුවීමකින්ම සේනාධිනායක ජනාධිපති මෛත්‍රීපාල සිරිසේන පෙන්නුම් කරනු ලැබුයේ ඔහු අපරාධකරුවන්ට කැමති බවත්, අපරාධකරුවන් ආරක්ෂා කරමින් ඔවුන් රැක බලා ගැනීමට පසුබට නොවන බවත්ය.
අපරාධකරුවන් රණවිරුවන් නොවන බවත් රණවිරුවන් අපරාධකරුවන් නොවන බවත් අපරාධකරුවන්ට තරාතිරම නොබලා දඬුවම් කළ යුතු බවත් කී හිටපු නාවික හමුදාපති ට්‍රැවිස් සින්නයියා නාවික හමුදා ඉතිහාසයේ වාර්තාවක් තබමින් මාස දෙකකුත් දින තුනකදී ධුරයෙන් ඉවත් කිරීම ජනාධිපතිවරයාගේ ‘අපරාධකරුවන්ට කැමතිබවේ’ ප්‍රතිඵලයක් බවට කිසිදු සැකයක් නැත. තරුණයන් 11 දෙනෙකු පැහැරගෙන ගොස් මරා දැමීම සම්බන්ධයෙන් හිටපු නාවික හමුදාපති ට්‍රැවිස් සින්නයියාද අපරාධ පරීක්‍ෂණ දෙපාර්තමේන්තුවට ප්‍රකාශයක් ලබා දුන් අයෙක්ය.

අපරාධකරුවන්ට දණ්ඩ මුක්තිය ලබාදීමට තමා කැපවන බව ජනාධිපති මෛත්‍රීපාල සිරිසේන පෙන්නුම් කරනු ලැබූයේ ඔහු බලයට පත්වී ටික කලකින්ය. බලයට ඒම සඳහා රාජපක්‍ෂවරුන්ට එරෙහිව වේදිකා ගානේ කිව් ජනමාධ්‍යයට එරෙහි අපරාධ සම්බන්ධයෙන් කොමිසමක් පත්කර කරුණු සොයා බලා ඊට වගකිවයුත්තන්ට නීතිය හමුවේ දඬුවම් ලබාදෙන ලෙස ශ්‍රී ලංකා වෘත්තීය ජනමාධ්‍යවේදීන්ගේ සංගමය ඔවුන්ගෙන් කරන ලද ඉල්ලීම් අලුයම ලූ කෙළ පිඬක් සේ ඉවත හෙළුවේ අද අප දකිමින් සිටින ඔහු තුළ නිදන්ගත වී සිටින ඇත්ත සිරිසේන නිසා විය යුතුය. එහිදී ඔහු කළේ අපරාධකරුවන්ට දණ්ඩ මුක්තිය ලබාදෙමින් අපරාධවලට ගොදුරුවූවන්ට රජයෙන් වන්දි ලබාදීමේ ඒකපුද්ගල කමිටුවක් පත්කිරීම පමණය.

මේ ලිපියට පාදකවන ගලගමගේ ලක්සිරිගේ ජීවිතය දැන් අවදානමට ලක්වී ඇත. එකක් ඔහු නාවික හමුදාවෙන් විශ්‍රාම ගැනීමත් සමග සිවිල් පුද්ගලයෙකු බවට පත්වෙන නිසාය. ඔහු උසස්වීම් නොලබා හෝ සේවා දිගුවක් ලබාදෙන ලෙස ඉල්ලා තිබුණේ තරුණයන් 11 දෙනෙකු පැහැරගෙන ගොස් මරාදැමීමේ නඩුවේ අධිකරණ වාචික සාක්ෂි විභාගය තෙක් හෝ නාවික හමුදාව තුළ සිටීමෙන් ඔහුගේ ජීවිතයට යම් ආරක්ෂාවක් ලැබෙතැයි යන බලාපොරොත්තුවෙන්ය.
ඔහුගේ ජීවිත ආරක්ෂාව පිළිබඳ බරපතළ තත්ත්වය ඔහු අපරාධ පරීක්‍ෂණ දෙපාර්තමේන්තුවේ අධ්‍යක්ෂවරයාට මෙන්ම ශ්‍රී ලංකා මානව හිමිකම් කොමිෂන් සභාවටද ලිඛිතව සැලකර තිබුණි. එම සැලකිරීම්වලදී ඔහු විශේෂ කාරණයක් අනාවරණය කරයි.

“විශේෂයෙන්ම මා වෙත එල්ල වී ඇති තර්ජන හමුවේ මා බියට පත්ව සිටින්නේ අද්මිරාල් රවී විජේගුණරත්න නාවික හමුදාධිපති වශයෙන් කටයුතු කරන ලද කාලයේ ඔහුගේ පෞද්ගලික ආරක්ෂක නිලධාරියා වන කමාන්ඩර් කේජීසීඑම් ගමගේට නාවික හමුදාවේ මුදලින් 9mm වර්ගයේ පිස්තෝලයක් ඔහුගේ නමින් ලබා දී ඇත. ආරක්ෂක නිලධාරියා මේ වනවිට විශ්‍රාම ගොස් ඇති අතර ඔහුගේ නමට ලබා ගත් පිස්තෝලයද ඔහු රැගෙන ගොස් ඇත. වසර 08කට ආසන්න කාලයක් තිස්සේ රවී විජේගුණරත්න ළඟින්ම සිටි ඔහු විසින් රැගෙන යන ලද පිස්තෝලය බොහෝ විට මාගේ ජීවිතය විනාශ කිරීමට යොදා ගැනීම කළ හැකිය. එම අවියේ තොරතුරු ඇතුළත් ඡායා පිටපත් මේ සමග එවමි. තවද විශ්‍රාම යන කිසිදු නාවික හමුදා කමාන්ඩර් නිලයකට තම පෞද්ගලික පාවිච්චිය සඳහා පිස්තෝලයක් මේ වනතුරු මා දන්නා තරමින් ලබාදී නැත. එසේ ලබා දෙන්නේ නම් ඔහුට පවතින තර්ජනයක් හේතුකොටගෙන දිය යුතුයි. නමුත් මෙම නිලධාරියා නාවික හමුදාවෙන් පිස්තෝලයක් සමග විශ්‍රාම යවන්නේ ඔහු ලවා රවී විජේගුණරත්නට එල්ල වන තර්ජනයන් විනාශ කිරීමට විය යුතුය. තවද මේ වනවිට මා විසින් ලබා දෙනු ලැබූ සාක්ෂිය මත සියලු මාධ්‍ය හරහා විශාල ප්‍රචාරණයක් ලබාදීම තුළින් මාගේ ජීවිත තර්ජනය තවත් තීව්‍ර වී ඇත. එයට උදාහරණයක් වශයෙන් මාධ්‍යවල පළවූ ඇතැම් කොටස් මේ සමග ඉදිරිපත් කරමි.”

මේ වූකලි සුළුවෙන් තැකිය යුතු තත්ත්වයක් නොවේ. ශ්‍රී ලංකා මානව හිමිකම් කොමිෂන් සභාව නාවික හමුදාපතිවරයාට ලිපියක් යොමු කරමින් ගලගමගේ ලක්සිරිගේ චෝදනා සම්බන්ධයෙන් නාවික හමුදාවේ නිරීක්‍ෂණය ඉල්ලා සිටින්නේ ඒ නිසාය. එහිදී අපරාධයක වින්දිතයන් හා සාක්ෂිකරුවන්ට සහාය දීමේ සහ ආරක්ෂා කිරීමේ පනතේ විධිවිධාන පිළිබඳව අවධානය යොමු කරමින් මානව හිමිකම් කොමිෂන් සභාව සඳහන් කරන්නේ සාක්ෂිකරුවන් සම්බන්ධයෙන් ඔහුගේ සේවා ස්ථානය තුළ යම් අගතිගාමී වෙනසක් සිදුකරන්නේ නම් එය වරදක් බවයි.

එහෙත් තව නොබෝ දිනකින් ගලගමගේ ලක්සිරිට තවදුරටත් සේවය කිරීම සඳහා වයස තිබියදී නාවික හමුදාවෙන් විශ්‍රාම යෑමට සිදුවීමෙන් අපට පෙන්නුම් කරන්නේ රටේ නීතියටත්, යුක්තිය පසිඳලීමේ ආයතනවලටත් ගරු නොකිරීමේ සම්ප්‍රදායක් ශ්‍රී ලංකා නාවික හමුදාව විසින් නඩත්තු කරමින් පවතින බවයි.

මේ තත්ත්වය යුක්තිගරුක නාවික හමුදා සාමාජිකයන් සම්බන්ධයෙන් ඉතාම අගතිගාමීය. ඔවුන්ගේ ජීවිත අනතුරට නිරාවරණය කරවනසුලුය. තවදුරටත් අපරාධ වළ දැමීමේ හා අපරාධකරුවන් ආරක්ෂා කිරීමේ සංස්කෘතියකට මඟ පාදන්නකි. එම සංස්කෘතිය පරාජය කළ යුතු අතර එසේ පරාජය කළ හැක්කේ නීතියට ගරු කරන පාලකයන් අප ළඟා කරගතහොත් පමණය. ගලගමගේ ලක්සිරිගේ සිද්ධියෙන් අපට ලබාදෙන පණිවිඩය එයයි.■