ශ්‍රේෂ්ඨාධිකරණය සහ අභියාචනාධිකරණය ඉදිරියේ මේ වනවිට විභාග වෙමින් පවතින පෙත්සම් දෙකෙහි තීන්දුව ලැබෙන තෙක් අතුරු සම්මත ගිණුමක් පාර්ලිමේන්තුවට ඉදිරිපත් නොකරන බව නීතිවිරෝධී ආණ්ඩුවේ වාසුදේව නානායක්කාර අනිද්දා සමඟ අදහස් දක්වමින් ප්‍රකාශ කළේය.

අතුරු සම්මත ගිණුමක් කැබිනට් මණ්ඩලය විසින් අනුමත කළේයැයි මාධ්‍ය විසින් වාර්තා කරනු ලැබ තිබුණද, පාර්ලිමේන්තුවේ සම්මත වන තෙක් අතුරු සම්මත ගිණුමක් නීත්‍යනුකූල නොවන අතර, ඒ පිළිබඳව කළ විමසීමකදී වාසුදේව නානායක්කාර මහතා එසේ කීය.

පාර්ලිමේන්තුව විසුරුවා හැරීම සඳහා ජනාධිපති මෛත්‍රීපාල සිරිසේන නොවැම්බර් 09 වැනිදා නිකුත් කළ ගැසට් පත්‍රයට එරෙහිව ශ්‍රේෂ්ඨාධිකරණයට ඉදිරිපත් කර තිබෙන පෙත්සම් සම්බන්ධයෙන් දෙසැම්බර් 07 වැනිදා තීන්දුවක් ලබාදීමට නියමිතය. මහින්ද රාජපක්ෂ මහතා විශ්වාසභංගයකින් පරාජය වීමෙන් පසුවද නීතිවිරෝධී ලෙස අග්‍රාමාත්‍යධුරයේ කටයුතු කිරීම හා අමාත්‍යධුරවල කටයුතු කිරීම සම්බන්ධයෙන් අභියාචනාධිකරණය වෙත ඉදිරිපත් කර තිබෙන රිට් ආඥාව නොවැම්බර් 30 වැනිදා විභාගයට ගැනීමට නියමිතය.

පාර්ලිමේන්තුව විසුරුවා හැරීම නීතිවිරෝධී බවට ශ්‍රේෂ්ඨාධිකරණය තීන්දුවක් ලබා නොදුනහොත් පාර්ලිමේන්තුවේ කටයුතුවලට සහභාගි වීමට සිදුවන බව වාසුදේව නානායක්කාර මහතා කීවේය.

අභියාචනාධිකරණය විසින් මහින්ද රාජපක්ෂ අගමැතිධුරයේ කටයුතු කිරීමට එරෙහිව රිට් ආඥාවක් නිකුත් කළහොත් එය පිළිගනිමින් ආණ්ඩුව අත්හරින බවත්, එසේ නොවුණහොත් අතුරු සම්මත ගිණුමක් සම්මත කරගැනීම සඳහා පාර්ලිමේන්තුවට ඉදිරිපත් කරන බවත් ඔහු කීය.

කෙසේ වෙතත් පාර්ලිමේන්තුවේදී අතුරු සම්මත ගිණුමට බහුතර බලය ලබාගත නොහැකි වුවහොත් එහිදීද ආණ්ඩුව විසිර යන බවත්, එය පිළිගෙන ආණ්ඩුවෙන් ඉවත් වන බවත් නානායක්කාර මහතා වැඩිදුරටත් පැවසීය.