ඔබගේ ජංගම දුරකථනයට ඇමතුම ලබාදෙන පුද්ගලයාගේ දුරකථන අංකය නොපෙන්වන ඇමතුම් ලැබෙන අවස්ථා ඇත. මේ අත්දැකීම ඇති බොහෝ පිරිසක් ඇතිවාට සැක නැත. ලියුම්කරුද එවැනි අත්දැකීම් ලැබූ අයෙකි. එවැනි ඇමතුම් ලැබෙන හැම අවස්ථාවකදීම ජංගම දුරකථන තිරයේ දිස්වන්නේ No Number හෝ Private Number යනුවෙන්ය.මේ No Number හෝ Private Numberඅයිතිකරුවන් කවුද? ජංගම දුරකථන තිරයේ ඇමතුම් අංකය දිස් නොවන ආකාරයේ මේ පහසුකම ඔවුන්ට ලබාදුන්නේ කවුද? ඒ සඳහා ජංගම දුරකථන කි‍්‍රයාකරු සමාගම්වලට නිර්දේශ ලබාදෙන්නේ කවුද? මේ ප‍්‍රශ්නය සඳහා පිළිතුරු ලබාගැනීම සඳහා ලියුම්කරු මුලින්ම ආමන්ත‍්‍රණය කළේ ජංගම දුරකථන කි‍්‍රයාකාරු සමාගම්ය. එහිදී ඔවුන්ගේ පිළිතුර වූයේ ඒ සඳහා නිර්දේශ ඔවුන්ට ලැබෙන්නේ ආරක්‍ෂක අමාත්‍යාංශයෙන් බවය.
ඒ අනුව ලියුම්කරු විසින් තොරතුරු දැනගැනීමේ අයිතිවාසිකම පනත යටතේ ආරක්‍ෂක අමාත්‍යාංශයේ තොරතුරු නිලධාරී වෙත ඉල්ලීමක් සිදුකරනු ලැබූ අතර එම ඉල්ලීම මෙයාකාරය. ‘‘ජංගම දුරකථන භාවිතයේදී ඇමතුම් ලබා ගන්නාට ඇමතුම ලබාදෙන පුද්ගලයාගේ දුරකථන අංකය දැනගැනීමට නොහැකි ලෙස No Number හෝ Private Number යනුවෙන් තිරය මත දිස්වන ඇමතුම් ලැබේ. අංකය නොපෙන්වන මේ ආකාරයේ ජංගම දුරකථන සබඳතා ජංගම දුරකථන කි‍්‍රයාකරුවන් විසින් නිකුත් කරනු ලබන්නේ ආරක්‍ෂක අමාත්‍යාංශයේ නිර්දේශ මත බව එම සමාගම් විසින් විස්තර කරනු ලබයි. ඒ ආකාරයට ඇමතුම් අංකය නොපෙන්වන ජංගම දුරකථන සම්බන්ධතා සඳහා ඔබ අමාත්‍යාංශය විසින් පසුගිය කාලය පුරා නිර්දේශ කර ඇති පුද්ගලයන්ගේ නාම ලේඛනය, ඒ එක් එක් ජංගම දුරකථන සබඳතාව සඳහා එවැනි නිර්දේශ ඉදිරිපත් කිරීමට හේතුව හා ඒ සඳහා ඉල්ලීම් කරනු ලැබූයේ කවුරුන්ද යන වග එක් එක් වර්ෂයට අදාළව වෙන් වෙන්ව අවශ්‍ය ගත්තු අයකර ලබාදෙන ලෙස ඉල්ලා සිටිමි.’’අපගේ තොරතුරු ඉල්ලීම ලැබුණ බවට ලැබුණ පිළිතුර තුළ වූයේ ‘දුරකථන ඇමතුමක් ලබාදෙන පුද්ගලයාගේ දුරකථන අංකය දිස්වීමට (CLI පහසුකම) නොමැති දුරකථන සම්බන්ධතාවන් ලබාදීමට නිර්දේශ කර ඇති පුද්ගලයන්ගේ නාමලේඛනය, එම දුරකථන සම්බන්ධතාවන් ලබාදීමට නිර්දේශ කිරීමට හේතු සහ ඒ සඳහා ඉල්ලීම් කරන ලද අය කවුරුන්ද යන්න එක් එක් වර්ෂයට අදාළව’ ගනු ලබන පියවර පිළිබඳව දින 14ක් තුළ දන්වා එවන බවය. එය නිකුත් කරන්නේ ආරක්ෂක අමාත්‍යාංශයේ තොරතුරු නිලධාරී බි‍්‍රගේඩියර් උපාලි වීරසිංහගේ අත්සන සහිතවය.

ඉන්පසු ආරක්ෂක අමාත්‍යාංශයේ තොරතුරු නිලධාරී බි‍්‍රගේඩියර් උපාලි වීරසිංහගෙන් ලැබෙන එක් පිළිතුරක් වන්නේ ‘එම ලිපියෙන් අපේක්‍ෂිත CLIR පහසුකම ලබාදෙනු ලබන්නේ මෙයට ඇමතුම ‘‘අ’’ ලෙස ඉදිරිපත් කර ඇති තොරතුරු හොබවන අය වෙත පමණී.’ යන්නය.

අනෙක් පිළිතුර වන්නේ ‘මීට අමතරව ආරක්ෂක ඇමතිතුමා, ආරක්ෂක රාජ්‍ය ඇමතිතුමා, ආරක්ෂක ලේකම්තුමා විසින් විශේෂ නිර්දේශයන් ලබාදී ඇති අයවලූන් කිහිප දෙනෙකු වෙතද මෙම පහසුකම ලබාදී ඇත. එම නාමලේඛනය ලබාදීමට හැකියාවක් නොමැති බව කාරුණිකව දන්වා සිටිමි.’ යන්නය. එම දෙවන කරුණට අදාළව අභියාචනයක් ඉදිරිපත් කර ඇතද, ඊට බොහෝ කල් ගියද තවම පිළිතුරක් ලැබී නැත. දැන් ඒ සඳහා යෑමට ඉතිරිව ඇත්තේ තොරතුරු කොමිසම වෙත පමණය.

දුරකථන ඇමතුමක් ලබාදෙන පුද්ගලයාගේ දුරකථන අංකය දිස්වීමක් නොමැති දුරකථන සබඳතාවන් ලබාදෙන එම අනුමත තනතුරු ආරක්ෂක අමාත්‍යාංශයට අනුව මෙයාකාරය.

ජනාධිපති, අගමැති, කථානායක, අගවිනිසුරු, කැබිනට් අමාත්‍යවරු, විපක්‍ෂ නායක, පළාත් ආණ්ඩුකාරවරු, පළාත් ප‍්‍රධාන අමාත්‍යවරු, කැබිනට් නොවන අමාත්‍යවරු, නියෝජ්‍ය කථානායක, නියෝජ්‍ය අමාත්‍යවරු, නීතිපති, පාර්ලිමේන්තු මංතී‍්‍රවරු, පළාත් සභා සභාපතිවරු සහ පළාත් සභා අමාත්‍යවරු, පළාත් සභා විපක්‍ෂ නායකවරු, ජනාධිපති ලේකම්, අග‍්‍රාමාත්‍ය ලේකම්, කැබිනට් මණ්ඩල ලේකම්, මහ බැංකු අධිපති, කැබිනට් අමාත්‍යාංශ ලේකම්වරු, කැබිනට් නොවන අමාත්‍යංශ ලේකම්වරු, ආරක්ෂක මාණ්ඩලික ප‍්‍රධානී, ති‍්‍රවිධ හමුදාපතිවරු, පොලිස්පති හා විශේෂ කාර්ය බලකායේ ප‍්‍රධානියාය.

ඔබේ ජංගම දුරකථනයට තිරය මත අංකය දිස්නොවන දුරකථන ඇමතුමක් ලැබුණහොත් එම අංකයේ හිමිකරු ඉහත සඳහන් තනතුරුලාභීන්ගෙන් කෙනෙකු විය හැකිය. නොඑසේනම් ආරක්ෂක ඇමතිවරයා වශයෙන් ජනාධිපතිවරයා නිර්දේශ කළ පුද්ගලයෙකු විය හැකිය. නැතහොත් ආරක්ෂක රාජ්‍ය ඇමතිවරයා නිර්දේශ කළ පුද්ගලයෙකු විය හැකිය. එසේත් නැතහොත් ආරක්ෂක අමාත්‍යාංශ ලේකම්වරයා නිර්දේශ කළ පුද්ගලයෙකු විය හැකිය. රට යන අත අනුව ඒ ගැන දැනුවත්ව සිටීම ඒ ආකාරයේ ඇමතුම් ඉදිරියට ලැබීමට නියමිත අයගේ පරෙස්සම සඳහා නම් හොඳය.