ජාතික උරුම, ප්‍රාසාංග කලා හා ග්‍රාමිය කලා ශිල්පී ප්‍රවර්ධන කටයුතු රාජ්‍ය අමාත්‍ය විදුර වික්‍රමනායක

 

 

යෝ ජිත 20 වෙනි සංශෝධනයට ඔබ පක්ෂද?

මම විස්සට විරුද්ධයි.

ඒකට හේතු මොනවාද?

අනෙක් හැමෝම වාගේ විරුද්ධ හේතු නිසාම තමයි මමත් විරුද්ධ. මේ වෙනකොට ශ්‍රේෂ්ඨාධිකරණයේ පෙත්සම් 39 ක් 20 වෙනි සංශෝධනයට විරුද්ධව ගොනු වෙලා තියෙනවානේ. අපි බලමු අධිකරණ තීන්දුව ලැබෙනකම්. ඉන්පස්සේ අපිට පුළුවන් පාර්ලමේන්තුව ඇතුලේ ඒ පිළිබඳව වාද විවාද කරගන්න. එහිදී මා විවෘතව අදහස් දක්වනවා.

 

ජනාධිපතිවරයා ඇමතිවරුන්ට සහ රාජ්‍ය ඇමතිවරුන්ට මාස හයකින් ඔවුන්ගේ  ආයතනවල වැඩවල ප්‍රගතිය බලන බව කීවා නේද?

මට ලබා දීලා තියෙන අමාත්‍යංශය ගැන නම් කියලා වැඩක් නැහැ. අපට ඇමතිධූර ලබා දෙනවිට ගැසට්  එකකින් ආයතන වෙන්කරලා අමාත්‍යධූර ලබා දුන්නේ. ඒත් සැප්තැම්බර් 25 වැනිදා නිකුත් වුණ ගැසට් එකකින් අපිට දුන්න ආයතනවලින්  එක ආයතනයක් හැලිලා. අපි මුලදී සැලසුම් හදන විට අපට ලබා දීලා තිබුණු සියළු ආයතනවලට ඒකාබද්ධ සැලසුමක් තමයි හැදුවේ. ඒත් දැන් ඒ ආයතනය අත්හැරලා ආපහු මුල සිටම අපිට කටයුතු කරන්න සහ  වැඩ කරන්න සැලසුමක් හදන්න සිදුවෙලා තියෙනවා.

 

ආණ්ඩුවට විරුද්ධව අසත්‍ය ප්‍රකාශ සිදු කරන පුද්ගලයන්ට නීතීය ක්‍රියාත්මක කරන බව ජනාධිපතිවරයා පවසා තිබුණා, මෙවැනි මර්ධනකාරී ක්‍රියා සිදු කිරිම නිසා   මිනිස්සු  තුළ තිබුණ ප්‍රසාදය දැන් අඩුවෙමින් යනවා නේද?

යම් කෙනෙක් හෝ ආණ්ඩුවක් පිළිබඳව තවත් කෙනෙක් අසත්‍ය ප්‍රකාශයක් සිදු කළහොත් අනිවාර්යයෙන්ම ඒ පුද්ලයාව අත්අඩංගුවට ගෙන ඔහුට දඩුවම් ලබා දිය යුතුයි. ඒ අසත්‍ය ප්‍රකාශවලින් මිනිස්සුන්ට හානියක් සිදු වෙනවා.

 

කෑලෑ විනාශ කළා යැයි බොරු ප්‍රචාර ගෙන යන පුද්ගලයන්ට විරුද්ධව නීතිය ක්‍රියාත්ම කරන බව ජනාධිපතිවරයා පවසලා තිබුණා, වත්මන් ආණ්ඩුව බලයට පත්වු අවස්ථාවේ සිට මේ වෙනතෙක් කැලෑ හානියක් සිදු කර නැතිද?

කොයි ආණ්ඩුවක් යටතේ හෝ  පරිසරය විනාශ විය යුතු නැහැ. පරිසර විප්ලවයක් මේ රටේ සිදුවෙන්න නම් අනිවාර්යයෙන්ම පරිසරය සංරක්ෂණය කළ යුතුයි. රජය  මැදිහත් වෙන්න ඕනෑ පරිසරය ආරක්ෂා කරගන්නට. සංවර්ධනයට මුවා වෙලා  පරිසරය විනාශ කරනවා. අපේ රටේ තියෙන බිම් ප්‍රමාණය ප්‍රමාණවත් රටේ මිනිස්සුන්ට වවාගෙන කන්න. කෘෂිකර්ම ආමාත්‍යංශයේ ගණන් හිලව් අනුව ගණන් කරලා බැලුවහොත්   වසරකදී රටේ ආහාර අතිරික්තයක් ඉතිරි වෙනවා. ඒ නිසා අනවශ්‍ය දේවල්වලට පරිසරය යොදා ගන්නේ නැතිව අවශ්‍ය දේවල්වලට විතරක් ප්‍රයෝජනයට ගන්න ඕනෑ. ආණ්ඩුව යම් කිසි අවස්ථාවක රටේ ප්‍රයෝජනය සදහා වැඩ පිළිවෙළක් දියත් කරද්දී, ඒ වැඩපිළිවෙළ පිළිබඳව හිතාමතා අසත්‍ය ප්‍රකාශ කරනවා නම් ඒක වරදක්. එතනදී අපි බලන්නේ භාෂණයේ නිදහස නෙවෙයි. සමහර රටවල්වල පුද්ගලයන් කියන්නේ අපේ රටේ පුදුම නිදහසක් තියෙන බව. ඕනෑම කෙනෙකුට තුවක්කු වුණත් මිලදී ගන්න අපිට නිදහස තියෙනවා කියලා ඔවුන් කියනවා. ඒත්  ඒ තුවක්කුවලින් වෙඩි තියලා මැරෙන මනුස්සයාගේ ජීවිතවලට වගකිවයුත්තෙක් නැතිව යනවා. විවේචනය කරන විට කරුණු මත පදනම් වී විවේචනය කරනවා නම් ඒවාට අපිට විරුද්ධ වෙන්න බැහැ. අපි එකඟ නැහැ කරුණු මත පදනම් වෙලා ආණ්ඩුව හෝ වෙනත් කණ්ඩායමක ක්‍රියාවක් විවේචනය කරන කෙනෙක්ව අත්අඩංගුවට ගන්නවාට අපි විරුද්ධයි. රටක ඉදිරි ගමනට විවේචනය  අත්‍යවශයි.

 

කුළුබඩු අනායනය කිරීම එක්වරම තහනම් කළ නිසා මේ වෙනකොට කහ ඇතුළු කුළුබඩු ගණනාවක් වෙළඳපොලේ නැති තත්වයක් උදාවෙලා තියෙනවා…

රටකට අවශ්‍ය බඩු භාණ්ඩ ආදීය කාලයක් තිස්සේ සිට වෙනත් රටවලින් ගෙන්වීම් සිදු කළා නම්, ඒ  දේවල්වලට රට ඇතුලේ ඒ භාණ්ඩ නිෂ්පාදනය කිරීමට අවශ්‍ය විසඳුමක් ලබාගෙන තමයි තහනම කරන්න  තිබුණේ. ඒත් රජය තහනම් කළාට පස්සේ ඒවාවලට විසඳුම් හොයන්න පටන් අරන් තිබුණේ. ඇයි අපිට බැරි පිටිකිරි සහ  කිරි ආශ්‍රිත නිෂ්පාදන ආනායනය කරන එක නවත්වලා, ලංකාවේ ඒ නිෂ්පාදන සිදු කරන්න. ඒත් ඔවුන් ජනතාවට  කියන්නේ කහ කන්න නම් ලබන අවුරුද්දේ ජනවාරි වෙනකම් ඉවසන්න කියලා.

 

මූඩීස් ශේණිගත කිරීම්වලින් ලංකාව පහළ ගිහින්, රටේ ආර්ථික නඟා සිටුවන්න ආණ්ඩුවේ ඉදිරි වැඩපිළිවෙළ මොනවාද?

අපේ රටේ නිෂ්පාදනය ආර්ථිකයක් නැහැ. මේ තරම් කාලයක් අපි කළේ රටට අවශ්‍ය සියළුම දේවල් පිටරටවල්වලින් ගෙනත් රටේ මිනිස්සුන්ට විකුණපු එක. මේ තරම් කාලයක් අපිට තිබුණේ තැරුව්කාර ආර්ථිකයක්. මේක උත්පාදන ආර්ථිකයක් බවට පත් කරන්න නම් කෘෂිකර්මය, කර්මාන්ත සහ ඊට අදාල ක්ෂේත්‍රවල නිෂ්පාදනයන් සිදු වෙන්න ඔනෑ. ඒ වගේම අපේ ආකල්ප  වෙනස් වෙන්න ඕනෑ. අපි කුඩා කාලයේ අපිට වැඩිහිටියෝ කීවේ සියරට දේ සිරිසැප දේ කියලා. ඒත් 1977 පස්සේ අපිට  පිටරට දේ සිරි සැපදේ වුණා. ඒ සියල්ලම වෙනස් වෙන්න ඕනෑ. වැඩපිළිවෙල තුළ රටේ ජනතාව සමඟ එකතු වෙලා ආර්ථිකය ගොඩනගන්න ක්‍රමවේදයක් සකස් කරන්න ඕනෑ. ඒක දේශපාලනමය වශයෙන් සහ සමාජීය වශයෙන් රටේ ආර්ථිකය ගොඩනගන්න ලොකු උදව්වක් වෙනවා.

රටේ දූෂණය තිබෙන තාක් කල් ආර්ථිකය ගොඩනගන්න පුළුවන්ද?

රටේ දූෂණය සහ මුදල් නාස්තිය අවම කල යුතුයි. රටේ සංවර්ධනයට තිබෙන  මහා විශාල මුදල් ප්‍රමාණයක් පාලකයන්ගේ සහ නිලධාරීන්ගේ දුෂණය, වංචාව සහ මුදල් නාස්තිය නිසා රටට අහිමි වෙනවා. අපිට පුළුවන් නම් මේ දේවල් අවම කරගන්න, රජයක් විදියට අපිට ලොකු ජයග්‍රහණයක් ලබා ගන්න  පුළුවන්. දැවැන්ත ව්‍යාපරවලින් පමණයි ආර්ථිකය ශක්තිමත් වෙන්නේ කියලා රටේ මතයක් තියෙනවා. ඇත්තමට මේ විශ්වාසය සම්පූර්ණයෙන්ම වැරදියි. සුළු ව්‍යාපාර සහ ග්‍රාමීය  ව්‍යාපාර දියුණු කළහොත් අපිට ලොකු ආර්ථික වාසියක් ලබා ගන්න පුළුවන්. කෘෂි කර්මාන්තය, වැවිලි කර්මාන්ත සහ අනෙකුත් කුඩා ව්‍යාපාර අපි හැමවිටම අත්හැරලා කතා කරනවා. අපේ රටේ විශාල ස්වභාවික සම්පත් තියෙනවා. ඒත් අපි ඒ සියල්ලම සම්පත් තිබුණත් අපි ඒවායෙන්  ප්‍රයෝජන ගන්නේ නැහැ. ඒ වගේම මැණික්, වැලි වගේ සම්පත් අපි දූෂිත විදියට පාවිච්චි කරනවා. ඒ නිසා රජයට එයින් ලැබිය යුතු බදු මුදල් ලැබෙන්නේ නැහැ.මේ සියල්ලටම අපි නීතී දමා ක්‍රමනුකූලව කළ යුතුයි.■