23.4 C
Sri Lanka
14 August,2022

වෙඩි නොතැබීම නිසා කිපුණු වැ.බ. ජනාධිපති

Must read

■ හමුදාවේ වෙඩි තැබීම් යාවත්කාලීන වී නැත
■ ජුලි 09 වෙඩි තැබීම ගැන පරීක්ෂණද නැත

වැ.බ. ජනාධිපතිවරයා මෙන්ම ජනාධිපතිවරයාද යටතේ දිනපතාම වාගේ අපට අසන්නට දකින්නට ලැබෙන්නේ හදිසි නීතිය ප්‍රකාශයට පත්කිරීම, ඇඳිරි නීතිය පැනවීම, හමුදාවට වෙඩි තියන්නට නියෝග ලබාදීම, පැසිස්ට්වාදීන්ට එරෙහිව කටයුතු කිරීම, අනුප්‍රාප්තික ජනාධිපතිවරයා තෝරා ගැනීමේ ඡන්දයේදී පාර්ලිමේන්තු මන්ත්‍රීවරුන්ට බලපෑම් කරන අයට එරෙහිව කටයුතු කරන ලෙස පොලීසියට නියෝග ලබාදීම ආදි මිලිටරිමය හා ඒකාධිපති නියෝගයන්ය.


එම නියෝගයන් අතර පසුගිය දිනවල වඩාත් කතාබහට ලක්වූ බි්‍රගේඩියර් අනිල් සෝමවීරගේ සේවය අත්හිටුවා ඇති බවට සමාජ මාධ්‍ය ඔස්සේ පැතිර යන කතාවල සත්‍යතාවක් නැති බව හමුදා මාධ්‍ය ප්‍රකාශක බි්‍රගේඩියර් නිලන්ත ප්‍රේමරත්න මාධ්‍යයට ප්‍රකාශ කර ඇත. එමෙන්ම ඒ සම්බන්ධයෙන් ඔහු වැඩිදුරටත් ප්‍රකාශ කර ඇත්තේ බි්‍රගේඩියර් සෝමරත්න වෙනත් තනතුරක රාජකාරී කටයුතු සඳහා යුද හමුදා මූලස්ථානයට කැඳවා ඇති බවයි.


ජුලි 13 වැනිදා විරෝධතාකරුවන් අගමැති කාර්යාලය අල්ලා ගන්නා අවස්ථාවේදී එම ස්ථානයේ හමුදා කණ්ඩ බාරව සිටියේ 112 වැනි බලසේනාධිපති බි්‍රගේඩියර් අමල් සෝමරත්නය. ඔහු හා අරගලකරුවන් අතර එම අවස්ථාවේ සිදුවන කතාබහකට අදාල වීඩියෝවක් සමාජ මාධ්‍යවල මුලින්ම සංසරණය විය. එම වීඩියෝ පටයේ දැක්වෙන්නේ විරෝධතාකරුවන්ට කඳුළු ගෑස්, ජල ප්‍රහාර හා වෙඩි තැබීම් නොකරන බවට හා රාජ්‍ය දේපල විනාශ කිරීමකින් තොරව විරෝධතාකරුවන්ගේ අරගලය කරගෙන යන ලෙසට බි්‍රගේඩියර්වරයා කරන ප්‍රකාශයකි.


අගමැති කාර්යාලය අල්ලා ගන්නා අවස්ථාවේදී වැ.බ. ජනාධිපති වීමට ප්‍රථම වැඩ ආවරණය කිරීමේ ජනාධිපති වශයෙන් තමන්වම නම් කරගනිමින් රනිල් වික්‍රමසිංහ හදිසි නීතිය ප්‍රකාශයට පත්කරමින් හා බස්නාහිර පළාතට නැවත දැනුම් දෙනතුරු ඇඳිරි නීතිය පනවා තිබුණි. (රටින් බැහැරව සිටින බැවින් ජනාධිපති ධුරයේ වැඩ ආවරණය කිරීම අගමැතිවරයාට පැවරූ බව කතානායකවරයා නිවේදනය කරනු ලැබුයේ ඊට පසුය)


බි්‍රගේඩියර් අනිල් සෝමසිරිගේ සහ ලුතිනන් කර්නල් පීඑච්ජීපී ගුණවර්ධන යන හමුදා නිලධාරීන්ගේ සේවය අත්හිටුවා ඇති බවට සමාජ මාධ්‍යවල වාර්තා පළවූයේ නැත. ඒවායේ වාර්තා පළවූයේ එම නිලධාරීන් දෙදෙනා ඔවුන් දැරූ රාජකාරී වගකීම්වලින් ඉවත් කර ඇති බවය. යුද හමුදා මාධ්‍ය ප්‍රකාශකවරයා මේ සම්බන්ධයෙන් මාධ්‍යයට කර ඇති ප්‍රකාශයෙන්ද ඒ බව සනාථ වේ. ලියුම්කරු ෆේස්බුක් සමාජ මාධ්‍යය උපයෝගි කරගනිමින් එම තීරණයන් පළමුව වාර්තා කරනු ලැබුයේ ‘රනිල්ගේ පළමු තීරණය’, ‘රනිල්ගේ පළමු තීරණයේ සබැඳියාව’ හා ‘රනිල්ගේ පළමු තීරණයේ සබැඳියාව 2’ වශයෙන් අප පුවත්පත මුද්‍රණය නොවන බැවින් එම තොරතුරු ඉක්මණින් ජනතාව දැනගත යුතු බැවිනි. එම තීරණයන් ලෙස වාර්තා කරනු ලැබුයේ අගමැති කාර්යාලය විරෝධතාකරුවන් අත්පත් කරගැනීමට ප්‍රථම විරෝධතාකරුවන් හා බි්‍රගේඩියර් සෝමසිරි අතර සිදුවන සංවාදයකට අදාල සමාජ මාධ්‍ය ජාලාවල සංසරණය වූ වීඩියෝවක් හේතුවෙන් ඔවුන්ව රාජකාරිවලින් ඉවත් කර ඇති බවය. ඉහත සඳහන් කළ නිලධාරීන් දෙදෙනාට අමතරව එම තීරණ ප්‍රශ්න කළ යුද සේවා ලේකම් මේජර් ජෙනරාල් චන්දන වික්‍රමසිංහද තනතුරෙන් ඉවත් කර ඇති බව ලියුම්කරු සිය ෆේස්බුක් ගිණුම ඔස්සේ වාර්තා කළේය.


ඇත්ත වශයෙන්ම විරෝධතාකරුවන් අනවශ්‍ය ලෙස කෝප නොගන්නවමින් බි්‍රගේඩියර්වරයා සිදුකරන්නේ ඥානාන්විත කටයුත්තකි. ජුලි 13 දින අගමැති කාර්යාලය අසලට පැමිණි මහා ජනගඟ සමඟ ගත්කල එහි සිටි හමුදාවට හෝ පොලිස් විශේෂ කාර්ය බලකායට එම ජනතාව නැවැත්වීමේ හැකියාවක් ලැබෙන්නේ නැත. ඊට පෙර ජුලි 09 දින ජනාධිපති මන්දිරය අත්පත් කර ගැනීමේ ක්‍රියාවලියේදීද බිත්තිවලට වෙඩි තබා විරෝධතාකරුවන් නැවැත්වීමේ හැකියාවක් ලැබුණේ නැති බව ප්‍රායෝගිකව එම හමුදා නිළධාරීන් තේරුම් ගන්නට ඇත.


මෙම හමුදා නිලධාරීන්ව රාජකාරි කටයුතුවලින් ඉවත් කිරීමෙන් එම දිනයේ වැඩබලන ජනාධිපති ලෙස තමාවම නම්කර ගත් රනිල් වික්‍රමසිංහ පෙන්නුම් කර ඇත්තේ වෙඩි නොතැබීම වරදක් බව හා විරෝධතාකරුවන්ට වෙඩි තැබිය යුතුය යන්න ඔහුගේ නියෝගය බවය. මේ වූකලී මේ වනවිට ජනතාවගෙන් ප්‍රතික්ෂේප වී රටින් පලාගොස් සිටින හැටනව ලක්ෂයක ඡන්දයක් ලබාගත් හිටපු ජනාධිපති ගෝඨාභය රාජපක්ෂද ජනාධිපති මන්දිරය, ජනාධිපති ලේකම් කාර්යාලය හා අරලියගහ මන්දිරය අරගලකරුවන් අත්පත්කරගත් ජුලි 09 දාවත් එම උත්සාහයන් වැළැක්වීම සඳහා අත්හදා බලන්නට උත්සාහ ගත් තත්වයක් නොවේ. එදින ජනාධිපති ගෝඨාභය රාජපක්ෂ හදිසි නීතිය ප්‍රකාශයට පත්කර ඇඳිරි නීතිය පනවන්නට උත්සාහ කළේ නැත. ඒ අනුව අපට පෙන්නුම් කර ඇත්තේ වෙන කිසිවක් නොව කිසිදු ජනවරමක් නැති ඔහුගේ පක්ෂයට ලැබුණු එකම ජාතික ලැයිස්තු මන්ත්‍රී ධුරය වසරකට අධික කාලයක් හිස්කර තබාගනිමින් ඒ සඳහා පත්වී පැමිණ හොර පාරෙන් අගමැති ධුරය ලබාගත් රනිල් වික්‍රමසිංහගේ සැබෑ ස්වරූපයයි.


මෙම සිදුවීම් එසේ සිදුවද්දී ජුලි 16 වැනිදාද විරෝධතා සම්බන්ධයෙන් තවත් සිදුවීමක් සිදුවී තිබුණි. ඒ අකුරේගොඩ යුද හමුදා මූලස්ථානයේදීය. ආරක්ෂක අමාත්‍යාංශයේ ලේකම් විශ්‍රාමික මේජර් ජෙනරාල් කමල් ගුණරත්න එදින කොළඹ ප්‍රදේශය භාර යුද හමුදා බලසේනාධිපතිවරුන් සහ සේනාංකාධිපතිවරුන් ගෙන්වා විරෝධතා මැඩපවත්වන්නේ කෙසේද යන්න සම්බන්ධයෙන් උපදෙස් ලබාදී තිබුණි. එහි තේරුම වී තිබුණේද ඉදිරි විරෝධතාවලදී විරෝධතාකරුවන් පාලනය කිරීම සඳහා කෙසේ කටයුතු කළ යුතුද යන්න උපදෙස් ලබාදීමය. හදිසි නීතිය ප්‍රකාශයට පත්කර වෙඩි තැබීමේ නියෝගත් හමුදාවට ලැබී ඇති නිසා සමහරවිට විරෝධතා සම්බන්ධයෙන් වෙනස් තත්වයන් අපට දැකගැනීමට හැකිවනු ඇත.


නමුත් ආරක්ෂක අමාත්‍යාංශයේ ලේකම්වරයාගේ විරෝධතා මැඩ පැවැත්වීමේ උපදෙස් ලබාදීම සම්බන්ධයෙන් වන ප්‍රශ්න සහගත කරුණ වන්නේ හිටපු හමුදා නිළධාරියකු වුවද ඔහු දැන් අමාත්‍යාංශ ලේකම් යන පරිපාලන නිළධාරියකු වීමය. එවැන්නකුට හමුදා නිළධාරීන්ට විරෝධතා මැඩ පැවැත්වීම සම්බන්ධයෙන් උපදෙස් දෙන්නට බැරිය. එමෙන්ම යුද හමුදාවේ ප්‍රධානියා වන යුද හමුදාපතිවරයා මග හරිමින් එහි නිළධාරීන්ට උපදෙස් ලබාදීමේ හැකියාවක්ද නැත. එහෙත් කටයුතු සිදුවන්නේ හා සිදුවී තිබෙන්නේ ඒ ආකාරයටය.


වෙඩි නොතැබීම සම්බන්ධයෙන් එසේ කරුණු කාරණා සිදුවද්දී ජුලි 09 වැනිදා ජනාධිපති මන්දිරය විරෝධතාකරුවන් අල්ලා ගැනීමේ සිදුවීමේදී නම් ජීව උණ්ඩවලින් වෙඩි තැබීමක් සිදුවිය. වැ.බ. ජනාධිපති රනිල් වික්‍රමසිංහගේ අවධානය ඒ කෙරෙහි යොමුවී ඉහත සඳහන් තීන්දු තීරණ ගත්තාදැයි සැක කළ යුතුය. රට තුළ හදිසි නීතිය හා ඇඳිරි නීතිය නැති තත්වය තුළ වෙඩි තිබ්බා නම් හදිසි නීතියද ඇඳිරි නීතියද තමා ප්‍රකාශයට පත්කර ඇති තත්වය තුළ ජුලි 13 වැනිදා වෙඩි නොතැබුවේ ඇයිදැයි ඔහුට යම් මහන්තත්වයක් ඇති වන්නට ඇත.


විරෝධතාකරුවන්ට ජුලි 09 වැනිදා හමුදාව වෙඩි තැබීම පිළිබඳ සමාජ මාධ්‍ය ඔස්සේ ප්‍රචාරය වූ වීඩියෝපට ගැන කරුණු පැහැදිලි කරමින් යුද හමුදාව ජුලි 10 දින මාධ්‍ය නිවේදනයක් නිකුත් කරනු ලැබූ අතර එහි සඳහන් වූයේ මෙවැන්නකි.


‘කොළඹ කොටුව ජනාධිපති මන්දිරයට සෙනසුරාදා (09) දින බලහත්කාරයෙන් ඇතුළුවීමට උත්සාහ දැරූ විරෝධතාකරුවන්ට යුද්ධ හමුදා භට පිරිස් හිතාමතා හානි කිරීමේ අරමුණින් වෙඩි තැබූ බවට ප්‍රචාරය වන වීඩියෝ පට කිහිපයක් සම්බන්ධව ශ්‍රී ලංකා යුද්ධ හමුදාවේ අවධානය යොමුව ඇත.


විරෝධතාකරුවන් ඉලක්කකොට වෙඩි තැබූ බව පවසන මෙම සමාජ මාධ්‍ය පුවත් යුද්ධ හමුදාව තරයේ ප්‍රතික්ෂේප කරන අතර විරෝධතාකරුවන් එම පරිශ්‍රය වෙත ඇතුළුවීම වැළැක්වීම උදෙසා අහසට මෙන්ම ජනාධිපති මන්දිරයට ඇතුළුවන ප්‍රධාන ගේට්ටුවේ පැති බැම්මට වෙඩි ප්‍රහාර කිහිපයක් තැබීමට යුද්ධ හමුදාවට සිදුවිය.


අහසට වෙඩි තැබීම සහ ගේට්ටු පැති බැම්මට වෙඩි තැබීම වළක්වාලීමේ උපක්‍රමයක් ලෙස භාවිත කළ අතර එය කිසිසේත්ම විරෝධතාකරුවන්ට ශාරීරික හානියක් සිදුකිරීම සඳහා ගත් පියවරක් නොවන බව යුද්ධ හමුදාව අවධාරණය කර සිටියි.’


මෙම නිවේදනයේ අවධාරණය කර ඇති පණිඩිඩය වන්නේ විරෝධතාකරුවන්ට ශාරීරික හානි කිරීමේ අදහසින් එම වෙඩි තැබීම් සිදුනොකළ බව හා අහසට හා බිත්තිවලට එස වෙඩි තැබීම් සිදුකළේ විරෝධතාකරුවන් ජනාධිපති මන්දිරයට ඇතුළුවීම වළක්වාලීමේ උපක්‍රමයක් වශයෙන් යන්නය. වෙඩි නොතැබීම හෝ වෙඩි නොතියන බව කීම නිසා දැඩි කෝපයට පත්වී සිටින වැ.බ. ජනාධිපති (පසුව ජනාධිපති) රනිල් වික්‍රමසිංහ තේරුම් ගත යුත්තේ එයය.


එම හමුදා මාධ්‍ය නිවේදනය මගින් එම වෙඩි තැබීම සාධාරණය කර ඇතත් එසේ අහසට හා පැති තාප්පවලට වෙඩි තැබීම මගින් විරෝධතාකරුවන් දෙදෙනෙකුට වෙඩි වැදී තිබූ අතර ඉන් එක් අයෙකුගේ තත්වය බරපතළය. ඒ ඔහුගේ හිසට වෙඩි වැදීම නිසාය. අහසට හා තාප්පයට වෙඩි තබා සිදුවී ඇති දෙය එසේනම් පුද්ගලයින් ඉලක්ක කර වෙඩි තැබුවේ නම් සිදුවිය හැකිව තිබූ තත්වය සිතා ගැනීමට අපහසු නැත.


කෙසේ වෙතත් මෙම වෙඩි තබන දර්ශන දකින විට අපට පෙනෙන්නට තිබෙන දෙය නම් එකකට පසු එකක් ලෙස කොකා ගස්සමින් වෙඩි තබනවා වෙනුවට නොනවත්වා වෙඩි වර්ෂාවක් එල්ල කරන ආකාරයයි. හමුදා සාමාජිකයින් භාවිා කරන මැෂින් තුවක්කුවල වෙඩි තැබීමට සූදානම් කිරීමේ අවස්ථාව ක්‍රම දෙකකට සිදුකරන බව එම සාමාජිකයින්ගේ අදහසයි. එක් අවස්ථාවක් වන්නේ වෙඩි තැබීමේ ටි්‍රගරය හෙවත් කොකා ගස්සන විට එක් වෙඩි උණ්ඩයක් නිකුත් වීමේ අවස්ථාවය. අනෙක් අවස්ථාව වන්නේ කොකා ගස්සන විට එක දිගට වර්ෂාවක් මෙන් වෙඩි උණ්ඩ නිකුත් වීමය. එම අවස්ථාව සඳහා තුවක්කුව විශේෂයෙන් සූදානම් කළ යුතුය. හමුදාවේ අපගේ මූලාශ්‍ර තහවුරු කරන ආකාරයට වෙඩි උණ්ඩ වර්ෂාවක් ලෙස නිකුත් වීමේ එවැනි අවස්ථාවක් සඳහා තුවක්කුවක වෙඩි තැබීමේ සැකසුම් කරන්නේ යම් මුදා ගැනීමේ මෙහෙයුමක් කිරීමේ අවස්ථාවකය. එමෙන්ම ඒ සඳහා විශේෂ අණක් ලැබී තිබිය යුතුය. කොහොමත් වෙඩි තැබීම සඳහා අණ ලැබිය යුතුය.


ඒ අනුව ජුලි 09 වැනිදා කොළඹ කොටුවේ ජනාධිපති මන්දිරය අසල රාජකාරියේ සිටි පිරිසට වෙඩි තැබීමට විශේෂ අණක් ලැබී තිබිය යුතුය. එසේ නොමැතිව හමුදා සාමාජිකයින් විශේෂ ලෙස කෙසේ වෙතත් සාමාන්‍ය ලෙසවත් වෙඩි තබන්නේ නැත.


වෙඩි තැබුවත් බිත්තිවලට හෝ බිමට වෙඩි තැබීමේ හැකියාවක් හමුදාවට නැති බව එහි නිළධාරීන්ගේ අදහසයි. ඔවුන්ට අනුව වෙඩි තබනවා නම් වෙඩි තැබිය යුත්තේ පුද්ගලයින්ටය. එදින එසේ බිත්තිවලට තැබූ වෙඩි නැවත ලිස්සා යෑම හේතුවෙන් විරෝධතාකරුවන් අතර සිටි එක් පුද්ගලයකුගේ හිසට වෙඩි වැදී ඇත. එහෙත් එම වෙඩි තැබීම සම්බන්ධයෙන් මෙතෙක් නීත්‍යනුකූලව සිදුවිය යුතු පටිපාටිය ක්‍රියාත්මක වන ආකාරයක් පෙනෙන්නට නැත. පළමුවෙන්ම යුද හමුදාව පාර්ශ්වයෙන් ඒ ගැන වාර්තා කැඳවිය යුතුය. එකක් වෙඩි තැබුවේ කවුද, කාගේ උපදෙස් මතද, වෙඩි කීයක් තැබුවේද, වෙඩි තැබූ ආයුධ කුමක්ද යන්න කරුණු ඊට ඇතුළත්ය. පොලීසිය පාර්ශ්වයෙන්ද වෙඩි තැබූ ස්ථානයට මහේස්ත්‍රාත්වරයකු කැඳවා පරීක්ෂණයක් කිරීම, වෙඩි වැදුණු ස්ථාන, හිස් පතොරම් කොපු ආදිය ගැන සටහන් මෙන්ම වෙඩි තැබූ යුද හමුදා සාමාජිකයින්ගෙන් මෙන්ම වෙඩි වැදුණු පුද්ගලයින්ගෙන්ද ප්‍රකාශ සටහන් කරගෙන අධිකරණයට වාර්තා කළ යුතුය. එහෙත් එම සිද්ධිය වූ දින සිට මේ දක්වා ඒ සම්බන්ධයෙන් පොලීසිය අධිකරණයට කරුණු වාර්තා කළ බවක් පොලීසිය නිකුත් කළ මාධ්‍ය නිවේදනවල සඳහන් වන්නේ නැත.


අපට ලැබී ඇති තොරතුරු අනුව මෙම වෙඩි තැබීම සඳහා නියෝග ලබාදී ඇත්තේ ශ්‍රී ලංකා යුද හමුදාවේ ප්‍රධාන මාණ්ඩලික ශාඛාවේ අධ්‍යක්ෂ ජනරාල් මේජර් ජෙනරාල් නිශාන්ත මානගේය. ඔහු එම අණ දීමෙන් පසු යුද හමුදා මෙහෙයුම් මැදිරියට පැමිණ එහි සිටියවුන්ට බැණ වැදී ඇත්තේ ඔහුගේ අණ අනුව නිසියාකාරව වෙඩි නොතැබූ බවට දොස් පවරමින්ය. එමෙන්ම ආරක්ෂක මාණ්ඩලික ප්‍රධානී ජෙනරාල් ශවේන්ද්‍ර සිල්වාද යුද හමුදා මෙහෙයුම් මැදිරියට පැමිණ වෙඩි නොතිබ්බේ ඇයිදැයි අසමින් බැණ වැදී ඇත.


එම ඉහළ නිළධාරීන් මෙන්ම වැ.බ. ජනාධිපතිවරයාද වෙඩි නොතැබීම ගැන එසේ කෝපයට පත්වී සිටියද යුද හමුදාව පාර්ශ්වයෙන් සැබෑව වන්නේ වසරකට අධික කාලයක් තිස්සේ එහි සාමාජිකයින් ජීව උණ්ඩවලින් වෙඩි තබා සිය වෙඩි තැබීමේ ඉලක්කයන් යාවත්කාලීන කරගෙන නැති බවයි. වාර්ෂිකව නිශ්චිත ජීව උණ්ඩ ප්‍රමාණයක් පාවිච්චි කරමින් ත්‍රිවිධ හමුදා සාමාජිකයින් සෑම අයෙකුම එසේ සිදුකළ යුතු අතර එහිදී එක් එක් හමුදා සාමාජිකයාට හිමි පෞද්ගලික ගිනි අවිය නිවැරදි ඉලක්කයට සකසා ගැනීමද සිදුකළ යුතුය. (එය හමුදා ව්‍යවහාරයේ හැදින්වෙන්නේ ගිනි අවිය සීරෝ කර ගැනීම ලෙසය)


වෙඩි තැබීම සම්බන්ධයෙන් එවැනි යාවත්කාලීන නොවූ ගිනි අවි දරන හමුදා සාමාජිකයින්ගෙන් ඉලක්කයට වෙඩි තැබීමක් අපට ඉදිරියේදී බලාපොරොත්තු විය නොහැකිය. ඔවුන් මිනිසුන්ට තබන වෙඩි තාප්පවලට වැදිය හැකි අතර තාප්පවලට තබන වෙඩි මිනිසුන්ට වැදිය හැකිය.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි