23.4 C
Sri Lanka
14 August,2022

ජූලි 9 මහා ජනතා නැඟිටීම

Must read

■ අමන්දිකා කුරේ

මාර්තු 31 වන දින මිරිහාන ගෝඨාභ්‍ය රාජපක්‍ෂ ජනාධිපතිවරයාගේ නිවස අසලින් ආරම්භ වූ විරෝධතා රැල්ල රට පුරා පැතිර යාමට වැඩි කලක් ගත නොවීය.


එහි ප්‍රතිඵලයක් වශයෙන් අප්‍රේල් 9 වන දින ගාලු මුවදොර පිටියට පැමිණි විරෝධතාකරුවන් එහි කඳවුරු බැඳ විරෝධතා දක්වන්නට ආරම්භ කරන ලදි. එම විරෝධතාවන්ට මාසයක් ගතවන තැන, එනම් මැයි 9 වන දින අරලියගහ මන්දිරයේ පැවති රැස්වීමකට පැමිණි ශ්‍රී ලංකා පොදුජන පෙරමුණේ ආධාරකරුවෝ සහ පාර්ලිමේන්තු මන්ත්‍රීවරු ඇතුළු පිරිසක් ගාලුමුවදොර පිටියට කඩා වැදී අරගලකරුවන්ට අමානුෂික අන්දමින් පහරදී එම කූඩාරම් කඩා බිම දමා ගිනි තැබූහ. එහි ප්‍රතිඵලයක් වශයෙන් එදිනම රට පුරා කෝලාහල තත්ත්වයක් ඇති වූ අතර එම රැස්වීමට සම්බන්ධ වූ පුද්ගලයන් සොයමින් පහර දෙමින් සහ එම රැස්වීමට සෙනඟ රැගෙන ගිය බස්රථ ගිනි තබමින් රට පුරා විවිධ කෝලාහල ඇති විය.


ඒ අනුව එවකට අගමැතිවරයාව සිටි මහින්ද රාජපක්ෂ මහතා එදින සිය ඉල්ලා අස්වීම ජනාධිපතිවරයා වෙත භාර දෙන ලදී. ඉන් දින කිහිපයකට පසුව අගමැති ධුරයට එක්සත් ජාතික පක්ෂයේ නායක රනිල් වික්‍රමසිංහ පත්විය. ජනතා විරෝධතා නොනැවතුණු අතර එහි ප්‍රතිඵලයක් වශයෙන් ජුනි 9 වන දින බැසිල් රාජපක්ෂ මහතා මුදල් අමාත්‍ය ධුරයෙන් ඉල්ලා අස්විය. ඔහු පාර්ලිමේන්තුවෙන් ද ඉල්ලා අස් වූ අතර ඒ වෙනුවට ව්‍යාපාරික ධම්මික පෙරේරා පත් විය. රට පුරා තෙල් අර්බුදයක් මතු වූයේ මෙවන් තත්ත්වයක් තුළ ය. ඉන්ධන පෝලිම් වැඩි වූ අතර ඉන්ධන නෞකාවන් පැමිණීමේ නිශ්චිත දිනයක් ද සඳහන් කළ නොහැකි මට්ටමකට වැටුණි. පොදු ප්‍රවාහන සේවා ද අඩාල වූ අතර පෞද්ගලික වාහනවලට ඉන්ධන ලබා ගැනීම කිසිසේත්ම කළ නොහැක්කක් බවට පත්ව තිබුණි.


ජුලි 9 වන දින ජාතික විරෝධතා දිනයක් ලෙස ප්‍රකාශයට පත්වන්නේ මේ අතරතුරයි. රට පුරාම සිටි ජනයා ඒ සඳහා කොළඹ පැමිණීමට සූදානම් වූහ. එහි පළමු පියවර වශයෙන් අන්තර් විශ්වවිද්‍යාලයීය ශිෂ්‍ය බලමණ්ඩලය විසින් ජූලි 8 වන දින උද්ඝෝෂණයක් ප්‍රකාශයට පත් කළ අතර, එම උද්ඝෝෂණය සඳහා පැමිණි සිසුන් ජුලි 9 වන දින දක්වා ‘නොනිදන රාත්‍රිය’ නමින් විරෝධතාවක් සංවිධානය කිරීමට කටයුතු කර තිබුණි. ජූලි 8 වන දින අන්තර් විශ්ව විද්‍යාලයීය ශිෂ්‍ය බලමණ්ඩලයේ පාගමන කැලණිය විශ්වවිද්‍යාලය අසලින් ආරම්භ වී ලෝක වෙළඳ මධ්‍යස්ථානය අසල මාර්ග බාධකය දක්වා පැමිණුණි. ලෝක වෙළෙඳ මධ්‍යස්ථානය අසල මාර්ග බාධකය වෙත පැමිණි සිසුන් මාර්ග බාධක කඩා බිඳ දැමීමට උත්සාහ කළ අතර පොලීසිය විසින් ජල හා කදුලු ගෑස් ප්‍රහාරයක් එල්ල කරන ලදි. රාත්‍රියේදී පොලිස්පතිවරයා විසින් ඇඳිරි නීතිය පැනවූ අතර කොළඹට ඇතුළුවන නගර සීමාවන් ඉලක්ක කර ගනිමින් මෙම ඇඳිරි නීතිය පනවා තිබුණි. නමුත් සියලුම නීති විශාරදයන්ගේ අදහස වූයේ එම ඇඳිරි නීතිය පැනවීම නීති විරෝධී බවයි. පොලිස්පතිවරයාට ඇඳිරි නීතිය පැනවීමට කිසිදු බලයක් නොමැති බවත් ඇඳිරි නීති පනවන්නේ නම් එය ජනාධිපතිවරයා විසින් පැනවිය යුතු බවත් පෙන්වා දෙන ලදි. කෙසේ වෙතත් එම ඇඳිරි නීතිය පසුදින උදෑසන ඉවත් කර ගැනිණ.


ජනතාව කොළඹ බලා පිටත් වන්නට වූයේ ද ජුලි 8 වන දින සවස් යාමයේ සිටයි. දුර බැහැර ප්‍රදේශවල සිට පැමිණෙන ජනතාව රාත්‍රී දුම්රියවල නැගී පැමිණීම ආරම්භ කර තිබුණි. ලංකා පෞද්ගලික බස් හිමියන්ගේ සංගමයේ සභාපති ගැමුණු විජේරත්න ප්‍රකාශ කළේ උද්ඝෝෂණ පැවැත්වෙන ස්ථාන ආසන්නයේදී සංගමය බස් රථ ධාවනය නොකරන බවයි. එදින රාත්‍රියේම ශ්‍රී ලංකා ගමනාගමන ගමනාගමන මණ්ඩලයේ බස් රථවල වෘත්තීය සමිති ප්‍රකාශ කළේ ඔවුන් වැඩ වර්ජනයක් ක්‍රියාත්මක කරන බවයි. පසුව ජනතා විරෝධය හමුවේ එම වැඩ වර්ජනය හකුලා ගැනීමට එම වෘත්තිය සමිති තීරණය කර තිබුණි.


දුම්රිය ධාවනයද අත්හිටුවන ලෙස ශ්‍රී ලංකා දුම්රිය දෙපාර්තමේන්තුවේ සාමාන්‍යධිකාරි ධම්මික ජයසුන්දර නියම කර තිබුණි. ඒ වන විටත් ගමන් අරඹා තිබු තැපැල් දුම්රිය අතරමගින් නවත්වන ලෙස ඔහුගේ උපදෙස් ලැබී තිබුණ ද දුම්රිය වෘත්තීය සමිති තීරණය කර තිබුණේ ධාවනය ආරම්භ කර ඇති දුම්රිය නොනවත්වා කොළඹ වෙතම රැගෙන එන බවයි. ජුලි 9 වන දින ගාල්ල මාතර ඇතුළු විවිධ ප්‍රදේශවලින් ධාවනය වීමට නියමිතව තිබූ දුම්රිය අවලංගු කර තිබුණද එම දුම්රිය ස්ථානවලට පැමිණ අතිවිශාල මගීන්ගේ බලපෑම හමුවේ වෘත්තීය සමිති තීරණය කළේ දුම්රිය සාමාන්‍යධිකාරීවරයාගේ තීරණය මගහැර දුම්රිය ධාවනය කිරීමටයි. ඒ අනුව අනුරාධපුර මහනුවර ගාල්ල මාතර ඇතුළු බොහෝ ප්‍රදේශවල සිට දුම්රිය රැසක් කොළඹ බලා ධාවනය වූ අතර ඒවායේ අතිවිශාල ජනතාවක් කොළඹ බලා පැමිණියහ.


ජුලි 9 වන දින උදෑසන වන විට පාගමනින්ම බොහෝ පිරිස් කොළඹ පැමිණීමට ගමන් අරඹා තිබූ අතර බොහෝ විට අතරමගදී හමුවන වාහනවලින් ඔවුන් කොළඹ දක්වා රැගෙන පැමිණ තිබුණි. බොහෝ ජනතාව කොළඹ බලා පැමිණීමට තෝරාගෙන තිබුණේ විශාල ලොරි රථයි. උදෑසන 8 පමණ වන විට ලෝක වෙළඳ මධ්‍යස්ථානය අසළ මාර්ග බාධකයට සහ චැතැම් වීදියේ මාර්ග බාධකය අසලටත් කොළඹ කොටුව දුම්රිය ස්ථානය ඉදිරිපිටත්, ගාලුමුවදොරටත් විශාල සෙනගක් එක් රැස් වෙමින් පැවතුණි. පිරිස එක්රැස් වීමත් සමග පිරිස මාර්ග බාධක කඩාබිඳ දැමීමට උත්සාහ කළහ.


උදෑසන 11ට පමණ චැතම් වීදියේ සහ ලෝක වෙළඳ මධ්‍යස්ථානය අසළ මාර්ග බාධක ඉදිරිපිට ජල හා කඳුළු ගෑස් ප්‍රහාරයක් එල්ල වන්නට පටන් ගත්තේය. ජනතාව ගාලුමුවදොර දෙසින් ජනාධිපති ලේකම් කාර්යාලය අසල සහ කිංස්බරි හෝටලය ආසන්නයේ මාර්ග බාධකයක් බිඳ දැමීමට උත්සාහ කරමින් සිටියහ. මෙම මාර්ග බාධක තුනට මෙන් ම අනෙකුත් අතුරු පාරවලටද කඳුළුගෑස් ප්‍රහාර විශාල වශයෙන් එල්ල විය. ලෝක වෙළඳ මධ්‍යස්ථානය අසළ පැවති මාර්ග බාධකය දෙසින් යුද හමුදාවේ කණ්ඩායමක් ගමන් කිරීමට උත්සාහ කිරීමත් සමඟ ඒ අසල යම් නොසන්සුන්තාවක් ද ඇති විය. කෙසේ වෙතත් ජනතාව එම මාර්ග බාධක තුනම බිඳ දැමූ අතර ගාලුමෝදර දෙසින්, ලෝක වෙළඳ මධ්‍යස්ථානය ආසන්නයෙන් හා චැතම් වීදිය දෙසින් පැමිණි ජනතාව ජනාධිපති මන්දිරය ඉදිරිපිට ගේට්ටුව අසලට රැස් වී සිටියහ. එම අවස්ථාවේදී නාවික හමුදා කණ්ඩායම් විසින් ජනතාවට පහරදී තිබුණි.


ඒ සමග වෙඩි තැබීම ආරම්භ විය. පළමුව අහසට වෙඩි තැබූ අතර ඉන්පසුව ජනාධිපති මන්දිරයට ප්‍රවේශ වන තැන පැති බැම්මට වෙඩි තැබීම සිදු කරන ලදි. පැති බැම්මට වෙඩි තැබීම යනු සෘජුවම වැඩි තැබීම වන අතර යම් හෙයකින් සුළු වැරදීමක් සිදු වුවහොත් උද්ඝෝෂකයන්ට සෘජුවම වෙඩි වැදීමට අවදානම තිබුණි. උද්ඝෝෂකයන් වෙඩි තැබීම හමුවේ පසුව බැස්සේ නැති අතර ඔවුන් ප්‍රකාශ කළේ වෙඩි තැබූවද තමන් පසු බැසීමට බලාපොරොත්තු නොවන බවයි. කඳුළුගෑස් ජල ප්‍රහාර ගෑස් ජල ප්‍රහාර වෙඩි ප්‍රහාර හමුවේ කිසිදු උද්ඝෝෂකයකු පලා නොගිය අතර අවසානයේ දී එම ගේට්ටු බිඳ දමා ජනාධිපති මන්දිරය අත්පත් කර ගැනීමට ජනතාව සමත් විය. ජනාධිපති මන්දිරයට ඇතුළු වූ ජනතාව එහි තිබූ ආහාරපාන භුක්ති විඳි අතර ඔවුන්ට කිසි දින විඳීමට නොහැකි සැප සම්පත් සියැසින් බලා පුදුමයට පත් වූහ. ඇතැමුන් පිහිනුම් තටාකයේ ස්නානය කිරීමට පෙළඹී තිබුණි. ජනාධිපතිවරයාගේ නිල කාමරයට ද ඔවුහු ඇතුළු වූහ. මේ වන විට හමුදාව සහ පොලිසිය පසු බැස තිබුණි. අනෙක් පසින් ජනාධිපති ලේකම් කාර්යාලය අත්පත් කර ගැනීමට ද උද්ඝෝෂකයන් සමත්වී තිබුණි. තවත් කණ්ඩායමක් අරලියගහ මන්දිරය ද අත්පත් කර ගත්හ. ජුලි 9 වන දින දහවල් එකත් දෙකත් අතර කාලය තුළ මෙම ස්ථාන තුනම ජනතා විසින් අල්ලාගෙන තිබුණි. ඒ වන විටත් ජනතාව නොනැවතී කොළඹට පැමිණෙමින් තිබූ අතර පැමිණි පිරිස ලක්ෂ විස්සකට ආසන්න බව විචාරකයන් පවසා තිබුණි. ජනතාව එම ස්ථාන අත්පත් කර ගැනීමේදී එම ස්ථානවලට යම් යම් හානි සිදුවී තිබුණි.
එදින සවස විශේෂ පක්ෂ නායක රැස්වීමක් කැඳවා තිබූ අතර අගමැතිවරයා කැඳවා තිබීම හේතුවෙන් විපක්ෂයේ පක්ෂ එයට සම්බන්ධ වීම පළමුව ප්‍රතික්ෂේප කරන ලදි. පසුව එම රැස්වීම කතානායකවරයා කැඳවීමත් සමඟ විපක්ෂයේ පක්ෂ ඒ සඳහා සම්බන්ධ විය. එහිදී පක්ෂ නායකයන්ගේ තීරණය වී තිබුණේ මෙම තත්වය පාලනය කිරීමට නම් ජනාධිපතිවරයා ඉල්ලා අස්විය යුතු බවයි. අගමැතිවරයාද සිය තනතුරින් ඉල්ලා අස්විය යුතු බව එම රැස්වීමේදී සාකච්ඡා වී තිබුණි. රැස්වීම පැවැත්වෙන අතරවාරයේදී කතානායකවරයා විසින් එම තීරණය ජනාධිපතිවරයාට දන්වන ලදි. පසුව කතානායකවරයා විසින් මාධ්‍යට ප්‍රකාශ කළේ ජනාධිපතිවරයා ඉල්ලා අස් වීමට බලාපොරොත්තු වන බවත් ජූලි 13 වන දින ඊට අදාළ ලිපිය යොමු කරන බවත්ය. අන්තර්වාර සර්වපාක්ෂික ආණ්ඩුවක් පිහිටුවීමත් සමග තමා ද ධුරයෙන් ඉවත්වන බවට රනිල් වික්‍රමසිංහ මහතා ප්‍රකාශ කළේය.


අග්‍රමාත්‍ය රනිල් වික්‍රමසිංහගේ පෞද්ගලික නිවස පිහිටි කොළඹ 7, පස්වැනි පටුමග ආසන්නයේදී විරෝධතාවක් ආරම්භ වී තිබූ අතර ඒ තත්ත්වය සැලවීමත් සමග ජනතාව ඒ දෙසට ඇදී යන්නට වූහ. ඒ සමඟ මෙම ස්ථානයට පැමිණි කලහකාරී කණ්ඩායමක් විසින් අග්‍රාමාත්‍යවරයාගේ පෞද්ගලික නිවස ගිනි තැබීමට කටයුතු කර තිබුණි. නිවස ගිනිගෙන සම්පූර්ණයෙන්ම විනාශයට පත්විය.


ජුලි 9 වන දින සිට ජනතාව මෙම අත්පත්කරගත් මන්දිර නැරඹීමට වැලනොකැඩී පැමිණියහ. මේ නිසාම මෙම ස්ථානවලට විශාල හානි ද සිදු වී තිබුණි. ජනාධිපති මන්දිරය ලන්දේසි සමයේ නිර්මාණය කර තිබූවක් වන අතර එහි ඉහළ මාලය හෙවත් සොල්දරය සම්පූර්ණයෙන්ම නිර්මාණය කර තිබෙන්නේ ලීවලිනි. පිරිසගේ අධික බර දරාගැනීමට නොහැකි නිසාම සොල්දරය කඩා වැටීමට ආසන්න වූ අතර ඒ අනුව විරෝධතාකරුවන් සොල්දරය නැගීමට නැරඹීමට පැමිණි ජනතාවට ඉඩ දුන්නේ නැත. පුරාවිද්‍යා දෙපාර්තමේන්තුව එම ස්ථානය පුරාවිද්‍යාත්මක ස්ථානයක් ලෙස නම් කළ අතර, මීට පෙර පුරාවිද්‍යා දෙපාර්තමේන්තුව එසේ නම් කිරීමට අවසර ඉල්ලා සිටියද ජනාධිපතිවරුන් අවසර ලබාදී තිබුණේ නැත.


ජූලි 13 වන දින ජනාධිපතිවරයාගේ ඉල්ලා අස්වීම බලාපොරොත්තුවෙන් ද විශාල ජනතාවක් කොළඹ පැමිණ තිබුණි. ඉල්ලා අස්වීම ප්‍රමාද වීමත් සමඟ ජනතාව කොළඹ 7 මල් පාරේ, අගමැති කාර්යාලය වෙත ගොස් එය අත්පත් කරගත්හ. ජූලි 13 වන දින ද විශාල කඳුළු ගෑස් ප්‍රහාරයක් එල්ල වී තිබූ අතර තරුණයෙකු මිය ගොස් තිබුණි. ජුලි 9 වන දින ද දෙදෙනෙකුට වෙඩි වැදී තිබුණි. ඔවුහු තවමත් රෝහල්ගතව ප්‍රතිකාර ලබති. ජූලි 13 වන දින එල්ල කළ කඳුළුගෑස් අතර කල් ඉකුත් වූ කඳුළුගෑස් පවතින බව නිරීක්ෂණය විය. ඒ පිළිබඳව පාර්ශ්ව කිහිපයක් ශ්‍රී ලංකා මානව හිමිකම් කොමිෂන් සභාවට ද පැමිණිලි කර තිබේ.


මෙම දින කිහිපය පුරාම ඇඳිරි නීතිය වරින් වර ක්‍රියාත්මක විය. ජූනි 14 වන දින තමන් අත්පත් කරගත් මන්දිර යළි රජයට භාර දීමට විරෝධතාකරුවන් තීරණය කර තිබුණි. ඒ අනුව ජනාධිපති මන්දිරය, අගමැති කාර්යාලය, හා අරලියගහ මන්දිරයෙන් විරෝධතාකරුවෝ ඉවත් වූහ. ජනාධිපති ලේකම් කාර්යාලයේ ඇතුළු වන කොටසේ පමණක් තවම විරෝධතාකරුවෝ රැඳීසිටිති.


2022 ජුලි මාසයේ මෙම අරගලය ජාත්‍යන්තර මාධ්‍යවල ප්‍රධාන පුවතක් බවට පත්වී තිබුණි. ප්‍රධාන ජාත්‍යන්තර මාධ්‍ය සියල්ලම පාහේ ජුලි නම වන දින සහ ජුලි 13 වන දින සජීව විකාශයක් ලොව පුරා විකාශය කරන ලදි. ඇතැම් මාධ්‍ය වාර්තා කර තිබුණේ සිය රටේ ආණ්ඩු ද මෙය පාඩමක් කරගත යුතු බවයි. අසල්වැසි ඉන්දියාවේ මාධ්‍ය ද මේ සඳහා විශාල උනන්දුවක් දක්වා තිබූ අතර ශ්‍රී ලංකාවේ උද්ඝෝෂකයන්ට සහාය පළ කරමින් ඉන්දියාවේ විවිධ ප්‍රදේශවල උද්ඝෝෂණ ද පැවැත්වුණි. බොහෝ ජාත්‍යන්තර මාධ්‍ය වාර්තා කර වාර්තා කර තිබූ අන්දමට මේ අතිශය ප්‍රජාතන්ත්‍රවාදී හැරවුම් ලක්ෂ්‍යයකි. කෙසේවෙතත් තවදුරටත් මෙම ප්‍රජාතන්ත්‍රවාදී ජනතා ව්‍යායාමය පවත්වා ගන්නේ කෙසේ ද යන වග බලා ගැනීම ශ්‍රී ලංකාවේ පුරවැසියන් සතු අතිශය වැදගත් වගකීමකි. ජනතාවගේ මේ ප්‍රජාතන්ත්‍රවාදී නැගිටීමෙහි යහපත් ප්‍රතිඵලය ලබා ගැනීමට මහජන නියෝජිතයන්ට ද වගකීමක් ඇති බව අමතක කළ යුතු නැත.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි