23.4 C
Sri Lanka
14 August,2022

අද තෙක් අරගලයේ කතාව

Must read

■ නීතිඥ චන්ද්‍රසිරි සෙනෙවිරත්න


වර්තමාන අරගලය නිර්මාණය වන්නේ ශ්‍රී ලංකාවේ ආර්ථිකය කඩා වැටීමෙන් ඇතිවූ ජන පීඩනය නිසාය. මාර්තු 31 මිරිහානේ ගෝඨාභයගේ පුද්ගලික නිවෙස අසලින් ආරම්භවූ ජනාධිපතිට එරෙහි අරගලය අප්‍රේල් 7 වෙනි දින ලංකාදීප ප්‍රමුඛ පුවත අනුව, ආණ්ඩුවේ මන්ත්‍රින් 41 දෙනෙකු ආණ්ඩුව අත් හැරීමෙන් තුනෙන් දෙකක පාර්ලිමේන්තු ශක්තිය, 117 තෙක් පහළ වැටිණ. ඊට අමතරව, කැබිනට් මණ්ඩලය ඉල්ලා අස්විය. ගෝල්පේස් අරගලගම නිර්මාණය වුණේ මාර්තු 31 සිට අප්‍රේල් 10 වෙනිදා තෙක් රටේ තුළ ඇතිවූ චලනය නිසා මිස අද මහ පාරේ පිනුම් ගසන බංකොලොත් සටන්කාමීන් නිසා නොවන බව කිසිවෙකු අමතක නො කළ යුතුවේ.


පසුගිය අප්‍රේල් මුල් සතියේ ජනාධිපති ගෝඨාභය රාජපක්ෂ තනතුර අතහැර යා යුතු බව සහ පවත්නා ක්‍රමය වෙනස් කළ යුතු බවට, ගෝඨාගෝගම ඒකරාශිවූ ජන අරගලය වචනාර්ථයෙන්ම නිර්පාක්ෂික ව්‍යාපාරයක් ලෙස පෙනී සිටියහ. ආණ්ඩුවේ තුනෙන් දෙක හැලී කැබිනට් මණ්ඩලය ඉවත්ව රාජ්‍ය පාලකයන් උනුන් අතර හුදෙකලා වීම සමහරුන් අද ප්‍රතික්ෂේප කරන පාර්ලිමේන්තු මන්ත්‍රින් ඇති කළ පීඩනය උක්ත අරගලය පෝෂණය කළ බව අමතක නොකළ යුතුවේ. මේ සතියේ ගෙවුණ දවසක කුමාර් ගුණරත්නම් වර්තමාන පාර්ලිමේන්තුවේ 220ක් ඉවත්ව යා යුතු බව කියන්නේ මේවා නො දැන නොවේ. රටේ ප්‍රශ්න සමග අප්‍රේල් මුල් සතියේ පාර්ලිමේන්තුවේ ඇතිවූ එකී චලනය, වල්අලි ගම් වැදී ගොවිතැන් පාථ කර මිනිස් ජිවිත බිලි ගැනීමත් පොහොර හිඟයෙන් කෘෂිකර්මය බිඳ වැටීමත් වන විනාසයත් ඩොලර් හිඟය නිසා අත්‍යවශ්‍ය ඉන්ධන ගෑස් ආදි ද්‍රව්‍ය සැපයීමට පාලකයන් අපොහාසත් වීමත් නිසා ක්‍රමයෙන් මෝදුවූ තත්වය පුපුරා යාමකි.

අපේ්්‍රල් 9 වෙනිදා ගෝල්පේස් අරගලය ගෝඨා ගෝ ගම නමින් පිළිසිඳ ගන්නේ එසේය. එහි අරමුණ හිතුවක්කාර තීරණ ගත් තනි මිනිසා පළවා හැර පවත්නා විධායක ක්‍රමය අවසන් කිරීමය. ඒ විශිෂ්ට ජන අභිලාෂය චරිත අනවශ්‍යයි ක්‍රමයක් අවශ්‍යයි යනුවෙන් අරගල භූමියේ එක් පුවරුවක සාරාංශ කර තිබිණ. ගෝඨා ගෙදර යා යුතුය යන අධිෂ්ඨානය පරාජය කොට, නිර්මාණයවූ ජනතා විරෝධය යටපත් කිරීමට පැනවූ හදිසි නීතිය වැනි මර්දනකාරි පිළිවෙත් කඩිනමින් හකුලා ගැනීමට පාලකයන්ට සිදුවිය. ආයුධ සන්නද්ධව විරෝධතා අතරට ගිය ආරක්ෂක හමුදා අවම බලය හෝ යෙදීමට අපොහොසත් වුණා නොවේ. එයින් පිළිබිඹු වුණේ ජනතා පීඩනය කාටත් දැනුණ ආකාරයයි. එකී අරගලය මැඩීමට අධිකරණ නියෝග ලබා දීමට එරෙහිව නීතිඥ ප්‍රජාව ඉදිරියට පැමිණියේත් සටන පොදු අරමුණකින් ශක්තිමත්ව පැවති හේතුවෙනි. කෙටි කලක් තුළ ශ්‍රී ලංකා නීතිඥ සංගමය නිල වශයෙන් ඒ ස්ථාවරය තහවුරු කළාය. රඹුක්කන වෙඩි තැබීමට එරෙහිව කොළඹ සිට කෑගල්ලට ගිය ජ්‍යෙෂ්ඨ නීතිඥයන් එහි දින ගණන් පැලපැදියන්ව කැපවෙමින් අරගලකරුවන් තුළ ඇති කළ ආත්ම විශ්වාසය කිසිවෙකුට බැහැර කළ නො හැකිය. අද අරගලයට උප්පැන්න ලියන කිසිවෙකු එදා අරගලයට වැද්ද ගත්තේ නැත.

මේ පෙළ ගැස්මෙන් හේතුවෙන් තැති ගත් රාජපක්ෂ රෙජිමය මැයි 9 වෙනිදා උදේ අරලියගහ මන්දිරයේදී සිදු කළ කුමන්ත්‍රණය අනුව, ගෝඨාගෝ ගමට පහර දීම රඹුක්කන වෙඩි තැබීමෙන් පසුව වාර්තාවූ බරපතළම සිද්ධිය විය. එතෙක් නිර් දේශපාලනිකව ගලා ගිය එකී ශුද්ධවූ අරගලය ගෝඨාගෝගමදී සජිත් ප්‍රේමදාසට ජවිපෙ ක්‍රියාකාරිකයෙකු පහර දීම නිසා කිළිටි විය. කිසි කෙනෙකු අපේක්ෂා නොකළ ඒ සිද්ධිය එක් දේශපාලන පක්ෂයක් අරගලයට අයිතිවාසිකම් ලියා ගැනීමට තැත් කිරීමක් ලෙස සැලකිණ. මැයි 9 වෙනිදා දිවයින පුරා විසිරී පැවති මිනි මැරීම්, පහරදීම්, ගිනි තැබීම් පාලකයන් එක් දේශපාලන පක්ෂයකට බැර වීමෙන් අරගලයට බරපතළ හානියක් සිදුවිය. ඒ හානිය ආපසු හැරී ජූලි 13 වෙනි දින ගෝඨාගෝගමදී ජවිපෙ වසන්ත සමරසිංහ පළවා හැරීමෙන් පඩිසන් දුන්නේය. අනුර කුමාර දිසානායක පුන පුනා කියන්නේ ජාතික ලැයිස්තුවේ එක් අසුනකට හැකිථණ එජාප නායක රනිල්ට ජන මතයක් නැති බවය. ඒ ප්‍රකාශයද වසන්ත සමරසිංහ පලවා හැරියා මෙන් ආපසු ජවිපෙය හඹා එනවාය. රනිල් ප්‍රතික්ෂේප වීමට සාපේක්ෂව අනුර කුමාර දිසානායක කරන මේ විග්‍රහය, ජවිපෙට ආරෝපණය කළ හැකිය. 2015දී ඡන්ද 543944ක් හෙවත් 4.87%ක ලබා පාර්ලිමේන්තුවේ මන්ත්‍රින් හයක්ව සිටි ජවිපෙය 2020දී ඡන්ද 445958ක් හෙවත් 3.84%ක පාර්ලිමේන්තුවේ මන්ත්‍රින් තුනකට හැකිළී ගොස්ය. ජනතාව ජවිපෙත් උස්සා පොළොවේ ගසා නැතිද? රනිල් අගමැති වුණේ බලෙන් පැනලා නොවේ. විපක්ෂයේ මුලින් සිටි පක්ෂ වගකිමෙන් මගහැර සිටි අවස්ථාවකය.


නැවත අප අරගලයේ විකාශනය වෙත යොමු විය යුතුවේ. මැයි 9 දා මහින්ද රාජපක්ෂ අගමැති ධුරයෙන්ද, ජූනි 9 දා බැසිල් රාජපක්ෂ සිය සක්‍රිය දේශපාලන භූමිකාවෙන්ද ඉවත් විය. අගමැති තනතුරට සඳහා පැවති විවෘත ආරාධනාව විපක්ෂය ප්‍රතික්ෂේප කිරීමත් පාර්ලිමේන්තුවේ තනි මන්ත්‍රිවරයෙකු ලෙස පෙනී සිටි රනිල් වික්‍රමසිංහ රටේ අගමැති වීමත් නිසා ගෝඨාභයට අමතරව රනිල්ද යා යුතු බවට සටන් පාඨය නිර්මාණය විය. රටට ලැබුණ ඉන්ධන ගෑස් වැනි අත්‍යවශ්‍ය ද්‍රව්‍ය බෙදා හැරීමට විධිමත් ක්‍රම වේදයක් හෝ හඳුන්වා නොදීමෙන් පෝලිම්වල ක්ෂණික මරණ ගණනාවක් වාර්තා විය. ලක්ෂ ගණන් ජනතාව සංවිධානාත්මකව ජූලි 9 දා කොළඹට පැමිණ කෙටි කලක් තුළ විධායක ජනාධිපතිගේ නිල නිවෙස සහ ලේකම් කාර්යාලය අත්පත් කර ගැනීමෙන් පසු තමන් ධුරයෙන් ඉවත් වන බවට ප්‍රකාශ කිරීමට ජනාධිපති ගෝඨාභයට සිදුවිය.
සර්ව පාක්ෂික ආණ්ඩුවක් සඳහා තමන් අගමැති තනතුර අත් හරින බවට කළ ප්‍රකාශය විකෘති වී ජනගත වීමෙන් සිය පාරම්පරික පුද්ගලික නිවෙස ගිනි තබා විනාශ කළ බවට චෝදනා කළ අගමැතිවරයා සර්ව පාක්ෂික ආණ්ඩුවකට විපක්ෂය සඳහා විපක්ෂය පෙළ ගැසුණ වහා තමන් අග්‍රාමාත්‍ය තනතුරෙන් ඉවත්වන යළි යළි කියා සිටි. 1993දී ජනාධිපති වරයා මිය යාම හේතුවෙන් ඇතිවූ දේශපාලන රික්තයේදී ව්‍යවස්ථානුකූලව සිදුවූ සිද්ධි මාලාව පසුපස සිටියේ රනිල් වික්‍රමසිංහ බව රහසක් නොවේ. වර්තමානයේ ජනාධිපති තනතුර ඇබෑර්තු වී ඇත. ව්‍යවස්ථාවේ ප්‍රතිපාදන අනුව, අගමැති රනිල් වික්‍රමසිංහ වැඩ බලන ජනාධිපති ලෙස ක්‍රියා කරමින් සිටියි. රටේ අගමැති තනතුර පුරප්පාඩුවී ඇති නිසා අගමැති තනතුර සඳහා කෙනෙකු නම් කරන ලෙස වැඩ බලන ජනාධිපති රනිල් වික්‍රමසිංහ මේ වනවිට කතානායක වරයාට දැනුම් දී හමාරය. දැන් විපක්ෂය සිය සර්ව පාක්ෂක ආණ්ඩුවේ නව අගමැතිවරයා කවුද යන්න වහා දැනුම් දිය යුතුවේ. සජිත්, අනුර කුමාර, පාඨලී පොන්සේකා ආදි කී දෙනෙක්දෝ එය අපේක්ෂා කරති.


මේ විස්තර කරන්නේ ජූලි 13 නෙි දින සවස වනවිට කොළඹ පැවති තත්වයයි. ඒ වනවිට, අරගල කරුවන් අගමැති කාර්යාලය, පාර්ලිමේන්තු පරිශ්‍රය සහ මාධ්‍ය ආයතන වටලමින් සිටින බව මාධ්‍ය කරන්නට විය. ඒ සමග ගෝඨා ගෝ ගම ව්‍යාපාරයේ ප්‍රකට චරිත දවසේ සිද්ධින් පිළිබඳ එකිනෙකට පරස්පර ප්‍රකාශ නිකුත් කළහ. එක් පුද්ගලයෙකු කීවේ බල හුවමාරුවත් සිදුවෙමින් පවත්නා මේ මොහොතේ ඒ සඳහා පැවරුණ පාර්ලිමේන්තුවට බාධා නොකරන ලෙසය. අගමැති සිය කතාවේදී සඳහන් කළ පැසිස්ට් ක්‍රියාකාරකම් උපුටා දැක්වූ තවත් අරගල සගයෙක් කොළඹ විසිරි සිටින සියලු අරගලකරුවන් ගෝල්පේස් වෙත කැඳවීමට උත්සාහ කළහ. ඊට සමගාමීව පෙරටුගාමි ව්‍යාපාරයේ කුමාර ගුණරත්නම් රටේ නීතිය අරගලය බවට ප්‍රකාශ කරමින් සියලු ක්‍රියාකරකම් හකුලා ගන්නා ලෙස කළ විවෘත ප්‍රකාශය රටේ සමස්ත ජනතාව තැති ගැන්වීමට සමත් විය. එය අසා සිටි නීතිඥයෙකු කීවේ මේ ආකාරයෙන් නඩු තීන්දුවක් ප්‍රතික්ෂේප කිරීම තෙක් එකී ප්‍රකාශය සක්‍රිය වුවහොත් එය මහා විනාසයකට මුල් විය හැකි බවය.


13 වෙනිදා රාත්‍රිය වන විටත් පාර්ලිමේන්තුවේ විපක්ෂය රටට සර්ව පාක්ෂික අන්තර් පාලනයක් පිහිටුවීමට රනිල් ඉවත් විය යුතු බවට සජිත් ප්‍රේමදාස නැවත නැවත කීය. එහෙත් විපක්ෂයේ අභිප්‍රායවූ එකී වෑයම සඳහා කැඳවූ කිසිදු සාකච්ඡාවකට ජනතා විමුක්ති පෙරමුණ සහභාගි නොවීමෙන් නිර්මාණය වූ අභ්‍යන්තර ගැටුම නිසා රාජපක්ෂ රෙජිමය පළවා හැරීමට ශක්තිමත්වූ නිර්පාක්ෂික ජනතා ව්‍යාපාරය නන්නත්තාර වූ බවක් පෙනී යයි. කුමාර ගුණරත්නම් වෙනම ගමනක් හුදෙකලා ගමනක් යමින් සිටී. ජනතා විමුක්ති පෙරමුණ තවත් තැනකය. අග්‍රාමාත්‍ය ලේකම් ඉල්ලා සිටි ආකාරයට මේ බල හුවමාරුව විය යුතු ව්‍යවස්ථානුකූල ප්‍රවේශය නීතිපති විසින් ප්‍රකාශයට පත් කර හමාරය. ඒ අනුව, ආණ්ඩුක්‍රම ව්‍යවස්ථාවේ 38(1), 40, 40(1)(ඇ) සමග ජනාධිපතිවරණ පනතේ 3 වගන්තිය උපුටා දක්වමින් ක්‍රියා කළ යුතු බව නීතිපතිගේ ස්ථාවරය විය. ජනාධිපති ධුරයෙන් ඉවත් වූ අවස්ථාවක ආණ්ඩු ක්‍රම ව්‍යවස්ථාවේ 40(1)(ඇ) අනුව අග්‍රාමාත්‍යවරයා වැඩ බලන ජනාධිපති ලෙස වැඩ භාරගත යුතු බව සහ සිය නිලය පාර්ලිමේන්තුවේ බහුතර කැමැත්තෙන් තහවුරු කළ යුතුවේ. එතෙක් තමා දැරූ අගමැති තනතුරට සිය කැබිනට් මණ්ඩලයේ සාමාජිකයෙකු පත් කිරීමේ බලය අගමැති සතු බව එහි දැක්වේ. දැන් සිදුවිය යුත්තේ වහා අගමැතිවරයෙකු පත්ව කැබිනට් ක්‍රමය ක්‍රියාත්මක කිරීමත්, නව ජනාධිපතිවරයා 20වෙනි දින පාර්ලිමේන්තුව විසින් පත් කිරීමත් පමණකි. එහෙත් වචනාර්ථයෙන්ම සර්ව පාක්ෂික පාලනයක් සඳහා සකල විපක්ෂය පෙළ නොගැසීම තුළ නව ජනාධිපති පත් වුවද, නව අගමැති කෙනෙකු පත් කිරීමට විපක්ෂය එකතු වන බවක් නො පෙනේ. රනිල් රටේ වැඩ බලන ජනාධිපතිව ක්‍රියා කරයි. මේ අනුව තවදුරටත් රනිල් රටේ අගමැති නොවන හෙයින් රනිල් අස්වීමේ උවමනාවක් පැන නොනගී. එසේම ජූලි 20 වෙනි දින ජනාධිපති ලෙස පත්වන තැනැත්තා කවරෙක් වුවද, හෙතෙම රටේ පවත්නා මතවාදයකින් නුසුදුස්සෙකු විය හැකි ප්‍රතිපාදන කිසිවක් ආණ්ඩුක්‍රම ව්‍යවස්ථාවේ නොදැක්වේ. නව ජනාධිපතිවරයා ඉවත් කළ හැක්කේ ව්‍යවස්ථාවේ දැක්වෙන ප්‍රතිපාදන අනුව පමණකි.


1993 මැයි 1 වෙනිදා එවකට අගමැති ඩි.බී. විජේතුංග ජනාධිපති වීමත් සභානායක ලෙස ක්‍රියා කළ රනිල් වික්‍රමසිංහ අගමැති ලෙස පත්වීමත් කිසිවෙකු අභියෝග නොකළ ව්‍යවස්ථානුකූල පූර්වාදර්ශයකි. එසේම වැඩ බලන ජනාධිපති ලෙස රනිල් වික්‍රමසිංහ පත්වීමද ව්‍යවස්ථානුකුල වන අතර, දැන් විපක්ෂය අපේක්ෂා කරන ආකාරයට සර්ව පාක්ෂික ආණඩුවක් පිහිටුවා විපක්ෂයේ කෙනෙකුට අගමැති ලෙස දිවුරුම් දීමේ අවස්ථාව උදාවී ඇත. රටේ මූලික අවශ්‍යතා ඉටු කිරීම පිණිස මේ පෙළ ගැස්ම මහත් පහසුවක් වේය යන්න රටේ සාමාන්‍ය ජනතාවගේ අදහසය. එහෙත් උනුන් අතර පවත්නා බල අරගලය කිසිසේත් අහවර වන්නේ නම් නැත. විපක්ෂයේ පක්ෂ අරගලයට මුවා වී ඊළඟ මැතිවරණයට මේ අර්බුදය තම වාසියට යොදා ගන්නේ කෙසේද යන්න කල්පනා කරති. ඔවුන් රටට අවශ්‍ය තෙල් පැට්රල් ගෑස් ඖෂධ ලබා දී රටේ ජන ජීවිතය ඉඩිනමින් යථා තත්වයට පත් කිරීමට අවශ්‍ය උපායන් ගැන කල්පනා නොකරති. කවුරු හෝ මුල්ව ජනතාවට අවශ්‍ය මූලික උවමනා ලබා දුනහොත් එය තමන්ට දේශපාලන ගමනට බාධාවක් වේය යන මුග්ධ කල්පනාවෙන් විපක්ෂ දේශපාලනඥයන් ඔත්පලව සිටිති. රටේ ජනතාවට විසිරුණ අරගලයේ කෑලි එකතු කිරිම නවතා, සතියක් සන්සුන්ව සිටිය හැකි නම්, දරුවන්ට පාසලේ යාමේ අවස්ථා මෙන්ම ජනතාවට සිය ඉපයීමේ මාර්ග යළි ආරම්භ කිරීමට මඟ පෑදෙනු නියතය. බල ලෝභයෙන් අතරමංවූ අරගලකරුවන්ට අමතකවූ රටේ පාලන ක්‍රමය වෙනස් කිරීම ආදි රටට පලදායි ඉල්ලීම ජනගත කළ යුත්තේ ඉන් අනතුරුවය. ශ්‍රී ලංකා නීති සංගමයේ නිවේදනය අනුව සියල්ල නීතියට යටත්ය.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි