No menu items!
21.8 C
Sri Lanka
28 March,2024

ශ්‍රීලනිපය ඉවසීමෙන් – ■ දේශපාලන වාර්තාකරු

Must read

ගොඩක් අය කළකිරිලා

කැබිනට් මණ්ඩලය පත්කිරීම ආණ්ඩුව ආරම්භයේදී නායකයන්ගේ ස්වභාවය පෙන්වූ අවස්ථාවක් බව පැහැදිලි කාරණයකි. ආණ්ඩුව අභ්‍යන්තරයේ ඇති විවිධාකාර බෙදීම් මෙන්ම, ආණ්ඩුවේ නායකයන් ඇතැම් දේශපාලන නායකයන්ට සලකන ආකාරයත් ඇමතිකම් ලබාදුන් අවස්ථාවේදී පැහැදිලි විය. පොදුජන පෙරමුණෙන් පිට සිටින පුද්ගලයන්ට සලකා ඇති ආකාරය කෙසේ වෙතත් පොදුජන පෙරමුණේ ඇතැම් සාමාජිකයන්ට සලකා ඇති ආකාරය පවා දෑස් ලොකුකරන අන්දමේ ඒවාය.

තමන්ට ලැබුණු ඇමතිකම ගැන හෝ, ඇමතිකමක් නොලැබීම ගැන හෝ නොසතුටින් ඉන්නේ එක්කෙනෙක් දෙන්නෙක් නොවේ. හතරපස්දෙනෙක් නොවේ. විසිපහක හෝ තිහක පිරිසක් නොසතුටින් සිටින බව ආණ්ඩුවේ නායකයෙකු කීය. විශේෂයෙන්ම ආණ්ඩුව පත් කිරීමට මාධ්‍ය සාකච්ඡාවලට සහභාගී වෙමින්, උද්ඝෝෂණ සහ රැස්වීම් සංවිධානය කරමින්, ඒවාට සෙනඟ අදිමින් වෙහෙස වූ පිරිසක් ඉන්නේ නොසතුටින්ය. ඇතැම් අය රාජපක්ෂවරුන් තමාට සලකන තරම දැනගත්තේ තමන්ට ලැබුණු ඇමතිකමත් සමඟය. ඇමතිකම් නොලැබුණු එස්.බී. දිසානායක, චන්දිම වීරක්කොඩි ආදී නායකයන් සිටී. ප්‍රබල ඇමතිකමක් නැති තවත් පිරිසක් සිටී. ඒ ගැන මෙහි වැඩි විස්තර ඕනෑ නැත.

කෙසේවෙතත් පසුගිය සතියේ කිහිපදෙනෙක්ම තමන්ට ලැබුණු ඇමතිකම් ගැන නොසතුට ප්‍රකාශ කර තිබුණි.

‘මට ලැබුණු අමාත්‍ය ධුරය පිළිබඳ ගැටලු නැතුව නොවෙයි. ඒත් ඒ ගැන කතා නොකර සිටිමු. කැබිනට් ඇමතිවරුන් එක්ක සන්ඩු සරුවල් වෙන්න වෙයි. එතකොට වැඩකරන්න බැරිවෙනවා. කලකිරීමක් තියෙනවා. සහෝදර ඇමතිවරු මට කිව්වා අයියා උඹ කලබල වෙන්න එපා, අපි උදව් කරන්නම් වැඩකරගෙන යමු කියලා.

සෑම ජයග්‍රහණවක් එක්කම පරාජයක් තියෙනවා. ඒ නිසා ඉවසීමෙන්, පරිස්සමින්, කල්පනාවෙන් කටයුතු කරමු. එදා සද්දන්ත එක්සත් ජාතික පක්ෂයට වෙච්ච දේ හෙට පොහොට්ටුවට වෙන්න බැරි නැහැ.

වනජීවීන් ආරක්ෂා කරන්නත් ඕන මිනිස්සු ආරක්ෂා කරන්නත් ඕනෑ. ජනාධිපතිතුමා අලි මිනිස් ගැටලුවට කාර්ය සාධන බළකායකුත් පිහිටෙව්වා. විසඳුම් නොදුන්නොත් රට ඉදිරියට යන්නේ නැහැ. කියා හොයාගෙන එහෙම හෙට අනිද්දට එන්න එපා.’

කළකිරීම ප්‍රසිද්ධියේ කී තවත් කෙනෙකු වූයේ රොෂාන් රණසිංහය. ඉඩම් කළමණාකරණ කටයුතු රාජ්‍ය ව්‍යාපාර ඉඩම් හා දේපළ සංවර්ධන රාජ්‍ය අමාත්‍යධුරයේ වැඩ බාරගනිමින් ඔහු කියා තිබුණේ ‘මේ ඇමතිකමට මං පොඞ්ඩක්වත් කැමති නෑ’ කියාය.

 

දයාසිරිගේ බලාපොරොත්තු

පුංචි රාජ්‍ය අමාත්‍යධුරයක් පමණක් ලබාදී පැත්තකට කරනු ලැබුවද, ශ්‍රීලනිප මහලේකම් දයාසිරි ජයසේකරගේ බලාපොරොත්තු පුංචි නැත. රබර් බෝලයක් දිය යට කර තිබෙන මෙන් තමන් යට කර තැබිය නොහැකි බව දයාසිරි ජයසේකර මහතාගේ අදහසය. ඔහුට අවශ්‍ය තවත් එක් දේශපාලනඥයෙකු වී ඇමතිවරයෙකු ලෙස මරණයට පත්වීමට නොවේ. තීරණාත්මක නායකත්වයක් කරා ගමන් කිරීමටය. හැකිනම් රටේ නායකත්වයට පත් වීමටය.

ශ්‍රී ලංකා පොදුජන පෙරමුණ යනු මහින්ද රාජපක්ෂ, ගෝඨාභය රාජපක්ෂ හා බැසිල් රාජපක්ෂ යන කුළුණු තුන මත පවතින පක්ෂයක් බව ඔහු දනී. මේ නායකයන් තිදෙනාගෙන් මුල් දෙදෙනා වියපත් නායකයන් වන අතර ඔවුන්ට නුදුරු දිනෙක දේශපාලන වේදිකාවෙන් බැසයන්නට සිදුවනු ඇත. එවිට හැදෙන දේශපාලන හිස්තැන පුරවන්නට තමාද සුදුස්සෙකු බව දයාසිරි ජයසේකර කල්පනා කරයි. එතෙක් තම අනන්‍යතාව ආරක්ෂා කරගනිමින් ස්වාධීන දේශපාලනයක නිරත වෙන්නට ඔහුට ඕනෑය. එහෙයියෙකු වෙන්නට ඔහු කැමති නැත.

එයට සුදුසුකම්, අත්දැකීම්, කථිකත්වය ඔහුට ඇත. එහෙත් ඒ සඳහා ධෛර්යය ඔහුට තිබෙනවාද නැද්ද යන්න කාලය තීන්දු කරනු ඇත. ඔහු සිය රාජ්‍ය ඇමතිධුරය බාරගනිද්දී කළකිරීම ප්‍රකාශයට පත් කරන්නට දෙවරක් නොසිතුවේය.

‘ජාතික ලැයිස්තුවට අපි නම් හතරක් දුන්නා. දෙන්නේ එක් අයකුට නම් පක්ෂයෙන් විමසීමක් කරන්න තිබුණා. එහෙම කිසි විමසීමක් නොකර තමයි පත්වීම දුන්නේ. ඒ නිසා මේක අපේ අභ්‍යන්තර ප්‍රශ්නයක් බවට පත්වෙලා.

ආණ්ඩුව අපහසුතාවට පත් කරන්න අපි සූදානම් නැහැ. ලැබෙන දෙයින් තෘප්තිමත් වෙලා වැඩ කිරීමයි අපට කරන්න තියෙන්නේ. මහින්ද රාජපක්ෂ මහත්තයට චන්ද්‍රිකා මැතිනිය සැලකුවා වගේ තමයි අද ශ්‍රීලනිපයට වෙලා තියෙන්නේ.

යාපනය දිස්ත්‍රික්කයේ මන්ත්‍රීවරයෙක් හැටියට අංගජන් රාමනාදන් පත්වුණා. එතුමන්ටත් සැලකිල්ලක් නැහැ. මේ තත්ත්වය ගැන ජනාධිපති සමග සාකච්ඡා කරන්න බලාපොරොත්තු වෙනවාග’

කෙසේ වෙතත් ශ්‍රීලනිපය ශක්තිමත් කිරීමේ සැලසුම්වලට හදිස්සියක් නැති බවත්, ඉවසීමෙන් කටයුතු කරන්නට ඕනෑ බවත්, නායකයන්ගේ අදහසය.

 

හදිසියක් නෑ

ශ්‍රී ලංකා නිදහස් පක්ෂයෙන් මෙවර පාර්ලිමේන්තුවට තේරී පත් වූ මන්ත්‍රීවරුන් සංඛ්‍යාව 14කි. එම මන්ත්‍රීවරුන් සංවිධානය කිරීම හා ස්වාධීන අනන්‍යතාවත් සමඟ කටයුතු කිරීමට ඔවුන් සමඟ නිතිපතා සාකච්ඡා කරමින් කටයුතු කිරීම ශ්‍රීලනිප නායකයන්ගේ පැත්තේ උපක්‍රමයකි. එහෙත් ඒ මන්ත්‍රීධුර 14ක ඒකකයක් ලෙස එකම අරමුණක කටයුතු නොකරනු ඇතැයි ශ්‍රීලනිප නායකයන්ගේ ගණන් බැලීමය. දැනට රංජිත් සියඹලාපිටිය මන්ත්‍රීවරයා නියෝජ්‍ය කථානායක ලෙස පත් වී හමාරය. නිමල් සිරිපාල ද සිල්වා සහ මහින්ද අමරවීර දෙපළ කැබිනට් අමාත්‍යධුර ලබා ඇත. ඔවුන්ගේ ස්වාධීනත්වය සැක සහිතය.

එහෙත් එස්.බී. දිසානායක, සුදර්ශනී ප්‍රනාන්දුපුල්ලේ, චන්දිම වීරක්කොඩි, ඩිලාන් පෙරේරා, අනුර ප්‍රියදර්ශන යාපා, සුසිල් ප්‍රේම්ජයන්ත්, මහින්ද සමරසිංහ වැනි නායකයන් ශ්‍රීලනිපය පැත්තට ළං කරගැනීමේ හැකියාව ඇත. ඒ නායකයන් පොහොට්ටුවෙන්ද ප්‍රතික්ෂේප වූ නායකයන්ය.

එම නායකයන් ශ්‍රීලනිපයට එකතු කරගැනීමට සාකච්ඡා පවත්වනවාදැයි විමසූ විට ශ්‍රීලනිප නායකයෙකු කීවේ දැන්ම සාකච්ඡා කිරීමට බලාපොරොත්තුවක් නැති බවය. ශ්‍රීලනිපය හා ශ්‍රී ලංකා පොදුජන පෙරමුණ අතර ඇති වූ ගිවිසුමේ හැටියට එම කණ්ඩායම් දෙක අතර පක්ෂ මාරු කරන පුද්ගලයන් බාර නොගැනීමට ඒ ඒ පක්ෂවල නායකයන් එකඟ වී ඇත. මැතිවරණයට පෙර මහින්ද සමරසිංහ, තිලංග සුමතිපාල ඇතුළු පිරිසක් ශ්‍රීලනිපයේ අවසර නැතිව නාමයෝජනා බාරදුන් අවස්ථාවේ, ශ්‍රීලනිපය පැත්තෙන් තර්ක කර තිබුණේ ඔවුන් තම පක්ෂයේ නොවන බවත්, පොහොට්ටුවෙන් නාමයෝජනා ගත් නිසා ඔවුන් පොහොට්ටුවේ බවත්ය. එහෙත් පොදුජන පෙරමුණ කියා තිබුණේ එකඟතාව අනුව පක්ෂ මාරු කරන අය බාර නොගන්නා නිසා, ඒ බව පිළිනොගන්නා බවය. ඔවුන් ශ්‍රීලනිප කෝටාවෙන් නාමයෝජනා ගත් අය ලෙස සලකන බවය.

අනෙක් අතට ශ්‍රීලනිප කණ්ඩායම දෙපිටකාට්ටු වැඩ කරන බවට චෝදනා එල්ලවිය හැකි නිසා දැන්ම ආණ්ඩුවට එරෙහි බලමුළු ශක්තිමත් කරන්නටත්, අවි අමෝරන්නටත් ඕනෑ නැති බව ඒ නායකයා කීය.

 

ඒ රාජපක්ෂ

අපේ නෙවෙයි

අගමැති මහින්ද රාජපක්ෂ මුණගැසීමට විවිධ පුද්ගලයන් පැමිණෙයි. ඇතැම් අය සුභ පතන්නටය. තවත් අය මැතිවරණයෙන් පසු විවිධාකාර පත්වීම් ආදිය ඉල්ලන්නටය. තමාට ළඟින් මෙන්ම දුරින් සිටින අය පවා සැනසීම මහින්ද රාජපක්ෂගේ ලක්ෂණයකි. ඔහු බල දේශපාලනයෙහි ශූර ක්‍රීඩකයෙකු වන්නේ එලෙස බොහෝ පුද්ගලයන් මුණගැසෙන නිසාය. එලෙස මුණගැසුණු කෙනෙකු මහින්ද රාජපක්ෂගේ පුංචි දෙබසක් ගැන කීය.

ඒ පුද්ගලයා මහින්ද රාජපක්ෂගෙන් විජයදාස රාජපක්ෂ ගැන විමසා ඇත. එයට පිළිතුරු ලෙස මහින්ද රාජපක්ෂ මහතා කියා ඇත්තේ ‘ඒ රාජපක්ෂ අපේ රාජපක්ෂ කෙනෙක් නෙවෙයි.’ කියාය. ඒ කතාවට අර්ථ ගණනාවක් තිබිය හැකිය. එකක්, ඔහු තමන්ගේ පවුලට සම්බන්ධයක් නැති බවය. නැතිනම් අපේ යන්නෙන් අදහස් කළේ ආණ්ඩුවේ මහින්ද රාජපක්ෂ පාර්ශ්වය ගැන විය හැක. විජයදාස රාජපක්ෂ මීට පෙර මෛත්‍රීපාල සිරිසේන ජනාධිපතිවරයාට හිතවත්ව සිටි අතර පසුව ගෝඨාභය රාජපක්ෂ පාර්ශ්වයට සමීප වන්නට උත්සාහ කළේය. දැන් ඔහු එක් පාර්ශ්වයකවත් ස්ථීරව කකුල තබාගැනීමට අසමත් බව ආණ්ඩුව ඇතුළෙන් ඇසෙන කතාවය.

විජයදාස රාජපක්ෂ මෙවර ඇමතිධුරයක දිවුරුම් දුන්නේ නැත. ඒ ඔහුට රාජ්‍ය ඇමතිධුරයක් පමණක් ලබාදීමත්, ඔහුට කනිෂ්ඨ නීතිඥයෙකු වන අලි සබ්රි මහතාට අධිකරණ අමාත්‍යධුරය ලබාදීමත්ය. හිත් වේදනාව නිසා විජයදාස රාජපක්ෂ මහතා හිතවතුන් සමඟ රාජපක්ෂවරුන්ට දෝෂාරෝපණය කර ඇති බවත් පසුගිය සතියේ මාධ්‍ය ආයතන ගණනාවක් ලියා තිබුණි. අපටද ඒ ගැන ආරංචි විය. තමා නැතිනම් රාජපක්ෂවරු ඔතැන නැතැයි ඔහු කියා ඇත. අමාත්‍ය අලි සබ්රිට වඩා දේශපාලනයේ මෙන්ම අධිකරණයේ අත්දැකීම් අතින්ද විජයදාස රාජපක්ෂ ඉදිරියෙන් සිටින බව සැබෑය.

එහෙත්, විජයදාස රාජපක්ෂ මහතාගේ ලොකුම සුදුසුකම, ඔහුට නුසුදුසුකමක්ද වේ. ඔහු ‘රාජපක්ෂවරුන් අද ඔතැන නැතැයි’ කියන්නේ රාජපක්ෂවරුන්ට එරෙහි චෝදනා යටපත් කිරීමට උත්සාහ කළ නිසා බව ප්‍රකට කාරණයකි. එනම්, ඔහු යහපාලන ආණ්ඩුවේ සිටියදී ප්‍රතිවිරුද්ධ පාර්ශ්වය වෙනුවෙන් යටිකූට්ටු වැඩ කිරීමකි. එය ඔහුට අමාත්‍යධුරය ලබාදුන් නායකයන්ට, ඡන්දය ලබාදුන් ඡන්දදායකයන්ට ගුණමකු වීමකි. ඒ නිසා, ඔහු ඈත් කර තබාගැනීම ආණ්ඩුවකට බුද්ධිමත් තීන්දුවක් විය හැක.

මේ සියල්ල මැද විජයදාස රාජපක්ෂ මහතාට අධිකරණ අමාත්‍යධුරය ලබාගන්නට පාවිච්චි කළ හැකි වෙනත් සටන්පාඨයක්ද තිබේ. ඒ ‘පාස්කු ඉරිදා ත්‍රස්ත ප්‍රහාරය ගැන විභාග කරන නිසා මුස්ලිම් ජාතිකයෙකු අධිකරණ අමාත්‍යධුරයට පත් නොකළ යුතු බවට’ ඇතැම් ආණ්ඩු හිතවාදීන් කියන කතාවය. ආණ්ඩුව පත් කරන්නට දත කෑ ඇතැම් හිමිවරුන්ටද අලි සබ්රි පත් කිරීමට එරෙහි වී ඇත.

මැඬිල්ලේ පඥාලෝක හිමි කියා ඇත්තේ අලි සබ්රි පත් කිරීමෙන් තමන්ගේ මූලික අයිතිවාසිකම් උල්ලංඝනය කර ඇති බවය. ඒ නිසා එයට එරෙහිව තමන් අධිකරණයට යන බවය. මැදගොඩ අභයතිස්ස හිමි කියා තිබුනේ අලි සබ්රිට ඇමතිකම දුන්නේ ජනතා විරෝධතා මැද බවය.

යම් පුද්ගලයෙකුගේ ජනවර්ගය නිසාම ඔහු තනතුරකට නුසුදුසු බව කියනවානම් එය අමු ජාතිවාදයකි. ජනාධිපති ගෝඨාභය රාජපක්ෂ ඒ ජාතිවාදීන්ට හසු වී තමා වෙනුවෙන් පෙනී සිටි නීතිඥයා සහ හිත මිතුරාට දුන් ඇමතිකම ඉවත් කරනු ඇතැයි කල්පනා කළ නොහැක.

කරුගේ

කෙළින් තීන්දුව

කරු ජයසූරිය එජාපයේ බෙදීම ගැන ප්‍රසිද්ධියේ තමාගේ විරෝධය ප්‍රකාශ කළ නායකයෙකි. දැන් එක්සත් ජාතික පක්ෂය නායකයෙක් සොයද්දී, කරු ජයසූරිය නායකත්වයට පත් කිරීමට ආ යෝජනාවලට ඔහු පිළිතුරු දී තිබුණේ තමා නායකත්වය බාරගන්නට නම්, එක්සත් ජාතික පක්ෂයේ සිටින දෙපාර්ශ්වය එකතු වීමට කැමති විය යුතු බවය.

සජිත් ප්‍රේමදාස මහතාගේ නායකත්වයෙන් සමගි ජන බලවේගයේ අපේක්ෂකයන් ලෙස මැතිවරණයට ඉදිරිපත් වූ කණ්ඩායම සිරිකොතේ බලය අල්ලන කතා මැතිවරණයට කලින් කීවේ එජාපය දෙකඩ වීමේ වේදනාවෙන් සිටින පාක්ෂිකයන් සනසන්නටය. එජාපයට භක්තිමත් පක්ෂයේ සාමාජිකයන් එක්සත් ජාතික පක්ෂයටම ඡන්දය දෙනු ඇතැයි කල්පනා කළ නිසා, තමන් නැවත එජාපය හා එක්වන බව ඔවුන් මැතිවරණ ප්‍රචාරයේදී කීය. එහෙත්, ප්‍රචාරක සමය අවසාන කාලයේදී අප පෙන්වාදුන් පරිදිම, ඔවුන් මැතිවරණය වනවිටත් එජාපය අත්හැර හමාරය. නැවත එක්සත් ජාතික පක්ෂයට එක්වීමේ බලාපොරොත්තුවක් ඔවුන්ට නැත.

එවැනි පසුබිමක දැන් නලින් බණ්ඩාර වැනි නායකයන් එජාප නායකත්වය සජිත් ප්‍රේමදාසට ලබාදිය යුතු බව කීවත්, ඒ ඉල්ලීම ඉටු වන්නේ නැත.

අනෙක් පැත්තෙන් එක්සත් ජාතික පක්ෂයේ ඉතිරි වී සිටින නායකයන්ද සජිත් ප්‍රේමදාසට නායකත්වය ලබාදීම ගැන කැමැත්තක් නැත. ඉදිරිපෙළ නායකයන් කිහිපදෙනෙක්ම කල්පනා කරන්නේ කෙලෙස හෝ තමන්ට නායකත්වය ගැනීම ගැනය.

එවැනි පසුබිමක කරු ජයසූරිය මහතා මුණගැසුණු පාලිත රංගේ බණ්ඩාර වැනි නායකයන්ට ඔහු පිළිතුරු දී තිබුණේ පක්ෂයේ දෙපාර්ශ්වය ඒකාබද්ධ කිරීමේ වැඩපිළිවෙලක් ආරම්භ කරන්නට පමණක් තමා පක්ෂ නායකත්වය බාරගන්නා බවය. එහෙත් ඉතිරි වී සිටින එජාප නායකයන් ඒ යෝජනාවට කැමති නැත. ඒ අනුව පෙනෙන්නට ඇත්තේ, කරු ජයසූරිය නායකත්වයට ගෙන ඒමේ සැලසුම් අත්හැර දැමිය යුතු බවය.

එම හිස්තැන සම්පූර්ණ කරන්නට ඉදිරිපත්ව සිටින ප්‍රමුඛ තරඟකරුවෙක් වන්නේ රුවන් විජයවර්ධනය. ඔහුගේ පියා සහ සහෝදරයා පාලනය කරනු ලබන විජය පුවත්පත් ආයතනයේ මාධ්‍ය ආයතනවලින්ද ඔහුට පසුගිය දිනවල වැඩි ආවරණයක් ලැබී තිබුණි. ලංකාදීප මුල් පිටුවේ අගෝස්තු 19 වැනිදා පුවතක පළ වී තිබුණේ නායකත්වය බාරගැනීමට රුවන් විජයවර්ධන කළ ප්‍රකාශයකි. දැන් කරු ජයසූරිය මහතාගේ බෑණා වන නවීන් දිසානායක පවා රුවන් විජයවර්ධනට නායකත්වය ලබාගැනීමට සහයෝගය පළකරන බව ප්‍රකාශ කර ඇතැයි පක්ෂ අභ්‍යන්තරයෙන් ඇසේ.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි