වර්තමාන ශ්‍රේෂ්ඨාධිකරණ විනිසුරුවරුන් අතර සිටි විශිෂ්ට ගණයේ විනිසුරුවරයෙකු මෙන්ම විශිෂ්ට නීතිඥවරයකු ද වූ ප්රසන්න ජයවර්ධන මහතා මේ සතියේ ජීවිතයෙන් සමුගත්තේය. ඒ වන විට ඔහුට වයස අවුරුදු 63කි.
ප්රසන්න ජයවර්ධන මහතා වූකලි අධිකරණ ක්‍ෂෙත‍්‍රයට මෙන්ම නීති වෘත්තියටද කාලයකින් පහළ වන දුර්ලභ ගණයේ මිනිසෙකි.
එක පැත්තකින් ඔහු නීතිය පිළිබඳ ප‍්‍රාමාණික දැනුමකින් හෙබි ඉහළ ගණයේ නීතිඥවරයෙක් විය. අනෙක් අතින්, සිය නීතිය පිළිබඳ දැනුුම නඩුවලදී විශිෂ්ට ලෙස යොදාගෙන ඉතාම වැදගත් නඩු තීන්දු දුන් ශ්‍රේෂ්ඨාධිකරණ විනිසුරුවරයෙක් විය. තවත් පැත්තකින් හේ, නීති වෘත්තිය තුළත්, අධිකරණ ක්‍ෂෙත‍්‍රය තුළත් උස්මිටිකම් නොබලා, ආධුනික-ජ්‍යෙෂ්ඨකම් නොබලා සියලූ දෙනා සමග සුහදත්වයෙන් හා එකම ගෞරවයකින් කටයුතු කළ සමීපතම මිතුරෙකු මෙන් විය. තමන්ගේ වෘත්තීය සාර්ථකභාවයෙන් හිස උදුම්මා නොගත් මිත‍්‍රශීලී, විනෝදකාමී හා ඒ සියල්ලටමත් වඩා, තමාගේ වෘත්තීයභාවයත්, නීතිය පිළිබඳ ප‍්‍රාමාණික දැනුමත් හරහා කිසිදු බලවේගයකට නොනැමී, නොසැලී, ඍජුව කටයුතු කළ යෝධයෙකු බඳු විය.
දිර්ඝ කාලයක් තුළ නීතිඥ වෘත්තියේද, කෙටි කාලයක් තුළ ශ්‍රේෂ්ඨාධිකරණ විනිසුරු වෘත්තියේද කටයුතු කරද්දී ඔහු ඉහත කී ගුණාංග සියල්ලෙන් අගතැන්පත් නියම මහත්මයකු සේ සිය වෘත්තීය කාර්යභාරය ඉටු කෙළේය. ඒ සමගම නීිති වෘත්තියේ හා අධිකරණයේ ස්වාධීනත්වයට, ගෞරවයට එල්ලවන දේශපාලන හෝ වෙනයම් බලපෑම් සියල්ලකටම එරෙහිව පෙනීසිටිමින් ඒවාට මුහුණ දුන්නේය.
ආචාර්ය ශිරානි බණ්ඩාරනායක අගවිනිසුරු ධුරයෙන් ඉවත්කරමින් රාජපක්ෂ ආණ්ඩුව දෝෂාභියෝගයක් ගෙන ආ අවස්ථාවේ ශ‍්‍රී ලංකා නීිතිඥ සංගමයේ සභාපතිවරයාව සිටි විජේදාස රාජපක්ෂ, ඊට එරෙහිව නීතිඥ ප‍්‍රජාව පෙළ ගස්වන්නට අදිමදි කරද්දී, සිය වගකීමෙන් පැනයද්දී සංගමයේ උපසභාපතිවරයා හැටියට ප්රසන්න ජයවර්ධන මහතා ඉදිරියට පැමිණ කළ කාර්යභාරය, ඒ සටනේ සිටි සියලූම නීති වෘත්තිකයන්ගේ මතකයේ රැුඳී පවතියි.
ශ්‍රේෂ්ඨාධිකරණ විනිශ්චයකාර අසුනට නැගුණු පසුද සිය සාමාන්‍ය පරිචය ඔහුගෙන් දිස්විය. ඉංග‍්‍රීසි භාෂාව නිසි ලෙස හැසිරවීමට නොදත් ආධුනික නීතිඥවරුන්ටත් එය ව්‍යක්තව හසුරුවන ජ්‍යෙෂ්ඨ නීතිඥවරුන්ටත් ජනාධිපති නීතිඥවරුන්ටත් ඔහුගේ සැලකිල්ල, සවන් දීම එක හා සමාන විය. ආධුනිකබව නිසා යම් වරදක් නීතිඥවරයකු අතින් සිදුවුන විට ඉතාම සුහදව එය පෙන්වාදුන් ඔහු ඉල්ලා සිටින කිසියම් සහනයක් නීතිය අනුව ලබාදීමට නොහැකි වන විටෙකදී පවා ඒ බව නිහතමානීව පැහැදිලි කෙලේය.
හිටපු ජනාධිපති මෛත‍්‍රිපාල සිරිසේන මහතා විසින් පාර්ලිමේන්තු නිල කාලය සම්පූර්ණ වීමට පෙර පාර්ලිමේන්තුව විසුරුවාහැර මහින්ද රාජපක්ෂ මහතාට අගමැති ධුරය ලබාදීමේ සිද්ධිය සම්බන්ධ නඩුවේදී එම ක‍්‍රියාව නීති විරෝධී බව ප‍්‍රකාශ කළ සත්පුද්ගල විනිසුරු මඬුල්ලේ ඔහු සාමාජිකයෙකි. සයිටම් පෞද්ගලික වෛද්‍ය පීඨය සම්බන්ධ අධිකරණ තීන්දුව, යාපනය උතුරු ජනනී විදුලිබලාගාරය අත්හිටුවීමේ තීන්දුව ඇතුළු වැදගත් ශ්‍රේෂ්ඨාධිකරණ නඩු තීන්දු රැුසක් ලබාදුන් විනිසුරුවරයෙකි.
ජනාධිපති සිරිසේන විසින් මහබැංකුවේ බැඳුම්කර වංචාව සම්බන්ධයෙන් කරුණු සොයාබැලීම සඳහා පත්කරන ලද ජනාධිපති කොමිෂන් සභාවේ සාමාජිකයකු වූ ප්රසන්න ජයවර්ධන මහතා, එහිදී ඉතාම ගෞරවනීය හා අද්විතීය ලෙස හැසිරෙමින්, එවකට සොලිසිටර් ජෙනරාල් දප්පුල ලිවේරාගේ විකාර හැසිරීම් පවා පාලනය කරමින් ඔහුට අවවාද කරමින් වෘත්තීය ගෞරවය ආරක්‍ෂා කළේය.
හෙතෙම හුදෙක් නඩුකාරයෙක් නොවේ. නීතිය පිළිබඳ විද්වතෙකි. ප‍්‍රාමාණිකයෙකි. සිය දැනුමෙන් අන් අයට සංග‍්‍රහ කළ හිතවෙතෙකි. ඊටත් වඩා ඍජු හා මනස්කාන්ත මිනිසෙකි.x
x අරුණ ජයවර්ධන
