ලෝක සෞඛ්‍ය සංවිධානය වෙත ඇමෙරිකානු රජය ලබාදුන් අරමුදල් අත්හිටුවීමට ගත් තීන්දුව හේතුවෙන් ලෝක සෞඛ්‍ය සංවිධානයේ අරමුදල් ලබන ශ‍්‍රී ලංකාව වැනි රටවලට අහිතකර බලපෑමක් සිදුවන බව පෙන්වාදෙමින් එක්සත් ජාතික පක්ෂයේ නායක රනිල් වික‍්‍රමසිංහ ඇමෙරිකානු ජනාධිපති ඩොනල්ඞ් ට‍්‍රම්ප් වෙත ලිපියක් යවා ඇත.
අපේ‍්‍රල් 16 දිනැතිව එම ලිපිය යවා ඇත.
ලෝක සෞඛ්‍ය සංවිධානයට ඇමෙරිකා එක්සත් ජනපදය එල්ලකර ඇති චෝදනා බරපතළ බවත්, ඒවා ගැන විමර්ශන කළ යුතු බව සැකයක් නොමැති බවත් එම ලිපියෙන් පෙන්වාදී තිබේ.
කෙසේ වෙතත් කොවිඞ් 19 ගෝලීය වසංගතය ලෝකයේ රටවල් ගණනාවක ආර්ථිකය අඩපණ කර ඇති බවත්, ජන ජීවිතය අවදානමකට ලක්ව ඇති බවත් මේ මොහොතේ සෞඛ්‍යය පිළිබඳව ගෝලීය වශයෙන් නායකත්වය සැපයිය හැකි ආයතනය වන්නේ ලෝක සෞඛ්‍ය සංවිධානය බවත් එම ලිපියෙන් පෙන්වාදී ඇත. එම නිසා ලෝක සෞඛ්‍ය සංවිධානය මෙම අවස්ථාවේදී සිය ක‍්‍රියාකාරී වැඩපිළිවෙළ අඛණ්ඩව පවත්වාගෙන යා යුතු බව ලිපියෙන් පෙන්වාදී ඇත.
තමා දන්නා ආකාරයට ඇමෙරිකාව ලෝක සෞඛ්‍ය සංවිධානයට වාර්ෂිකව ඩොලර් මිලියන 400- 500 අතර ප‍්‍රමාණයක් ලබාදෙන බවත්, එම ආධාර නැවැත්වීමට ගත් තීරණය නිසා ශ‍්‍රී ලංකාව වැනි රටවල ක්රියාත්මක වන වැඩසටහන්වලට එමගින් බලපෑමක් එල්ලවන බවත් ලිපියෙන් පෙන්වාදී ඇත.
කොවිඞ්-19 වසංගතයෙන් ඇතිකළ බලපෑම පිළිබඳව සලකා බලා එම ආධාර අත්හිටුවීමට ගත් තීරණය ගැන නැවත සලකා බලන ලෙසද එම ලිපියෙන් ඉල්ලා ඇත.
අනුරංග ජයසිංහ
