නීති විරෝධී ආණ්ඩුවට එරෙහිව අභියාචනාධිකරණය විසින් අතුරු තහනම් නියෝගයක් නිකුත් කිරීමෙන් අනතුරුව එය පිළි නොගෙන කටයුතු කළ රාජ්‍ය නිලධාරීන් සම්බන්ධයෙන් අල්ලස් හෝ දූෂණ විමර්ශන කොමිෂන් සභාවට පැමිණිලි කරන බව එක්සත් ජාතික පෙරමුණේ නායකයෙක් ප්‍රකාශ කළේය.
මේ වනවිට එලෙස කටයුතු කරන රාජ්‍ය නිලධාරීන් සම්බන්ධයෙන් තොරතුරු එකතු කරමින් සිටින බවද ඔහු ප්‍රකාශ කළේය. ඔක්තෝබර් 26 වැනිදා දක්වා අමාත්‍යවරුන් ලෙස ක්‍රියාකළ එක්සත් ජාතික පෙරමුණේ නායකයන් තමන් සේවය කළ අමාත්‍යාංශවල එම තොරතුරු එකතු කරමින් සිටින බව ඔහු පෙන්වාදෙයි. මේ වනවිට අධිකරණය අතුරු තහනම් නියෝගයක් ලබාදී තිබෙන නිසා වැරදි තීන්දු ගැනීම කිසිසේත්ම සාධාරණය කළ නොහැකි බව එක්සත් ජාතික පෙරමුණේ මතය වන බවද ඔහු කීය.
මීට අමතරව ප්‍රධාන ආයතනවල තීරණ ගැනීමේ බලය තිබෙන නිලධාරීන් වෙත විවෘත ලිපියක් යොමු කරමින් නීති විරෝධී ආණ්ඩුවේ තීරණවලට අනුව කටයුතු නොකරන ලෙසත් එසේ කළහොත් ඉදිරියේදී නීතිමය පියවර ගන්නා බවත් ප්‍රකාශ කිරීමට බලාපොරොත්තු වන බව එම මන්ත්‍රීවරයා කීය.■
අනුරංග ජයසිංහ
