No menu items!
27.4 C
Sri Lanka
29 March,2024

රාජ්‍ය ආයතනවලට චතුරිකා කඩාපනී

Must read

ජනාධිපති මෛත‍්‍රීපාල සිරිසේන මහතාගේ දියණිය වන චතුරිකා සිරිසේන පසුගිය සතියේදී රාජ්‍ය ආයතන ගණනාවකට බලහත්කාරයෙන් ඇතුළු වී ඒවායේ ප‍්‍රධානීන්ට නියෝග ලබාදීම් හා එම ආයතනවලට පුද්ගලයන් නීතිවිරෝධීව පත් කරමින් සිදුකරන ලද බලපෑම් එම ආයතනවල සේවකයන්ගේ දැඩි කෝපයට හා විවේචනයට හේතුවී ඇත.

පසුගිය සතියේ චතුරිකා සිරිසේන මහත්මියට අවශ්‍ය ඉඩම් කැබැල්ලක් වෙන්කර දීම ප‍්‍රතික්ෂේප කළ නිසා පොළොන්නරු තමන්කඩුව ප‍්‍රාදේශීය ලේකම්වරයා ලෙස කටයුතු කළ එන්.ඒ.ඒ.එස් නිශ්ශංක ආරච්චි මහතා වෙනත් ආයතනයකට මාරු කර යවා ඇත. ඊට විරෝධය දක්වමින් ප‍්‍රාදේශීය ලේකම් කාර්යාලයේ සහ එයට සම්බන්ධ සේවකයන් පිරිසක් සැප්තැම්බර් 14 වන දින පොලොන්නරුව නවනගරයේ උද්ඝෝෂණ ව්‍යාපාරයක නිරත වී ඇත.

ඊට අමතරව සැප්තැම්බර් 14 වන දින ශ‍්‍රී ලංකා වෘත්තීය පුහුණ අධිකාරිය වෙත පැමිණ එහි අධ්‍යක්ෂ මණ්ඩලය කැඳවා ඔවුන්ට එහි පරිපාලන කටයුතු පිළිබඳවද චතුරිකා සිරිසේන මහත්මිය විසින් උපදෙස් දී ඇත.

සැප්තැම්බර් 17 වන දින ජාතික රූපවාහිනියට පැමිණ ඇති චතුරිකා සිරිසේන ඇගේ සමීප හිතවතෙකු වන ශ‍්‍රී ලංකා ක‍්‍රිකට්හි ප‍්‍රබලයෙකු වන රවීන් වික‍්‍රමරත්නව ජාතික රූපවාහිනියේ සභාපතිනියටත් ඉහළින් නියෝග දිය හැකි අන්දමේ නව තනතුරකට පත්කර ඇත.
රවීන් වික‍්‍රමරත්නට අවශ්‍ය කාර්යාලයක් හා පහසුකම් ලබාදෙන ලෙසද නියෝග කර ඇත. එමෙන්ම ජනාධිපතිවරයාට සම්බන්ධ ප‍්‍රවෘත්ති පිළිබඳව මින් පසු තීරණය කරනු ලබන්නේ ඔහු බවද ප‍්‍රකාශ කර ඇත. එදින ඔහු ජාතික රූපවාහිනි ආයතනයේ අධ්‍යක්ෂ මණ්ඩල කාමරය තුළ සිටිමින් එහි නිලධාරීන් කැඳවා සාකච්ඡා කර ඇත.

සැප්තැම්බර් 18 වන දින ස්වාධින රූපවාහිනි සේවයට චතුරිකා සිරිසේන පැමීණීමට උත්සාහ කර ඇති අතර එහිදී ස්වාධීන රූපවාහිනියේ සභාපතිවරිය වන තිලකා ජයසුන්දර මහත්මිය එයට දැඩි ලෙස විරෝධය දක්වා ඇත. ඇය පවසා ඇත්තේ විෂය භාර අමාත්‍ය මංගල සමරවීරගේ නියෝගයක් නොමැතිව පිටස්තර පුද්ගලයන්ට සිය කාර්ය මණ්ඩලය ඇමතීමට අවස්ථාව ලබාදිය නොහැකි බවයි.

චතුරිකා සිරිසේනට ජනාධිපති කාර්යාලයේ, ජනාධිපති මාධ්‍ය අංශයේ හෝ ජනාධිපතිවරයා යටතේ ඇති කිසියම් ආයතනයක නිල තනතුරක් ලබා දී ඇතිදැයි ජනාධිපති මාධ්‍ය අංශයේ නියෝජ්‍ය අධ්‍යක්ෂක සුනිල් ජයසේකරගෙන් කළ විමසීමකදී ඔහු ප‍්‍රකාශ කළේ ඇයට එවැනි කිසිදු නිල තනතුරක් ලබා දී නොමැති බවය.

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි