No menu items!
26.1 C
Sri Lanka
28 March,2024

රනිල් එපා යළි කැරැල්ලක්

Must read

එක්සත් ජාතික පක්ෂයේ නායකත්වයෙන් රනිල් වික්‍රමසිංහ මහතා ඉවත් වියයුතු බවත්, ඔහු මීළඟ ජනාධිපතිවරණයේදී එක්සත් ජාතික පෙරමුණේ අපේක්ෂකයා නොවිය යුතු බවත් ප්‍රකාශ කරන මතයක් ශීඝ්‍රයෙන් නැවත එම පක්ෂය තුළ ගොඩනැගෙමින් ඇතැයි වාර්තා වේ.

මෙම තත්ත්වය තුළ පසුගිය කාලයේ එක්සත් ජාතික පක්ෂය ප්‍රතිසංස්කරණය විය යුතුයැයි මතයක සිටි පිරිස, නායකයා තමන්  රැවැටූ බවත්, එනිසා මෙවර ඒ උප්පරවැට්ටිවලට හසුනොවෙන බවත් ප්‍රකාශ කරන බව එජාපයේ ප්‍රබලයෙක් පැවසීය. පසුගිය 29 වෙනිදා අරලියගහ මන්දිරේ පැවති එක්සත් ජාතික පෙරමුණේ පාර්ලිමේන්තු කණ්ඩායමේ රැස්වීමේදී අමාත්‍ය නවීන් දිසානායක, පොලිස්පති පූජිත් ජයසුන්දර පිළිබඳව අගමැති රනිල් වික්‍රමසිංහ සමඟ වාදයක පැටලී ඇත. එහිදී රනිල් වික්‍රමසිංහගේ මතයට විරුද්ධව යමින් නවීන් දිසානායක මහතා කියා ඇත්තේ එජාපයේ කිසිවෙකු මෙවර පූජිත් ජයසුන්දර වෙනුවෙන් පෙනී නොසිටිය යුතු බවය. මෙම වාදයේ විඩියෝ පටයක් නවීන් දිසානායක තමන්ගේ ෆේස්බුක් ගිණුමට පසුදාම එකතු කර තිබුණු අතර මේ පිළිබඳව අදහස් දැක්වූ එජාප අමාත්‍යවරයෙකු කියා සිටියේ, මීට පෙර මෙවැනි වීඩියෝ පට ප්‍රසිද්ධ වීම හෝ මෙවැනි සංවාද හෝ ඇති නොවුණ බවය. නවීන් දිසානායක ප්‍රමුඛ මන්ත්‍රී කණ්ඩායමක් කරූ ජයසූරිය පක්ෂයේ මීළඟ නායකයා සහ එජාපෙ මීළඟ ජනාධිපතිවරණ අපේක්ෂකයා කිරීම සඳහා වැඩපිළිවෙළක් දියත් කරමින් ඇති බව ප්‍රකාශ කරන ඒ මහතා කියා සිටින්නේ, එජාප උපනායක රවී කරුණානායකද කරූ ජයසූරිය පාර්ශ්වයට එකතුවී ඇති බවය.

මේ පිළිබඳ අදහස් දැක්වූ එජාප නියෝජනය කරන නියෝජ්‍ය අමාත්‍යවරයෙකු ප්‍රකාශ කළේ, එජාපය තුළ රනිල් වික්‍රමසිංහ විරෝධයක් නැවත ගොඩනැගෙමින් ඇති බව සත්‍යක් බවය. පාස්කු ඉරිදා ප්‍රහාරයෙන් පසුව රනිල් වික්‍රමසිංහ මහතාගේ ජනප්‍රියතාව බිංදුවටම බැස ඇතැයිද, එනිසා ඔහුට ඉදිරි මැතිවරණ ජයග්‍රහණය කිරීමට නොහැකි බව එජාපෙ බොහෝ මන්ත්‍රීවරුන් දැන් දරන මතය බවද ඔහු ප්‍රකාශ කරයි. මෙම බල අරගලය නිසා රනිල් වික්‍රමසිංහ මහතා අබිබවා ෆීල්ඞ් මාෂල් සරත් ෆොන්සේකා පක්ෂය තුළ ඉදිරියට පැමිණ ඇතැයිද, එහෙත් පක්ෂයේ බහුතර මන්ත්‍රී ප්‍රසාදය ඔහුට අහිමි බවද දැනගන්නට ඇත. පාස්කු ඉරිදා ප්‍රහාරයෙන් පසුවත් රනිල් වික්‍රමසිංහ ජනාධිපති සිරිසේන ආරක්ෂා කරන ප්‍රතිපත්තියක සිටීම එජාපේ මන්ත්‍රීවරුන් බොහොමයකගේ විරෝධයට හේතුවී ඇත. ■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි