No menu items!
27.5 C
Sri Lanka
29 March,2024

රජයේ වෛද්‍යවරුන්ගේ බළලා එළියට පැනීම

Must read


රජයේ වෛද්‍ය නිලධාරීන්ගේ සංගමයේ බළලා මල්ලෙන් එළියට පැන ඇත. ඔක්තෝබර් 25 වැනිදා පෙරවරු 9.00ට ආරම්භ කළ ශ‍්‍රී ලංකා පොදුජන පෙරමුණේ ජනාධිපති අපේක්ෂක ගෝඨාභය රාජපක්ෂගේ ප‍්‍රතිපත්ති ප‍්‍රකාශය එළිදැක්වීමේ උත්සවයේදී ගෝඨාභය රාජපක්ෂ මහතාට එහායින් සිටියේ රජයේ වෛද්‍ය නිලධාරීන්ගේ සංගමයේ සභාපති අනුරුද්ධ පාදෙණිය මහතාය. එය අනුරුද්ධ පාදෙණිය වෛද්‍යවරයාගේ දේශපාලන පක්ෂපාතීත්වය ප‍්‍රසිද්ධියේ පෙන්වීමක් ලෙස පැහැදිළිව තේරුම්ගත හැකිය.


වෛද්‍ය අනුරුද්ධ පාදෙණියගේ අරමුණු හා දේශපාලන පක්ෂපාතීත්වය අප මෙහි අලූ‍තින් අකුරු කළ යුතු නැත. පසුගිය වසර කිහිපයක් තිස්සේ දේශපේ‍්‍රමය, දේශද්‍රෝහී ගිවිසුම් ආදී වශයෙන් ඔවුන් පාවිච්චි කළ වචන මාලාවෙන්ම ඔවුන් සිටින තැන පැහැදිළි විය. එහෙත් වෛද්‍ය පාදෙණිය මේ තරම් ප‍්‍රසිද්ධියේ ඒ පක්ෂපාතීත්වය පෙන්වූ පළමු අවස්ථාව මෙයයි.
වෛද්‍ය අනුරුද්ධ පාදෙණිය රජයේ වෛද්‍ය නිලධාරීන්ගේ සංගමයේ සභාපතිවරයා පමණක් නොවේ. ඔහු කොළඹ ළමා රෝහලේ විශේෂඥ වෛද්‍යවරයෙකු ලෙස රජයේ වැටුප් ලබමින් සේවය කරන්නෙකි. උදෑසන 9 ඔහුගේ රාජකාරී කාලසීමාවට අයත්ය.


ඒ අනුව රජයේ වැටුප් ලබන නිලධාරියෙකු මැතිවරණ වේදිකාවකට ගොඩවීම පිළිබඳව මැතිවරණ ප‍්‍රචණ්ඩ ක‍්‍රියා නිරීක්ෂණ මධ්‍යස්ථානය හා පැෆරල් සංවිධානය මැතිවරණ කොමිසමට පැමිණිලි කර තිබුණි. එම පැමිණිලි මත මැතිවරණ කොමිෂන් සභාව මේ වනවිට පරීක්ෂණයක් ආරම්භ කර ඇත.
දේශපාලන අයිතිවාසිකම් අහිමි වෛද්‍යවරුන් ඇතුළු රජයේ මාණ්ඩලික නිලධාරීන්, පරිපාලන නිලධාරීන් ඇතුළු කොටස් මැතිවරණයට අදාළ කිසිදු දේශපාලන කටයුත්තකට සහභාගී නොවිය යුතු බව දන්වමින් මැතිවරණ කොමිෂන් සභාව විසින් සැප්තැම්බර් 10 වනදා චක‍්‍රලේඛයක් ද නිකුත් කර තිබුණි. අනුරුද්ධ පාදෙණිය වෛද්‍යවරයා පැහැදිළිවම එය උල්ලංඝණය කර ඇත.


මාධ්‍ය සාකච්ඡුාවක් පවත්වා මෙයට පිළිතුරු දෙමින් රජයේ වෛද්‍ය නිලධාරීන්ගේ සංගමය පවසන්නේ අනුරුද්ධ පාදෙණිය වෛද්‍යවරයා එම අවස්ථාවට සහභාගී වුණේ රජයේ වෛද්‍ය නිලධාරීන්ගේ සංගමය නියෝජනය කරමින් එහි සභාපතිවරයා ලෙසින් බවය. රජයේ වෛද්‍ය නිලධාරීන්ගේ සංගමය එම ප‍්‍රතිපත්ති ප‍්‍රකාශය සකස් කිරීමට දායක වූ නිසා පාදෙණිය මහතා එයට සහභාගී වූ බව ඔහු කියා ඇත.


එහෙත් පැෆරල් සංවිධානය සිය පැමිණිල්ලෙහි මෙසේ සටහන් කර ඇත.
‘වෘත්තියවේදියෙකු ලෙස ප‍්‍රතිපත්ති සම්පාදන ක‍්‍රියාවලියකට තමාගේ, තම සංගමයේ යෝජනා ඉදිරිපත් කිරීම වරදක් නොවූවද මැතිවරණ කාලසීමාවක තරග වදින දේශපාලන පක්ෂයක වැදගත්ම අවස්ථාව වන ප‍්‍රතිපත්ති ප‍්‍රකාශනය එළිදැක්වීම වැනි දේශපාලන වැඩසටහනක වේදිකාගත වීම සැබවින්ම දේශපාලනයට ඍජු ලෙස දායක වීමකි. විශේෂයෙන්ම තැපැල් ඡුන්ද භාවිතය නුදුරු දිනක පැවතෙද්දී රාජ්‍ය සේවා වෘත්තිය සමිති නායකයෙකු දේශපාලන වේදිකාවට ගොඩවීම සාමාජිකත්වයට වක‍්‍ර බලපෑමක් විය හැකිය. එමෙන්ම රජයේ වෛද්‍ය නිලධාරියෙකු මාණ්ඩලික නිලධාරීන් ගණයට වැටෙන බැවින් ඔවුන්ට ඡුන්දය දීම හැර වෙනත් කිසිදු දේශපාලන ක‍්‍රියාවලියකට සම්බන්ධ වීමට නොහැකි බව ආයතන සංග‍්‍රහයේ 32 පරිච්ෙඡ්දයේ ඉතා පැහැදිළිව සඳහන්ව ඇත.


මධ්‍යස්ථව සිටිය යුතු මාණ්ඩලික සේවා වලට අදාල රජයේ වෘත්තිය සමිති නායකයෙක් මේ ආකාරයට දේශපාලන ක‍්‍රියාවලියට සම්බන්ධ වීමට ඉඩලදහොත් අනෙකුත් මාණ්ඩලික නිලධාරී සංගම්ද දේශපාලන ක‍්‍රියාවලියට අවතීර්ණය වීමට ඉඩ ඇත. එය ලංකාවේ නිදහස් මැතිවරණවලට බලවත් අභියෝගයක් එල්ල විය හැක. දැනටමත් මාණ්ඩලික නොවන නිලධාරීන්ගේ සමහර වෘත්තිය සමිති පක්ෂ දේශපාලන ක‍්‍රියාවල යෙදීම ආරම්භයේදී වැළැක්වීමට ක‍්‍රියා කළහොත් අනාගතයේදී මේ තත්වය පාලනය කරගත නොහැකි වනු ඇත.‘


වෘත්තිය සමිති ආඥා පනත අනුව වෘත්තිය සමිති නායකයෙකුට හෝ වෘත්තිය සමිති සාමාජිකයෙකුට ආයතනය තුළ තමන්ට සිදු වන අක‍්‍රමිකතා හෝ අසාධාරණයන් හමුවේ අදහස් දැක්වීමකට හෝ විරෝධතා දැක්වීමකට ඉඩ ඇත. එය මෑත කාලයේදී ශේෂ්ඨාධිකරණ නඩු තීන්දුවකින් පවා තහවුරු කර ඇති අයිතියකි. නමුත් වෘත්තිය සමිති ආඥා පනතට අනුව ආයතනයෙන් පිට දේශපාලන වේදිකා මත හෝ දේශපාලන පක්ෂවලට ඕනෑ ආකාරයට අදහස් දැක්වීම හෝ දේශපාලන වේදිකා මත තමන්ගේ අදහස් ප‍්‍රකාශ කිරිම වෘත්තිය සමිති ආඥා පනතේ බරපතල වැරුද්දක්ය.


මීට පෙර 2015 ජනාධිපතිවරණය පැවති සමයේදී වෛද්‍යවරුන් පමණක් සිටින රැුස්වීමකට සහභාගී වූ රජයේ වෛද්‍ය නිලධාරින්ගේ සංසදයේ සභාපතිවරයා වන වෛද්‍ය රුක්ෂාන් බෙල්ලන මහතා ජනාධිපතිවරණ අපේක්ෂකයෙක් වූ මෛත‍්‍රිපාල සිරිසේන මහතාව දැඩිව විවේචනය කරමින් කතාවක් පැවැත්වීම නිසා ඔහුට ලැබුණු අත්දැකීම සැලකිල්ලට ගත හැකිය. රුක්ෂාන් බෙල්ලන වෛද්‍යවරයා කළ කතාව එම ස්ථානයේ සිටි වෛද්‍යවරයෙකු තමන්ගේ ජංගම ¥රකථනයෙන් විඞීයෝ ගත කර තිබුණි. එය ස්වාධින රූපවාහිනි සේවයෙන් විකාශය කර තිබුණි. එම නිසා වත්මන් ජනාධිපති මෛත‍්‍රිපාල සිරිසේන මහතා බලයට ආ විගසින්ම රුක්ෂාන් බෙල්ලන මහතාට විරුද්ධව විනය පරික්ෂණයක් කැදවා තිබුණි. එම වෛද්‍යවරයාගේ වැඩ තහනම් කළ අතර, දීර්ඝ කාලයක් තිස්සේ පරීක්ෂණය ඇදී ගියේය. ඔහුට ලියාපදිංචි වෘත්තිය සමිති නායකයෙකු වීම නිසා සහනයක් ලැබුණේ නැත. එහෙත් ඔහු ප‍්‍රසිද්ධ දේශපාලන වේදිකාවට ගොඩවී තිබුණේ නැත. දැන් අනුරුද්ධ පාදෙණිය වෛද්‍යවරයා කර ඇත්තේ ප‍්‍රසිද්ධ දේශපාලන වේදිකාවකට ගොඩවීමය.


මැතිවරණ කොමිෂන් සභාව ආරම්භ කළ පරීක්ෂණය වෙනුවෙන් වෛද්‍ය පාදෙනියව ඔක්තෝබර් 29 වන දින මැතිවරණ කොමිසම් සභාවට කැඳවා තිබුණි. එහිදි නිදහසට කරුණු දක්වමින් ඔහු පවසා ඇත්තේ රජයේ වෛද්‍ය නිලධාරින්ගේ සංගමය සකස් කළ වෛද්‍යවරුන්ගේ ඉල්ලිම් ඇතුළත් ප‍්‍රතිපත්ති මාලාවක් එක්සත් ජාතික පක්ෂයේ ජනාධිපති අපේක්ෂක සජිත් පේ‍්‍රමදාස මහතාට සහ ගෝඨාභය රාජපක්ෂ මහතාට ලබා දුන් නිසා ගෝඨාභය රාජපක්ෂ මහතා ඔහුගේ ප‍්‍රතිපත්ති ප‍්‍රකාශය එළිදක්වන මොහොතේ එම වේදිකාවට ආ බවය.


රජයේ වෛද්‍ය නිලධාරීන්ගේ සංගමයේ ඉදිරිපෙළ නිලධාරීන් මේ වෙද්දී අනුරුද්ධ පාදෙණිය වෛද්‍යවරයාව ආරක්ෂා කරමින් ප‍්‍රසිද්ධියේ අදහස් දක්වමින් සිටී. වෛද්‍ය හරිත අලූ‍ත්ගේ ඇතුළු වෛද්‍යවරුන් පිරිසක් ඔක්තෝබර් 30 වැනිදා පුවත්පත් සාකච්ඡුාවක් පවත්වමිනුත් කර තිබුණේ එයයි. එහෙත් එම මාධ්‍ය සාකච්ඡුාවේදී ඔහු මැතිවරණ නිරීක්ෂණ සංවිධානවලට චෝදනා කරමින් අවලාද නගන්නටත් අමතක කර තිබුණේ නැත. මැතිවරණ ප‍්‍රචණ්ඩ ක‍්‍රියා නිරීක්ෂණ මධ්‍යස්ථානය අමාත්‍ය රාජිත සේනාරත්න සමඟ එක්ව අනුරුද්ධ පාදෙණිය වෛද්‍යවරයාට එරෙහිව කටයුතු කරන බව එහිදී කියා තිබුණි. අනුරුද්ධ පාදෙනිය වෛද්‍යවරයා ගෝඨාභය රාජපක්ෂ මහතාගේ ප‍්‍රතිපත්ති සම්පාදන ක‍්‍රියාවලියට සහභාගි වීම දේශපාලනික බව පවසනවා නම් ඔවුන්ගේ මොළ පරික්ෂා කළ යුතු බව කියා තිබුණි.


අනුරුද්ධ පාදෙණිය මහතා ආයතන සංග‍්‍රහයත්, මැතිවරණ නීතිරීතිත් උල්ලංඝනය කිරීම ගැන කතාව පසෙකින් තැබුවත්, අප බරපතල සදාචාරමය ප‍්‍රශ්නයක් ඔහුගෙන් විමසිය යුතුය. රජයේ වෛද්‍ය නිලධාරීන්ගේ සංගමයේ සාමාජිකයන් සංඛ්‍යාව 20,000කට වැඩි බව කියැවෙයි. එතරම් දැවැන්ත සංවිධානයක් නියෝජනය කරමින් ගෝඨාභය රාජපක්ෂ මහතාගේ වේදිකාවට ගොඩවීමට තිබෙන සදාචාරමය අයිතිය කුමක්ද යන්න එම ප‍්‍රශ්නයයි. එම සංගමයේ සම්පූර්ණ සාමාජිකත්වය ගෝඨාභය රාපක්ෂ හිතවාදීන් යැයි කල්පනා කරනවාද. ගෝඨාභය රාජපක්ෂ යනු කවුදැයි අපි හොඳින්ම හඳුනන්නෙමු. ප‍්‍රතිපත්ති ප‍්‍රකාශ යනු එවැනි දේශපාලන පක්ෂවලට හුදු කොළ කැබලි පමණක් බව ඒ පක්ෂවලට සහයෝගය දෙන අය පවා දනී.

නායකයාගේ පවුලේ කටවචනය හැර වෙන කිසිදු ප‍්‍රතිපත්තියක් නැති ඒ පක්ෂයේ වේදිකාවටම ගොඩවීම ගැන දේශපාලන වශයෙන් ප‍්‍රශ්න කළ යුතුය. ලංකාවේ ගෞරවණීමය වෘත්තියක් නියෝජනය කරන ගෞරවණීයම සංවිධානයක් ඒකාධිපතිවාදී දේශපාලන කණ්ඩායමක පටු අරමුණු වෙනුවෙන් වේදිකාවට නැංවීම ගැන සදාචාරමය වශයෙන් දෙන්නට තිබෙන පිළිතුර ගැන විමසිය යුතුය.

හංසි මානවඩු

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි