No menu items!
26.1 C
Sri Lanka
28 March,2024

මහේන්ද්‍රන්ගේ චිත්‍රපටියක් බලන්න

Must read

පුල්ලුම් මලරුම් ච්ත්‍රපටයේ රැ ගත කීරීම් අතර


ප්‍රභාකරන් චිත්‍රපටි රසිකයෙක්. නිදර්ශනම් නාලිකාවේ වාර්තා වැඩසටහන් අංශයේ සේවය කළ දෙමළ සිනමාකරුවෙක් වන කේසවරාජන් නවරත්නම් කියන ආකාරයට ප්‍රභාකරන් දිනෙකට එක් චිත්‍රපටියක් හෝ නැරඹුවාලු. ප්‍රභාකරන්ගේ ජීවිතය සාර්ථක හෝ කෲර එකක් ලෙස කෙනෙක්ට විග්‍රහ කළ හැකියි. එතැනට අප යන්නේ නැහැ. හොඳට හෝ නරකට ප්‍රභාකරන් කළ සියළු ක්‍රියාකාරකම්වලට ඔහුගේ සිනමා රසිකත්වය බලපෑ බව කියනවා. ප්‍රභාකරන් ජනප්‍රිය බටහිර නළුවෙක් හා අධ්‍යක්ෂවරයෙක් වන ක්ලින්ට් ඊස්ට්වුඞ්ට ඉතා කැමති බව කියනවා.


හොලිවුඞ් චිත්‍රපටිවල සිට දකුණු ඉන්දීය ජනප්‍රිය චිත්‍රපටි දක්වා සිනමාව ප්‍රභාකරන් රසවින්ද බව කියනවා. දකුණේ සිංහල චිත්‍රපටිද ප්‍රභාකරන් නරඹා තියෙනවා. ප්‍රසන්න විතානගේගේ චිත්‍රපටි බලන්නැයි කේසවරාජන්ට යෝජනා කර තිබුණේත් ප්‍රභාකරන් බව කියනවා. ප්‍රභාකරන් එල්.ටී.ටී.ඊ. පාලනය පැවති ප්‍රදේශවල සිනමාවට ලැදි පුද්ගලයන්ට සිනමාව පිළිබඳ වැඩමුළු පැවැත්වීම වෙනුවෙන් දකුණු ඉන්දියාවේ සිටින ප්‍රභාකරන්ගේ ප්‍රියතම සිනමා අධ්‍යක්ෂවරුන් දෙදෙනෙක්ට ආරාධනා කර තිබුණා. එක්කෙනෙක් භාරදිරාජා. අනෙක් අධ්‍යක්ෂවරයා මහේන්ද්‍රන්. ලංකාවට නිතර පැමිණ, සිනමාකරුවන්ට උපදෙස් ලබාදුන් අය අතර මහේන්ද්‍රන් සිටිනවා. ඒ නිසා ලංකාවේ සරුවට පැවතුණත් යුද්ධය නිසා පිටපතක්වත් සොයාගත නොහැකිව විනාශ වූ ඊළාම් දෙමළ සිනමාව තුළ මහේන්ද්‍රන්ගේ සලකුණු පැහැදිළිව තියෙන බව ඒ ගැන දන්නා අය කියනවා. යූටියුබ් අඩවියට එකල එක් කළ නිසා නැරඹීමේ හැකියාව තිබෙන ඊළාම් චිත්‍රපටි අතොළොස්ස නැරඹුවොත් ඒ කතාව සැබෑවක් බව දැනගත හැකියි. කොහොම වුණත් අපේ කතාව මහේන්ද්‍රන් ගැනයි. කතාවට නිමිත්ත මහේන්ද්‍රන් අප්‍රේල් 02 වැනිදා ජීවිතයෙන් සමුගැනීමයි.


මහේන්ද්‍රන් ප්‍රභාකරන්ගේ ආරාධනා මත ලංකාවට පැමිණි බව මුලින්ම පැවසීම ඇතැම් සිංහල පාඨකයෙක්ට මහේන්ද්‍රන්ගේ සිනමාව හා සම්බන්ධ වීමට බාධාවක් විය හැකියි. ඒත් මහේන්ද්‍රන් ප්‍රභාකරන් සමඟ කිසිදා දේශපාලන සම්බන්ධයක් පවත්වා නැහැ. ලංකාවේ අත්දැකීම් ගැන ඉන්දීය සඟරාවලට මහේන්ද්‍රන් අදහස් දක්වා තිබුණා. එක් අවස්ථාවක ඔහු කියා තිබුණේ ප්‍රභාකරන් සමඟ තමන් මුලින්ම පැය හතරක් කතාබහ කළ බවයි. ඒ පැය හතරක කාලසීමාව අවසන්ව එළියට බැස්සාට පසුව ඉතා වැදගත් යමක් සිහිවූ බව ඔහු කියනවා. ඒ ගෙවුණු පැය හතර අතරතුර ප්‍රභාකරන් එක් මොහොතකට හෝ තමන් සමඟ දේශපාලනය ගැන කතා නොකළ බවයි. පැය හතරක් තිස්සේ සිනමාව ගැන කතාකරන්නට තරම් දේවල් ප්‍රභාකරන්ට තිබුණු බවයි.
මහේන්ද්‍රන් චිත්‍රපටි 12ක් අධ්‍යක්ෂණය කර තිබෙනවා. චිත්‍රපටි 26ක පිටපත් ලියා තිබෙනවා. ඔහුගේ කිසිදා නොමැකෙන අපූරු සිනමා නිර්මාණය වන්නේ මුල්ලුම් මලරුම් චිත්‍රපටිය. එය මහේන්ද්‍රන් අධ්‍යක්ෂණය කළ පළවැනි චිත්‍රපටියයි.


දෙමළ සිනමාව ගැන අඩුවෙන් දන්නා අය රැජිණිකාන්ත්ට රඟපාන්න බැරි බව කියමින් උසුළු විසුළු කිරීම සාමාන්‍ය තත්වයක්. රැජිණිකාන්ත් බාල ජනප්‍රියත්වය සොයන නළුවෙක් බව සාමාන්‍යයෙන් කියනවා. එහෙත් රැජිණිකාන්ත් රඟපෑ චිත්‍රපටි අතරින් ඔහුගේ ප්‍රියතම චිත්‍රපටිය වන මුල්ලුම් මලරුම්හි රැජිණිගේ රඟපෑම දුටු අයෙකු කිසිදා එවැනි කතාවක් නොකියාවි. සියුම් කතාවක් කියනු පිණිස රැජිණිගේ රංගන හැකියාව මතු කරගැනීමට මහේන්ද්‍රන් මුල්ලුම් මලරුම් චිත්‍රපටියෙන් සමත් වුණා. අද මේ මොහොත වෙනතුරු රැජිණිකාන්ත්ගේ හොඳම රංගනය ලෙස සැලකෙන්නේ මුල්ලුම් මලරුම්හි කාලි නම් චරිතය.


මුල්ලුම් මලරුම් චිත්‍රපටියේ ප්‍රධාන චරිතයට යොදාගත් 1978 වර්ෂයේදී රැජිණිකාන්ත් අද අප හඳුනන ජනප්‍රිය සිනමා වීරයා නොවෙයි. ඒ කාලයේදී ඔහු සිනමාවේ දුෂ්ඨ චරිත රඟපාන නළුවෙක් ලෙස ප්‍රසිද්ධ වී සිටියා කාලි නම් චරිතය පැහැදිළි සුදු චරිතයක් නොවූ නිසා, මහේන්ද්‍රන් හිතාමතාම දුෂ්ඨයෙක් ලෙස ප්‍රසිද්ධ නළුවෙක්ව මේ චරිතයට තෝරාගත් බව කියනවා.
මුල්ලුම් මලරුම් චිත්‍රපටිය දින 100ක් තිරගත වීමෙන් පසුව දෙමළ සිනමාව තවදුරටත් එලෙසම පැවතුණේ නැහැ. දෙමළ සිනමාවේ වැදගත්ම සැතපුම් කණුවක් ලෙස මුල්ලුම් මලරුම් චිත්‍රපටිය හැඳින්විය හැකියි.


මහේන්ද්‍රන්ගේ අනෙකුත් චිත්‍රපටි ගැන වැඩි විස්තරයක් මේ කෙටි සටහනෙන් කතා නොකළද, ඔහුගේ අනෙකුත් චිත්‍රපටිත් අතිවිශිෂ්ඨ ඒවා වුණා. උදිරි පූක්කල්, ජොනී, කයි කොඩුක්කුම් කයි, නෙන්ජදයි කිල්ලාදේ ආදී ජනප්‍රියත්වය පත්වූ කලාත්මක චිත්‍රපටි ගණනාවක් මහේන්ද්‍රන් අධ්‍යක්ෂණය කළා.


මහේන්ද්‍රන්ගේ සිනමාවෙන් ඍජු ආභාෂය ලැබූ සිනමාකරුවෙක් ලංකාවේ ඉන්නවා. ඒ කේසවරාජන් නවරත්නම්. ඔහුගේ මුල් චිත්‍රපටි වන කඩලෝරකාට්ටු වැනි චිත්‍රපටිවල ඒ ආභාෂය තියෙනවා. කේස්වරාජන්ද කියන්නේ ඔහුගේ සිනමාවේ පියා මහේන්ද්‍රන් වන බවයි. ඔහු අප සමඟ මෙසේ කීවා.


‘මගේ අම්මාත් මහේන්ද්‍රන් අධ්‍යක්ෂවරයාත් ඉපදුණේ 1939 දී. ඔවුන් දෙදෙනා ඉපදුණේ ඉතා කෙටි කාලසීමාවකදී. ඔහු ලංකාවට පැමිණ සිනමාව ඉගැන්වූ කාලයේදී මට ඒ තරම් ඉගෙනගන්න අවස්ථාව ලැබුණෙ නැහැ. එහෙත් ඔහුගේ සිනමාව මට තදින්ම බලපෑවා. අපි පුංචි කාලයේ ඉඳන්ම සිනමා නළුවෝ වෙන්න හිතපු අය. ඒ වෙනුවට කතා ලියන්න, අධ්‍යක්ෂණය කරන්න අසාවක් ඇතිවෙන්නට මහේන්ද්‍රන්ගේ වැඩ ප්‍රධාන හේතුවක් වුණා. මගේ අම්මා මාස කිහිපයකට කලින් මියගියා. මම ලොකු වේදනාවකින් හිටියේ. සතියකට පමණ කලින් මහේන්ද්‍රන් මහත්තයාත් අසනීප වෙලා අසාධ්‍ය තත්වයේ සිටින බව මට ආරංචි වුණා. මහේන්ද්‍රන් මරණයට පත්වූ බව දැනගන්න ලැබෙද්දීත් මම හිටියේ කම්පනයට පත්වෙලා. මගේ ජීව විද්‍යාත්මක අම්මාත්, සිනමාවේ පියාත් එක ළඟ කාලසීමාවක මියගියා.‘


මහේන්ද්‍රන්ගේ සිනමා ආගමනය හා එම්.ජී.ආර්. සමඟ තිබුණු බැඳීම ගැනත් කෙටියෙන් කිව යුතුයි. මහේන්ද්‍රන්ගේ මුල් නාමය ජේ. ඇලෙක්සැන්ඩර් නම් වුණා. ඔහු අලගප්පා කලා විද්‍යාලයේ ඉගෙනුම ලැබූ කාලයේදී එම්.ජී.ආර්. හෙවත් දෙමළ ජනප්‍රිය සිනමාවේ නළු රජු සහභාගී වූ උත්සවයක් පැවති බව කියනවා. ඒ උත්සවයේදී කතාවක් පැවැත්වූ තරුණ ඇලෙක්සැන්ඩර් ජනප්‍රිය දෙමළ සිනමාව දැඩිව විවේචනය කරමින් අදහස් පළ කර තිබෙනවා. ඒ කතාව ගැන සතුටට පත්වූ එම්.ජී.ආර්. කියා තිබෙන්නේ මහේන්ද්‍රන්ට හොඳ සිනමා විචාරකයෙක් විය හැකි බවයි.


ඉන්පසුව කෙටි කාලයකට නීති අධ්‍යාපනයට යොමුවූ ඔහු පසුව නැවතත් මාධ්‍යවේදියෙකු ලෙස නැවත රැකියාව අරඹා තිබෙනවා. ඉන්පසුව නැවතත් එම්.ජී.ආර්.ව මුණගැසුණාට පසුව පොන්නියින් සෙල්වන් පිටපත ලියන්නැයි එම්.ජී.ආර්. ඔහුට ආරාධනා කර තිබෙනවා. පොන්නියින් සෙල්වන් නම් පුරාණ කතාව ඇසුරෙන් ඒ පිටපත ලිවීමටයි ආරාධනා කර තිබුණේ. මේ පිටපත ඇසුරෙන් නිර්මාණය කළ චිත්‍රපටියේ රූගත කිරීම් මඟ නැවතුණත්, එම්.ජී.ආර්. තමන් රඟපෑ ඊළඟ චිත්‍රපටිය වූ කාන්චි තලයිවාන් නම් චිත්‍රපටියේ සහාය අධ්‍යක්ෂ ලෙස තෝරාගන්නැයි මහේන්ද්‍රන්ව නිර්දේශ කර තිබෙනවා. එතැන් පටන් මහේන්ද්‍රන්ගේ හැකියාවට උපරිම වටිනාකමක් දෙන්නට එම්.ජී.ආර්. උත්සාහ කළ බව කියනවා. එක් වතාවක් සිනමාව එපා වී සිනමාවෙන් ඈත්ව සිටියදී නැවත සිනමාවට එන්නැයි කියමින් මහේන්ද්‍රන්ව සිනමාවේ තබාගැනීමටත් එම්.ජී.ආර්. කටයුතු කර තිබෙනවා.


මහේන්ද්‍රන්ට එම්.ජී.ආර්. හා රැජිණිකාන්ත් සමඟ තිබෙන සම්බන්ධය දෙමළ සිනමාවේ කලාත්මක පාර්ශ්වය හා වාණිජමය පැත්ත අතර තිබෙන සමීප බැඳියාවත් පැහැදිළි කරවනවා. ලංකාවේ සිනමාවේ ජනප්‍රිය සිනමාකරුවන්ට කලාත්මක සිනමාව අවබෝධ නොවීමත්, කලාත්මක සිනමාකරුවන්ට වාණිජමය සිනමාව අවබෝධ නොවීමත් මහා ඛේදවාචකයක් බව අමුතුවෙන් කිව යුතු නැහැ. කොහොම වෙතත් ඉන්දීය සිනමාවේ සිටි වටිනාම අධ්‍යක්ෂවරයෙක් ජීවිතයෙන් සමුගත්තා. ඔහුගේ චිත්‍රපටියක් දෙකක් නරඹන්නැයි යෝජනා කිරීම මිස අන් කිසිදු යෝජනාවක් අපට නැහැ.

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි