පසුගිය 26 වැනි සිකුරාදා හවස කොළඹ සිට ගෙදර යමින් සිටියෙමි. බසය ගමනාන්තයට ළං වෙන්විට රියදුරු මහතාට කොන්දොස්තර මහතා කියනු ඇසුනේ මහින්ද රාජපක්ෂ මහතා අගමැති ලෙස දියුරුම් දී ඇති බවය. ඉන්පසු ඔවුන් අතර මත ගැටුමකි. කියන කියුම් අනුව එජාප පාක්ෂිකයෙකුයැයි සිතිය හැකි රියදුරා කීවේම උබ බොරු නොකියා හිටපං කියා ය. කොන්දොස්තර මහතාද ඇරියේ නැත. ඔහු කතාකලේ ඔහුගේ ජීවිතයේ තිබූ ලොකුම ගැටලූ‍වක් විසඳුන ආකාරයටය. අද හොඳට බොන්න පුළුවන් ඔහු කියනවා ඇසුණි. ඒ මහින්ද රාජපක්ෂ පත්වූ සතුටට ය. මම මේ හතර බීරි කතාව අසාගෙන සිටියෙමි. අන්තර් ජාල පහසුකමත් නැත්තේ දුරකථනයේ බැටරි බැස එය නිවී තිබූ නිසාය. මම බසයෙන් බැස අසල කඩයකට දිව ගියෙමි. කතාව හරිය මම කොළඹින් බසයට නගිනවිට තිබුණු ආණ්ඩුව ගාල්ලෙන් බසින විට වෙනස් වී තිබුණි. ඒ අම්මටසිරි ලංකාවේ හැටිය. ව්‍යාවස්ථාවේ සියලූ ප‍්‍රතිපාදන සුනු කරමින් ප‍්‍රජාතන්ත‍්‍ර විරෝධී ලෙස ප‍්‍රජාතන්ත‍්‍රවාදය ප‍්‍රවර්ධනය කරන්න හැටදෙලක්ෂයක් දෙනාගේ මනාපයෙන් පැමිණි මෛත‍්‍රීපාල සිරිසේන ජනාධිපතිවරයා කටයුතු කර තිබුණේ එලෙසය. රනිල් වික‍්‍රමසිංහ මහතා බලයෙන් පහ කිරීමද අලූ‍ත් අගමැති ලෙස මහින්ද රාජපක්ෂ පත් කිරීමටද සුළු කාල පරතරයකදී සිදුකර තිබුණි. මේ පත්කිරීම කන වැකුණු විට මට සිතුනේ 113ක සරල බහුතරයක් මන්ත‍්‍රීවරුන් මහින්ද අගමැති ලෙස පිළිගනු ඇතැයි කියාය. එහෙත් පසුව ගොඩනැගුණු තත්ත්වයන් කීවේ සිරිසේන ජනාධිපතිවරයා අගමැතිවරයා පත්කර ආණ්ඩුවක් සැදීම සඳහා 113 ක් මන්ත‍්‍රීවරුන් සොයමින් සිටින බවය. මේ අනුව පෙනෙන්නෙ දැනුවත්ව ව්‍යවස්ථාව උල්ලංඝනය කලා මදිවට ඔහු දැනුවත්වම රට අරාජික කර ඇති බවය. ඔහුගේ මේ මුග්ධ ක‍්‍රියාව නිසා දැන් රට තුළ ආණ්ඩු දෙකක් ඇත. එක ආණ්ඩුවක් ව්‍යාවස්ථාවට එකඟ නීතියට එකඟ රනිල් වික‍්‍රමසිංහ ආණ්ඩුවය. අනික නැති බලයක් පවරාගෙන අත්තනෝමතිකව ක්රියාත්මක, විධායකයේ තේජසින් සහ ඉන්ධන වලින් දුවන නීතියට පටහැනි ලොකයේ කිසිදු රටක් තවමත් නීතියානූකූලව පිළිගෙන නැති මහින්ද රාජපක්ෂ ආණ්ඩුවය. අහෝ! මේ අරාජිකත්වය නොවන්නේද?..
කුමන්ත‍්‍රණය
මේ කුමන්ත‍්‍රනය ගැන බොහෝ දේවල් මේ සතියේ අනිද්දා තුළ ලියවෙනු ඇත. මේ එහි එක් පැත්තකි. ජනාධිපතිවරයා සහ අගමැතිවරයා අතර කාලයක් තිස්සේ පැවති සීතල යුද්ධය මේ කුමන්ත‍්‍රණයේ හදවත බව බොහෝ දෙනෙකු කියයි. එම සීතල යුද්ධයට හේතුව සිරිසේන ජනාධිපතිගේ ඊගෝ ප‍්‍රශ්නයක් ලෙසද කෙනෙකුට දකින්නටද පුළුවන් ය. එය මෛත‍්‍රී නියෝජනය කරන සිංහල මැදපන්තිය සහ රනිල් නියෝජනය කරන නාගරික ඉංග‍්‍රීසි බස වහරන පන්තිය අතර ප‍්‍රශ්නයක් ගැටුමක් සේද කෙනෙකුට දකින්නට පුළුවන් ය. ගමේ භාෂාවෙන් කියන්නේ නම් මෛත‍්‍රීට රනිල් සෙට් වී නැත. එය මෛත‍්‍රීපාල ජනාධිපතිවරයා ජාතිය අමතා කළ කතාවෙන්ද ඔප්පු වන්නේය. මේ ගැටුමේ ප‍්‍රතිඵලයක් ලෙස නාමල් කුමාර නම් චරපුරුෂයෙකු වේදිකාවට නගින්නේය. ඔහු කුමන්ත‍්‍රන කතාවක් ගොතන්නේ ය. ඒ කුමන්ත‍්‍රන නූල් බෝලයේ පැටළෙන සිරිසේන ජනාධිපතිවරයා එජාපයේ නියෝජ්‍ය නායක සජිත් පේ‍්‍රමදාස මහතාට 6 වරක් පමණ කතාකර ඉල්ලීම් කර ඇත්තේ අගමැතිකම බරගන්නට කියා ය. සජිත් පේ‍්‍රමදාස මහතා එයට එකගවී නැති බව දැනගන්නට ලැබෙන්නේය. ඒ ඔහුට එජාපය තුළ විශාල මන්ත‍්‍රී කණ්ඩායමක් නැති නිසාදැයි අපි දන්නේ නැත. කෙසේ හෝ අවසානයේ මහින්ද රාජපක්ෂ මහතා අගමැති ලෙස දියුරුම් දෙන්නේ ය. ඒ රටේ මූලික නීතියට පිටින් ය.
තටුකපා 19 වැනි ව්‍යවස්ථාව සංශෝධනය පාර්ලිමේන්තුවේදී සම්මත කරගත්තද, නැවත ජනාධිපති තරගයට නොයෙන්නේ මැයි සපථ කර කීවද, ජනපති මෛත‍්‍රී හට දෙවනි ධූර කාලයක් පිළිබඳව සිත තුළ ආසාවක් තිබෙන්නෙට ඇත. එම ආසාව ඉටුකරගැනීමට මහින්ද රාජපක්ෂ මහතා සහය දෙන්නට ඉදිරිපත්වී ඇති බව දැන ගන්නට ලැබෙන්නේය. පාඩුවක් නැත. මෙමගින් මහින්ද රාජපක්ෂ මහතාට සහ එම පවුලේ උදවියට බොහෝ දේවල් ලබා දෙනවා ඇත.
බියකරු අනාගතය
තාජුඞීන් ඝාතනය, එක්නැළිගොඩ අතුරුදන් කිරීම, කීත් නොයාර් පැහැරගෙන යෑම ආදී සිද්ධීන් මුල්කරගත් පරීක්ෂණවලදී අනාවරණය වී තිබෙන තොරතුරු අනුව මේ බොහෝ අපරාද සඳහා රාජපක්ෂවරුන් සම්බන්ධ බවට සැක කෙරෙන්නේ ය. මිග් යානා ගනුදෙනුව, ඬේසි ආච්චීගේ මැණික් මල්ල ආදී සිද්ධීන් පිළිබඳව එෆ් සී අයි ඞී ය මෙහෙයවන පරීක්ෂණවල තත්ත්වයමද එයමය. මෙම පරීක්ෂණ පසුගිය කාලයේදී රාජපක්ෂවරුන්ට මහත් හිසරදයක් වූ බවට සැක නැත. මෙම තත්ත්වය තුළ අගමැතිකම පිළිගෙන ආණ්ඩුවක් සෑදීමේ යටි අරමුණ මේ පරීක්ෂණ අවසන් කරගැනීම විය හැකිය. තත්ත්වය මෙසේ තිබියදී දැනගන්නට ලැබෙන්නේ එෆ් සී අයි ඞී ය සතු සමහර පරීක්ෂණ වලට අදාළ ගොනු මේවනවිට අයදින්නට ගොස් නැවත පැමිණෙන බවය. එලෙස පැමිණෙන විට එෆ් සී අයි ඞී යෙන් පිටවූ ගොනුවේ බර අඩුවී ඇතැයි පොලීසිය දෙසින් එන ආරංචි ප‍්‍රකාශ කරයි. මහින්ද රාජපක්ෂ මහතා නීතියට පිටින් අගමැති ලෙස පත්වූ දාට පසුදින පොලිස්පති පූජිත් ජයසිංහ ඔහු හමුවී ඇත. එම හමුවට හිටපු ආරක්ෂක ලේකම් ගෝඨාභය රාජපක්ෂ මහතාද සහභාගිවී ඇත. ඉන්අනතුරුව නියෝජ්‍ය පොලිස්පති ලතීෆ් මහතාද මහින්ද රාජපක්ෂ මහතා මුණගැසී ඇත. මේ තත්ත්වය තුළ පොලීසිය ඉහත ආකාරයෙන් කටයුතු නොකරන්නේනම් පුදුමයකි. තත්ත්වය මෙසේ නම් මෙම පරීක්ෂණ මෙහෙයවූ පොලිස් නිළධාරීන්ට අත්වන්නට නියමිත ඉරණම පිළිබඳව සිතාගත හැකිය. ඔවුන් දැන් බියෙන් පසුවෙනවා නියතය. අනෙක් පැත්තෙන් මෙලෙස ඝාතනය හෝ අතුරුදන් වූවන් පිළිබඳව, ඔවුන්ට යුක්තිය ඉටුකරගැනීම පිළිබඳව වෙහෙසෙන මිනිසුන්ට ඉදිරියේදී මෙම තත්ත්වය තවදුරටත් පැවතියහොත් සිදුවන්නට නියමිත දේ බියකරුය.
මේ තත්ත්වය පිළිබඳව අදහස් දක්වන ප‍්‍රගීත් එක්නැළිගොඩගේ බිරිඳ සන්ද්‍යා එක්නැළිගොඩ කියා සිටින්නේ ජනාධිපතිවරයා තමන්ගේ ඡුන්දය කොල්ලකෑවා මදිවට තමන්ගේ, තම දරුවන්ගේ අනාගතයද අන්තුරේ හෙළා ඇති බවය. මේ ඉදිරියේදී උදාවන්නට නියමිත අනතුරේ සහ දැන් සිද්ධ වෙමින් තිබෙන ව්‍යසනයේ වර්තමාන තත්ත්වයයි. මේ අරාජික සමයෙන් පසුව නැවත කොල්ලකාරී භීෂණකාරී යුගයක් උදාවන්නට නියමිතය. රාජපක්ෂ ඉතිහාසය කියන්නේ එයයි. ඒනිසා වළදමනු ලැබූ එම ඉතිහාසය ජනාධිපති සිරිසේනට ගොඩගන්නට දෙන්නට බැරිය.
කුණු මාළු මන්ත‍්‍රී ජීවිත
මේ ලිපිය ලියන පසුගිය 31 වැනි දිනය වනවිට වෙළෙඳපොළේ මන්ත‍්‍රීවරයෙක් ගේ මිල ලෙස සටහන් වූවේ රුපියල් ලක්ෂ 5000ක මුදලක් ය. ඒ කෝටි 25ක සිට මිල වැඩිවූ ප‍්‍රමාණයයි. මේවනවිට පාර්ලිමේන්තු මන්ත‍්‍රී දුනේෂ් ගන්කන්ද , ආනන්ද අලූ‍ත්ගමගේ, වසන්ත සේනානායක, වඩිවෙල් සුරේෂ්, විජේදාස රාජපක්ෂ යන පිරිස මහින්ද රාජපක්ෂ පාර්ශවයට එකතුවී, ඇමති තනතුරුද රාජ්‍ය ඇමති තනතුරුද ලබා ඇත. දුනේෂ් ගන්කන්ද ජනාධිපති මෛත‍්‍රීපාල සිරිසේන සහ මහින්ද රාජපක්ෂ හමුවෙන විඩියෝවක් මුහුණු පොතේ සංසරණය වෙමින් තිබෙන්නේ ය. එම විඩියෝවට අනුව,
එම අවස්ථාව විඩියෝ ගතකර තිබෙන්නේ ජනාධිපති සොයුරු ඩඞ්ලි සිරිසේනය. ඔහු ප‍්‍රකට ව්‍යාපාරිකයෙක් බව ප‍්‍රකටය. දුනේෂ් ගන්කන්ද යනු කැසිනෝ නිසා ආර්ථිකය විනාශකරගත් පුද්ගලයෙක් බව බොහෝ දෙනෙක් දන්නා සත්‍යක්‍ ය. මෑතකාලයේදී ඔහු ආර්ථික පැත්තෙන් විශාල ප‍්‍රශ්න ගොඩක පැටලී සිටි අයෙක් බවද දැන ගන්නට ඇත. ඞීල් දමන්නට රුසියන් සොයා යන්නේ මෙවැනි පුද්ගලයින්ය. එවැනි පුද්ගලයන් තව ඕන තරම් බව පාර්ලිමේන්තුව නියෝජනය කරන බොහෝ දෙනෙකුගේ මතයයි. දුනේෂ් ගන්කන්ද යයි කියා එජාපයේ කිසිවෙකු සිතුවේ නැත. ඔහු පාර්ලිමේන්තුව වහා විවෘත කරන්න යැයි කොළඹ පැවති ජනහමුවට පුද්ගලයින් සහභාගී කළ බවද දැනගන්නට ඇත. අනෙක් පැත්තෙන් වසන්ත සේනානායක එහෙට මෙහෙට් දෙපැත්තටම පැනපැන සිට අන්තිමේදී ඇමතිකමක් ගත්තේය. වඩිවේල් සුරේෂ් ද ඔහුට දෙවෙනි නොවේ. මේ ජනතා පරමාධිපත්‍ය විකිණෙන අයුරුය. හිරුණිකා පේ‍්‍රමචන්ද්‍ර මන්ත‍්‍රීතුමියටද ලක්ෂ 2500ක ලංසුවක් මුල්ම අවස්තාවේ ලැබී ඇත. මේ ලියුම්කරු කතාකළ එජාපයේ එක් මන්ත‍්‍රීවරයෙක් කීවේ මේවනවිට තමන්ගේ මන්ත‍්‍රී ධූරයට ලංසු ඉදිරිපත් කිරීම සාමන්‍ය දෙයක් වී ඇතිබවය. ව්‍යාපාරිකයින්, අදාළ මන්ත‍්‍රීවරුන්ගේ හිතවතුන් බිරින්ඳෑවරුන් මාර්ගයෙන් මේ ගනුදෙනු කතා සිද්ධ වෙනබව දැනගන්නට ලැබේ. මන්තී‍්‍ර බිරින්ඳෑවන් මෙම විකුණුම් ක‍්‍රියාවලියට බොහෝ කැමතිබවද එනිසා ඔවුන්ගේ මැදිහත්වීම වැඩි බවද දැනගන්නට ලැබේ. මෛත‍්‍රීපාල සිරිසේන පාර්ශවයෙන් මන්ත‍්‍රීවරුන් බිලීබා ගැනීමේ ක‍්‍රියාන්විතය බැසිල් රාජපක්ෂ, ඩඞ්ලි සිරිසේන, චතුරිකා සිරිසේන ආදීන්ගේ මැදිහත්වීමෙන් සිදුවන බව දැනගන්නට ලැබේ. අපි වටිනවා යැයි කියන පරමාධිපත්‍ය බලයට අද ලංකාවේ වටිනාකමක් ලැබෙන්නේ එසේය. සෝභිත හිමියන් මේ ගෙබි නාටකය අවසන් කිරීමට ව්‍යවස්ථාවට වගන්තියක් ඇතුළත් කරන්නට යෝජනා කළ විට පාර්ලිමේන්තුව නියෝජනය කළ බොහෝ දෙනෙකු එයට විරෝධය දක්වනු ලැබීය. දැන් එයට හේතුව පැහැදිලිය.
මීට අමතරව එජාපය පාර්ශවයෙන්ද මන්ත‍්‍රීවරුන් බා ගැනීමේ මෙහෙයුමක් ඇරඹී ඇත. මෙම මෙහෙයුම් දෙකෙන් ජයග‍්‍රහනය කරන්නේ කවුරුන්ද ප‍්‍රශ්නාර්ථයකි. මේ මන්ත‍්‍රීවරුන් බිලී බාගන්නා මෙහෙයුම අවසන් වනතුරු නොයිද ජනාධිපතිවරයා වහාම පාර්ලිමේන්තුව කැඳවිය යුතුය. නැතිනම් රට අදුරෙන් අදුරට යනවා නියතය. නැතිනම් කථානායකවරයා මැදිහත් වී පාර්ලිමේන්තුව කැඳවා පාර්ලිමේන්තු සාම්ප‍්‍රදාය ආරක්ෂා කළ යුතුය.
