No menu items!
27.5 C
Sri Lanka
29 March,2024

ධම්මික පෙරේරා ලංවිමට සුදුසු නැත

Must read



“ඔක්තෝබර් විසිහය වැනිදා ඇතිවූ ඒ අවාසනාවන්ත සිද්ධිය නොවන්නට නම්’ යනුවෙන් මේ රටේ ඇති වූ ව්‍යවස්ථා කුමන්ත්‍රණය හඳුන්වනු ලබන්නේ එජාප නියෝජ්‍ය නායක සජිත් ප්‍රේමදාසය. ඒ බාධක දිවීමේ ඉසව්වෙන් ශ්‍රී ලංකාවට ජාත්‍යන්තර පදක්කමක් ලබාදුන් පාරමී මාරිස්ටෙලා දැරියට නිවසක් පරිත්‍යාග කිරීමේ උත්සවයකට සහභාගිවෙමින් දෙසැම්බර් 26 වැනිදාය. සජිත් ප්‍රේමදාස එහිදී කියන්නේ ඔහුට අනුව (අපට අනුව නොව) එම අවාසනාවන්ත සිද්ධිය ඇති නොවන්නට මීට පෙර පාරමී දැරියට මෙම නිවස පරිත්‍යාග කරන්නට කටයුතු සම්පාදනය කර තිබූ බවය.
ඔක්තෝබර් 26 ඇති කරන ලද ජනාධිපති මෛත්‍රීපාල සිරිසේනගේ ව්‍යවස්ථා කුමන්ත්‍රණ ආරම්භයේ සිට එය අවසන් කෙරුණු දින දක්වාම (තවමත් අවසන් නැත) එජාපය කැඳවූ සියලු ප්‍රසිද්ධ විරෝධතා රැලිවලදී ද මාධ්‍ය හමුවලදීද ඔක්තෝබර් 26 වැනිදා ඇති වූයේ ව්‍යවස්ථා කුමන්ත්‍රණයක් බවත් එහි නිර්මාතෘ ජනාධිපති මෛත්‍රීපාල සිරිසේන බවත්, එම කුමන්ත්‍රණය පරාජය කළ යුතු බවත් එජාප නියෝජ්‍ය නායක සජිත් ප්‍රේමදාස කීවේ නැත. ඒ වෙනුවට ඔහු දෛනිකව කැමරාව දිගු කරන නාලිකාවලට ඔහු හැමදාම කියන වගාදිගා කථා ටික නම් කීවේය. වෙනසකට තිබුණේ ඔහුගේ පියා මෙන් ‘තමාව මැරුවත්’ යන දේශප්‍රේමියැයි කියා ගන්නා කෛරාටිකයන් භාවිත කරන වචනයක් දෙකක් ඇදබෑම පමණය.
කොළඹ විහාරමහාදේවි උද්‍යානය ඉදිරිපට දින 50ක අධික කාලයක් පැවති ව්‍යවස්ථා විරෝධි කුමන්ත්‍රණය පරාජය කිරීමේ සත්‍යග්‍රහය සජිත් ප්‍රේමදාසට අරහං විය. එජාප නායක රනිල් වික්‍රමසිංහ ඇතුළු අනෙකුත් එජාපෙ නායකයන් ඇතුළු එජාප නියෝජනය කරන මන්ත්‍රීවරුන් එම සත්‍යග්‍රහයට ආවද සජිත් ප්‍රේමදාස එම සත්‍යග්‍රහයට වාඩිවීමට තබා ටවුන්හෝල් ප්‍රදේශය හරහා යනවිට එම සත්‍යග්‍රහය බලන්නට පවා ආවේ නැත.
ඒ ආකාරයටම ව්‍යවස්ථා කුමන්ත්‍රණය පැරදවීමේ එම සත්‍යග්‍රහයත්, ව්‍යවස්ථා කුමන්ත්‍රණය හා එහි නිර්මාතෘ ජනාධිපති මෛත්‍රීපාල සිරිසේන බවත් කීම මඟහරිනු ලැබූ අනෙක් කැපී පෙනෙන එජාප නායකයා වුයේ එජාප උපනායක රවි කරුණානායකය. ඔහු නියෝජනය කරන ආසනය කොළඹ නගරයට අයත් උතුරු කොළඹ වුවද එම සත්‍යග්‍රහයට ඔහුගෙන් ලැබුණු දායකත්වයක් නොවිය.
ඊට හේතු නම් පැහැදිලිය. මේ එජාප නායකයන් දෙදෙනාම එජාප නායක රනිල් වික්‍රමසිංහ සමගත්, එජාපය සමගත් දැඩි නොපහන්කමකින් සිටි දෙදෙනෙකු වීමය. සජිත් ප්‍රේමදාස කණ්ඩායම් ගැසී එජාප ඊළඟ නායකත්වය ඔහුගේ ඔඩොක්කුවට වැටෙන්නේ කොයිවෙලේදැයි බලා සිටියේය. රවී කරුණානායකද නැවත ඔහුට මුදල් ඇමතිකම ලැබෙන්නේ කොයිවෙලේදැයි බලාගෙන සිටියේය. ඒ නිසාම මේ දෙදෙනාට ජනාධිපති සිරිසේන සමග රහස් ළඟ සබඳතාවක් තිබුණේය. ඔක්තෝබර් 26 වැනිදා ජනාධිපතිවරයා කුරුණෑගල දිස්ත්‍රික් මන්ත්‍රී මහින්ද රාජපක්‍ෂ සමග කරන ලද කුමන්ත්‍රණයේදී කුමන්ත්‍රණ ආණ්ඩුවට එකතු වෙතැයි ගණන් බලා තිබූ එජාප මන්ත්‍රීවරුන් යනු මේ දෙදෙනා හා ඔවුන්ට පක්ෂපාත මන්ත්‍රීවරුන්ය. නැවත ඇමති පදවි බාරගෙන ජනාධිපති ලේකම් කාර්යාලයෙන් එළියට බසින විටම ජනාධිපතිවරයාගේ කූප්‍රකට දේශනය හොඳින් හදවතට ගත් බව සජිත් ප්‍රේමදාස කියන්නේ ඒ නිසාය. ඉනුත් එහාට යමින් ජනාධිපතිවරයාට දෝෂාභියෝගයක් ඉදිරිපත් කිරීමට එජාපයට අදහසක් නැති බව කියන්නේද ඒ නිසාය.
මේ ව්‍යවස්ථා කුමන්ත්‍රණයට පෙර දේශපාලන ඕපාදුප තීරු ඇතුළු වෙබ් අඩවිවල පළවූයේ නැවත මුදල් ඇමතිධුරය රවී කරුණානායකට ලබාදීමට ජනාධිපතිවරයා කැමති බවත් අග්‍රාමාත්‍ය රනිල් වික්‍රමසිංහගේ කැමැත්ත ඇත්නම් එම පත්කිරීම සිදුකිරීමට ජනාධිපතිවරයා කැමති බවට රවී කරුණානායකට කියා ඇති බවය. එහෙත් එම මාධ්‍ය වාර්තා කිසිවක් රවී කරුණානායක ප්‍රතික්‍ෂේප කළේ නැත.
නව අමාත්‍ය මණ්ඩල දිව්රුම්දීමේදී රවී කරුණානායකගේ එම සිහිනය බොඳවී ගොස් තිබුණි. ඔහුට මුදල් ඇමතිකම ලැබුණේ නැත. ඒ වෙනුවට ලැබුණේ විදුලිබල හා බලශක්ති ඇමතිකමය. ඊට රවී කරුණානායකගේ කැමැත්තක් නැති බවද ඔහුට මුදල් ඇමතිධුරය ලබාදෙනවාට එජාපය පැත්තෙන් විරෝධයක් ආ බවද මාධ්‍ය වාර්තා කර තිබුණි. ඒ ඒ අමාත්‍යාංශවලට අයත් විෂය පථයන් කුමක්ද යන්නත්, එම විෂය පථයන් අදාළ රාජ්‍ය ආයතන කුමක්ද යන්නත් පිළිබඳව ව ගැසට් පත්‍රය ජනාධිපතිවරයා තවම ප්‍රකාශයට පත්කර නැත. එහෙත් විදුලිබල හා බලශක්ති අමාත්‍යාංශය යටතට වැටෙන ප්‍රධාන ආයතනය ලංකා විදුලිබල මණ්ඩලය වන බවට සැකයක් නැත. (රාජ්‍ය මාධ්‍ය ආයතන ජනමාධ්‍ය අමාත්‍යාංශය යටතට පත් නොකර ජනාධිපතිවරයා යටතේ ඇති ආරක්ෂක අමාත්‍යාංශය යටතටද පත්විය හැක.)
මේ කියන ලංකා විදුලිබල මණ්ඩලයේ සභාපති ධුරයට ප්‍රකට ව්‍යාපාරික ධම්මික පෙරේරා පත්කරන්නට විෂයභාර අමාත්‍ය රවී කරුණානායකගේ කැමැත්ත බවත්, ඔහු ඒ සඳහා ධම්මික පෙරේරාට ආරාධනා කර ඇති බවත් වෙබ් මාධ්‍ය වාර්තා කර ඇත. එවැනි පත්කිරීමක් තවම සිදුකර නැතත් එවැන්නක් සමහරවිට ඉදිරියේදී සිදුවිය හැක. මේ සටහන ඊට පෙර ඒ ගැන කෙරෙන අනතුරු හැඟවීමක් ය.
කවුරුත් දන්නා පරිදි ව්‍යාපාරික ධම්මික පෙරේරා යනු රාජපක්‍ෂවරුන්ගේ ළඟම හිතවතෙකි. රාජපක්ෂ ආණ්ඩු සමයේදී ඔහුට ශ්‍රී ලංකා ආයෝජන මණ්ඩලයේ සභාපති ධුරය පමණක් නොව මහාමාර්ග අමාත්‍යාංශයේ ලේකම් ධුරයද ලැබුණි. මේ ධම්මික පෙරේරා ආණ්ඩු පෙරළියෙන් පසු ජනාධිපති මෛත්‍රීපාල සිරිසේන සමග මිත්‍රකමක් ගොඩනගා ගැනීමට ශ්‍රීලනිප ඇමතිවරයෙකු සමග ජනාධිපතිවරයා හමුවන්නට ගොස් ඇති බවත්, එහිදී ජනාධිපතිවරයාට කරන උපකාරයක් වශයෙන් ජනාධිපතිවරයාගේ පවුලෙන් ආ ව්‍යාපෘතියක් වෙනුවෙන් දේශීය නියෝජිතයා වශයෙන් ඔහුගේ ‘ඩිමෝ’ ආයතනයේ නම ලබාදී ඇති බවත් අපි වාර්තා කළෙමු. ඒ ‘ස්විස් චැලෙන්ජ්’ ජනාධිපතිගේ අලුත් ටෙන්ඩර් සෙල්ලම’ යනුවෙන්ය. එමඟින් සිදුකරන්නට යන්නේ ශ්‍රී ලංකාවේ විදුලි බලාගාරවලට අවශ්‍ය ස්වාභාවික ගෑස් සැපයීමට හා එම ගෑස් ගොඩබෑමට ශ්‍රී ලංකා මුහුදේ පාවෙන ගෑස් ගබඩා පර්යන්තයක් ඉදිකිරීමය. එම ව්‍යාපෘතිය ඉදිරියට යන බව කෙටි කුමන්ත්‍රණ ආණ්ඩු කාලයේදී විදුලිබල හා බලශක්ති අමාත්‍යංශය ඬේලි නිව්ස් පුවත්පතේ පළකළ දැන්වීමකින් ප්‍රත්‍යක්‍ෂ විය. එම පාවෙන ගෑස් ගබඩා පර්යන්තය ඉදිකිරීම සඳහා ස්වෙච්ඡා යෝජනාව ගෙන ආ ජනාධිපතිවරයාගේ සමාගමට ප්‍රතිවිරුද්ධ යෝජනා ඇත්නම් ඉදිරිපත් කරන ලෙසට එමඟින් දන්වා තිබුණි.
මේ පාවෙන ගෑස් ගබඩා පර්යන්තය සමග ලංකා විදුලිබල මණ්ඩලයට ඇත්තේ අත් නොහැරෙන සම්බන්ධතාවකි. මන්ද ලංකාවේ ඇති සියලු බලාගාරවලින් විදුලිය මිලදී ගැනීම සිදුකරන්නේ ලංකා විදුලිබල මණ්ඩලය බැවින්ය. එමෙන්ම පෞද්ගලික අංශය සතු බලාගාර කිහිපය හැරුණු විට අනෙකුත් බලාගාර අයත් වන්නේත් ලංකා විදුලිබල මණ්ඩලයට බැවින්ය.
ඒ අනුව විදුලිබල ක්ෂේත්‍රයට සම්බන්ධ ව්‍යාපාරිකයෙකු ලංකා විදුලිබල මණ්ඩලයේ සභාපතිවරයා වශයෙන් පත්කිරීම රාජපක්‍ෂ සිරිසේන ආණ්ඩුවකට අදාළ වුවද, ඊට ප්‍රතිපක්‍ෂව පිහිටුවූ ආණ්ඩුවකට කිසිසේත් සුදුසුවන්නේ නැත. මෙහිදී මතුවන්නේ ළැදියාවන් අතර ගැටුමක් බැවින්ය.
එපමණක් නොවේ. මේ පාවෙන ගෑස් පර්යන්ත ව්‍යාපෘතිය නොමැති වුවද ව්‍යාපාරික ධම්මික පෙරේරා ලංකා විදුලිබල මණ්ඩලයේ සභාපති ධුරයට පත්වීමෙන් එම ළැදියාවන් අතර ගැටුම ඇතිවන්නේය. ඒ ඔහු කොටස් හිමිකාරිත්වය දරන හේලීස් සමාගමත්, වැලිබල් සමාගමත්, කුඩා ජල විදුලි බලාගාර, සුළං විදුලිබලාගාර හා සූර්ය විදුලිබලාගාරවල හිමිකාරිත්වය දරන බැවින්ය.
රවී කරුණානායකත් ජනාධිපතිත් අතර තිබෙන සම්බන්ධය නිසා ජනාධිපතිවරයා රවී කරුණානායක ගෙන් ධම්මික පෙරේරා ලංවිමට පත්කරන ලෙස ඉල්ලීමක් කළා වන්නට පුළුවන. නැත්නම් මෙය රවී කරුණානායකගේම අදහසක් විය හැකිය.
ඒ කෙසේ වෙතත් ලංකා විදුලිබල මණ්ඩලයේ සභාපතිධුරයට ව්‍යාපාරික ධම්මික පෙරේරා යනු එය ජනාධිපතිවරයාගේ තේරීමක් වුවද රවී කරුණානායකගේ තේරීමක් වුවද කිසිසේත් ගැළපෙන්නක් නොවේ. (ජනාධිපතිවරයාගේ තේරීමක් යැයි අප කියන්නේ ඔහුත් රවී කරුණානායකත් අතර ඇති සම්බන්ධය දෙදෙනාම තවමත් ප්‍රතික්‍ෂේප කර නැති නිසාය.)■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි