No menu items!
29.7 C
Sri Lanka
29 March,2024

තීන්දුව ජනතාවට බාර කරන්න

Must read


ජවිපෙ පාර්ලිමේන්තු මන්ත්‍රී විජිත හේරත්

මහින්ද රාජපක්ෂ සමඟ 20 වන සංශෝධන යෝජනාව ගැන පැවති සාකච්ඡාව ඔබ දකින්නෙ කොහොමද?
මහින්ද රාජපක්ෂ විධායක ජනාධිපති ක්‍රමය අහෝසි කරන්න ප්‍රතිපත්තියක් හැටියට එකඟ බව ප්‍රකාශ කිරීම තමයි වැදගත්ම කාරණය. ඒක ඉතාම සුභවාදී ලකුණක්. ඔහු 20 වන සංශෝධනයටම එකඟයි කියා කීවේ නැති බව ඇත්ත. විධායක ජනාධිපති ක්‍රමය අහෝසි කරනවා නම් ඡන්ද ක්‍රමයත් වෙනස් වෙන්නට ඕනෑ බව ඒකාබද්ධ විපක්ෂයේ පක්ෂ අතරේ එකඟතාවක් තියෙනවා කිව්වා. 13 වැනි සංශෝධනයත් වෙනස් වෙන්නට ඕනෑ බව කිව්වා. කෙසේ වෙතත් මෙය ඒකාබද්ධ විපක්ෂයේ බොහෝ කලකට පෙර සාකච්ඡා වූ දෙයක් බව කීවා. එතැනදී අපේ පැත්තෙන් පෙන්වූවා ඡන්ද ක්‍රමය වෙනස් කරන්නට අපි එකඟ බව. එහෙත් අලුත්ම ඡන්ද ක්‍රමයක් හදන්න ගියොත් මැතිවරණයක් කල්යෑමේ ඉඩ තියෙනවා. ඒ නිසා ඒකට විකල්පයක් විදියට මේ තියෙන ඡන්ද ක්‍රමයම දිනන කණ්ඩායමට බෝනස් මන්ත්‍රීධුර ප්‍රමාණයක් ලැබෙන විදියට වෙනස් කරමු කියලා අපි යෝජනා කළා. එතකොට පාර්ලිමේන්තුවේ ස්ථාවරත්වය පිළිබඳ ප්‍රශ්නයක් එන්නේ නැහැ.


පෙනෙන විදියට මහින්ද රාජපක්ෂ විසින් 20 සංශෝධනයට බාධා ලෙස ඉදිරිපත් කළ කාරණා දෙකටම ජවිපෙ පැත්තෙන් විසඳුම් යෝජනා කරලා තියෙනවා..


ඇත්තටම. 13 වැනි සංශෝධනය ගැනත් අපි පැහැදිලි කළා. දැනට ඉදිරිපත් කරලා තියෙන 20 වැනි සංශෝධනයෙන් 13ට අපි අත තියලා නැහැ. විධායක ජනාධිපතිවරයා සතුව දැනට පළාත් සභා සම්බන්ධයෙන් තියෙන බලතල විධායක ජනාධිපති ක්‍රමය අහෝසි කළාට පසුවත් තියෙනවා. ආණ්ඩුකාරවරුන් පත්කිරීම, යම් පළාත් සභාවක් වෙනම රාජ්‍යයක් බවට පත්කළොත් එය විසුරුවාහැරීම ආදි සියලු බලතල ජනාධිපතිවරයාට තියෙනවා. වෙනසක් වෙන්නෙ නැහැ. ඒ නිසා 13 වැනි සංශෝධනය වෙනුවෙන් වෙනසක් කරන්න ඕනෑ නැති බව අපි විශේෂයෙන් පැහැදිලි කළා.


ජවිපෙ ඉදිරිපත් කළ විසඳුම් ගැන මහින්ද රාජපක්ෂ කීවේ මොනවාද?


ඔවුන් කීවේ ඔවුන්ගේ පක්ෂ අතර මේ ගැන අලුතෙන්ම සාකච්ඡාවක් කළ යුතු බව. ඔවුන් මීට කලින් එකඟතාව තියෙන බව තමයි කිව්වෙ.


ස්ථාවරත්වය හා 13 සංශෝධනය ගැන ඔවුන් ඉදිරිපත් කළ ප්‍රශ්නවලට පැහැදිලි පිළිතුරු තියෙන නිසා අවංක වුවමනාවක් තියෙනවා නම් ඒකාබද්ධ විපක්ෂයට 20 සංශෝධනයට සහාය දෙන්න පුළුවන් නේද?


අපි බලාපොරොත්තු වෙනවා ඒක. දැනටමත් රාජපක්ෂ කණ්ඩායමේ ගොඩක් මන්ත්‍රීවරු පෞද්ගලිකව අපි එක්ක කතාකරලා මේ පිළිබඳ කැමැත්ත ප්‍රකාශ කරලා තියෙනවා. ඒ අය අපිත් එක්කත් කතාකරලා තියෙනවා. ඔවුන් අතරේත් සාකච්ඡාවක් තියෙනවා. එළියේ කෑගහන දෙතුන්දෙනෙක් ඉන්නවා. ඔවුන්ව දැක්කාම හිතෙන්නේ හැමෝම මේ යෝජනාවට විරුද්ධයි කියලා. එහෙම එකක් නැහැ. එතැන තවත් ගොඩක් අය ඉන්නවා. ඔවුන් මේක කළ යුතු දෙයක් විදියට දකිනවා. ඒ පිළිබඳ ඔවුන් විවෘතවමත් අදහස් දක්වලා තියෙනවා. ඔය කෑගහන අයට තියෙන්නේ තමන්ට රජෙක් හොයාගෙන රජා වටේ ඉඳගෙන මොනවාහරි ගැනීමේ වුවමනාව. මන්ත්‍රීවරුන් බහුතරයක් විධායක ජනාධිපති ක්‍රමය අහෝසි කිරීමේ වුවමනාවෙන් ඉන්නවා.


මීට පෙර ජවිපෙ එජනිසයේ සන්ධනගත වෙලා හිටපු කාලයේත් විධායක ක්‍රමය අහෝසි කිරීමේ එකඟතාවක් ඔවුන් සමඟ තිබුණා නේද?


2005 ජනාධිපතිවරණයේදී විධායක ජනාධිපති ක්‍රමය අහෝසි කරන බව ප්‍රධාන එකඟතාවක් විදියට තිබුණා. එක්සත් ජනතා නිදහස් සන්ධානය වෙනුවෙන් අපේ පැත්තෙන් ඉදිරිපත් කරපු පළවැනි කොන්දේසිය තමයි විධායක ජනාධිපති ක්‍රමය අහෝසි කිරීම. මහින්ද රාජපක්ෂ මහතා ජනාධිපතිවරණයේදී විධායක ජනාධිපති ක්‍රමය අහෝසි කරන්න පොරොන්දු වුණා. 2010 ජනාධිපතිවරණයේදීත් මහින්ද රාජපක්ෂගේ ප්‍රතිපත්ති ප්‍රකාශයේදී විධායක ජනාධිපති ක්‍රමය අහෝසි කිරීමට පොරොන්දු වුණා.
එදා ජවිපෙ නියෝජනය කරමින් විධායක ක්‍රමයට එරෙහිව පෙනීහිටපු විමල් වීරවංශ අද මහින්ද රාජපක්ෂගේ ස්ථාවරයට එරෙහිව ඔහුගේම කඳවුරේ සිට දැඩි ප්‍රහාරයක් එල්ල කරනවා..
ඔහු අද දේශපාලන කනත්ත දෙසට යමින් සිටිනවා. ඔහු දේශපාලනික වශයෙන් ආතක්පාතක් නැතිව ඉන්නේ. ඉතින් ඔහුට පවතින්න නම් තවත් ඇමති කට්ටක් අරගෙන මස්කටු ලෙවකන්නට පාරක් හදාගන්න ඕනෑ. එවැනි දේශපාලන අනාථයෝ තනියෙන් නන්නත්තාර දොඩවන එක සලකන්න ඕනෑ නැහැ. ඔය සන්ධානය ඇතුළේත් ඔහුට පදනමක් නැහැ.


මහින්ද රාජපක්ෂ කියපු දේවල් කිසිදු ප්‍රශ්න කිරීමකින් තොරව පිළිගත්ත ඒකාබද්ධ විපක්ෂයේ කණ්ඩායම් අද ඔහුගේ මතයට අභියෝග කරන බව පෙනෙනවා. ඔවුන් මහින්ද රාජපක්ෂ කියන සාපේක්ෂව දුර්වල ස්වාමියාව අතහැර ගොඨාභය රාජපක්ෂ කියන ස්වාමියාව සොයායන බවයි පෙනෙන්නේ..


ඒක නම් ඇත්ත. ඔවුන් ප්‍රතිපත්තිමය වශයෙන් කටයුතු කරන අය නෙවෙයි. විධායක ජනාධිපති ක්‍රමය අහෝසි කිරීම ප්‍රතිපත්තිමය වශයෙන් හොඳ දෙයක්. ඒත් ඔවුන් කටයුතු කරන්නේ එහෙම නෙවෙයි. ඔවුන් වැඩ කරන්නෙ තමන් ගැන හිතලා. ඔවුන් බලන්නේ ස්වාමියෙක් හොයාගෙන ඒ ස්වාමියා ළඟ බැලමෙහෙවර කරලා කොහොමද ජීවත්වෙන්නේ කියන පරපෝෂිත දේශපාලනය ගැන. ඒ නිසා තමයි ගෝඨාභය රාජපක්ෂව ගෙන්වීමේ වුවමනාවෙන් විධායක ජනාධිපති ක්‍රමය අහෝසි කිරීමට විරුද්ධ වෙන්නේ. ඔවුන් රට බෙදීම ගැන තර්ක හදන්නේ අලුත් ස්වාමියාව බලයට පත්කිරීමේ අරමුණෙන්.


වාසුදේව නානායක්කාර වැනි අය පෙන්වන්නේ දැන් විධායක ක්‍රමය අහෝසි කළොත් රනිල් වික්‍රමසිංහ බලවත් වෙන බව..


අපට සැඟවුණු න්‍යාය පත්‍ර නැති නිසා ඔය වගේ ප්‍රශ්නවලට පිළිතුරු හොයන්න පුළුවන්. ඕනෑ නම් ජනමත විචාරණයත් මහ මැතිවරණයත් එකවිට තියන්න පුළුවන්. එහෙම නැතත්, අපි ඉදිරිපත් කරපු 20 වැනි සංශෝධනයට අනුව තවත් ජනාධිපතිවරණයක් එන්නේ නැහැ. පාර්ලිමේන්තු මැතිවරණයක් තමයි එන්නේ. ඇත්තටම වැඩි වාසියක් ලැබෙන්නේ මහින්ද රාජපක්ෂ මහත්තයාට. රනිල් වික්‍රමසිංහට සිද්ධවෙන්නෙ අවාසියක්. මොකද ඔහුට ඉන්න තියෙන කාලසීමාව අඩු වෙනවා. අපි යෝජනා කරලා තියෙන්නේ 20 සම්මත වුණාම එලැඹෙන ජනවාරි 08න් පස්සේ ඡන්දයට යන්න ඕනෑ බව. ඉතින් වැඩි අවාසියක් තියෙන්නේ රනිල් වික්‍රමසිංහට.
ජවිපෙට ජනාධිපතිවරණ දිනන්න බැරි නිසා පාර්ලිමේන්තු ක්‍රමයක් ඇති කරලා, පාලිමේන්තුවේ දුරස්ථ පාලකය වෙන්නට 20 වන සංශෝධනය ගෙනා බව උදය ගම්මන්පිළ චෝදනා කරනවා..
ඒක සම්පූර්ණ වැරදි අදහසක්. විධායක ජනාධිපති ක්‍රමය මේ රටේ ස්ථාපිත කරන්නත් කලින් ඉඳලායි අපි විරුද්ධ වුණේ. 1978 ව්‍යවස්ථාව හදන්න කලිනුත් අපි මේ අනතුර දැක්කා. තනි පුද්ගලයෙකුට ලැබෙන අත්තනෝමතික බලයක් ලංකාවට ගැළපෙන්නේ නැති බව දැක්කා. ඒ කාලයේ සිටි ඇන්.ඇම්. පෙරේරා වගේ දේශපාලනඥයන් පවා මේ පිළිබඳ විග්‍රහයන් ඉදිරිපත් කරලා තියෙනවා. රෝහණ විජේවීර සහෝදරයාත් මේක දැක්කා. අද රටේ සම්පූර්ණ ජනතාවම මේක අත්දකිනවා. මේක අපේ පක්ෂය ගැන කාරණාවක් නෙවෙයි.


දෙමළ ජාතික සන්ධානය ඇතුළු අනෙකුත් කණ්ඩායම් 20 වැනි සංශෝධනය ගැන කීවේ මොනවාද?


දෙමළ ජාතික සන්ධානය ඉතා පැහැදිලිව මේකට එකඟතාව ප්‍රකාශ කළා. ඊළඟට අපි එජාපෙ හා අගමැතිවරයා ඇතුළු කණ්ඩායම සමඟ සාකච්ඡා කරනවා. ඊට අමතරව රවුෆ් හකීම්, රිෂාද් බදියුදීන්, මනෝ ගනේෂන් වැනි කණ්ඩායම් සමඟත් සාකච්ඡා කරනවා. දිනය හා වෙලාව නිශ්චිතව යොදාගැනීම තමයි තවමත් සිද්ධවුණේ නැත්තේ. ඒ නිසා අපි කතාකරන මොහොත වෙද්දී නිශ්චිතවම සාකච්ඡා සිද්ධවෙන වෙලාවන් කියන්නට බැහැ. එහෙත් ඉදිරි සතිය අවසාන වෙද්දී සාකච්ඡා අවසාන වේවි.
නදීන් දිසානායක, සජිත් ප්‍රේමදාස වැනි එජාප ප්‍රබලයන් 20ට විරුද්ධ බවට ආරංචි තියෙනවා. ඇත්තටම ඔවුන් ප්‍රසිද්ධියේ මේ ගැන තමන්ගේ මතය නිශ්චිතව ඉදිරිපත් කරලා නැහැ..
එජාපය තමන්ගේ පක්ෂ සම්මේලනයේදී විධායක ජනාධිපති ක්‍රමය අහෝසි කිරීම ප්‍රතිපත්තියක් විදියට අනුමත කරලා තියෙන්නේ. ඒත් විවිධ පුද්ගලයෝ විවිධ අදහස් කියනවා. සමහරු කතාකරන්නේ පෞද්ගලික බල ව්‍යාපෘතිය අනුව. එජාපය කලින් නම් ප්‍රතිපත්තිමය තීන්දුවක් අරන් තිබුණා. දැන් හදිසියේ ඒ තීන්දුවෙන් වෙනස් වෙන්නට හේතුවක් නැහැ.


ඉදිරි ජනාධිපතිවරණයක අපේක්ෂකයෙක් වෙන්න හිතන අය මේකට විරුද්ධ බව පෙනෙනවා නේද?


තම තමන්ගේ සිහින අනුව විවිධාකාර ප්‍රකාශ කරන අය ඉන්නවා. ප්‍රසිද්ධියේ හා අභ්‍යන්තරයේ. ඒත් මේ යන විදිය අනුව ඔය කාගේවත් සිහින සැබෑ වෙන්නේත් නැහැ.
පොහොට්ටුවේ සිටින සිංහලවාදී සුළු පක්ෂ හා එජාපෙ සිටින දෙමළ, මුස්ලිම් පක්ෂ විධායක ජනාධිපති ක්‍රමයටම එකඟයි..
ඇත්තටම එතැන පොඩි පරස්පරයකුත් තියෙනවා. විධායක ක්‍රමයට විරුද්ධ වෙන සිංහල ජාතිකවාදී කණ්ඩායම් කියන්නේ විධායක ක්‍රමයෙන් රට බෙදෙන බව. බහුතරය වන සිංහල බෞද්ධ ජනතාවට මේක අවාසි බව ඔවුන් කියනවා. සුළු ජනකොටස් වෙනුවෙන් පෙනී ඉන්න කණ්ඩායම් කියනවා විධායක ක්‍රමය අහෝසි කළොත් සුළු ජනකොටස්වලට අවාසියි කියලා. මේ මත දෙකේ පරස්පරයක් තියෙනවා. ඒත් අපට පෙනෙන්න තියෙනවා සමහර අදහස් අනවබෝධය නිසා ඇතිවෙන බව. ඒත් සමහර අයට බියක් තියෙනවා මේකත් එක්ක ඡන්ද ක්‍රමය වෙනස් වෙලා, ඔවුන්ට අවාසියක් වේවි කියලා. ඒත් එහෙම බියක් ඇති කරගත යුතු නැහැ.
ජවිපෙ ඉල්ලනවා, දැන්වත් විධායක ජනාධිපති ක්‍රමය ගැන තීරණයක් ගැනීමේ අයිතිය ජනතාවට දෙන්න කියන එක. ඒ අනුව කුමන මතයක හිටියත් පාර්ලිමේන්තුවේ මේක සම්මත කරලා ජනමත විචාරණයට යන්න අවස්ථාව දෙන්න කියලා ජවිපෙ ඉල්ලනවා…
ඇත්තටම ජනතාවට තීන්දු ගන්න නිදහස දෙන්න කියලායි අපි ඉල්ලන්නේ. පාර්ලිමේන්තුවේ 225න් මේක ප්‍රතික්ෂේප කළොත් ජනතාවට තීන්දුවක් ගන්න අවස්ථාව නැතිවෙනවා. පාර්ලිමේන්තුවේ තීන්දුව ගන්නේ දේශපාලන පක්ෂ විසින් තම තමන්ගේ බල ව්‍යාපෘතිවලට අනුවයි. තමන්ගේ පක්ෂයට වෙන්නේ මොකක්ද කියන කාරණාව මත. බලය රැකගත හැකිද කියන එක මත. ඒත් රටේ ජනතාවට මේ තීරණය බාරදුන්නාම රටට උචිතද නැද්ද කියලා බුද්ධිමය සංවාදයක් කරලා, ඒ මත කැමැත්ත ප්‍රකාශ කිරීමේ ඉඩක් තියෙනවා. ඒ නිසායි අපි කියන්නේ ජනතාව ඉදිරියට යන්න අවස්ථාව දෙන්න කියලා. අපට ජනතාව විශ්වාසයි. විධායකය ගැන තීන්දුව ජනතාවට බාර කරන්න.


20 සංශෝධනය එජාපෙ වෙනුවෙන් ජවිපෙ දියත් කළ කුමන්ත්‍රණයක් බව ඇතැම් මාධ්‍ය පවා කියනවා නේද?


මෙතැන කිසිම කුමන්ත්‍රණයක් නැහැ. මේ සියල්ල විනිවිද පෙනෙනවා. හංගන්න දෙයක් නැහැ. මේක හදිස්සියේ ගෙනා එකක් නෙවෙයි. දැනටමත් පරක්කු වැඩියි. අපි 19 වැනි සංශෝධනය ගේන්නටත් ලොකු මැදිහත්වීමක් කළා. ඒත් ඒකෙන් විධායක ජනාධිපතිගේ බලතල සීමා වුණා පමණයි. අපි අවුරුදු 40ක් තිස්සේ කරන අරගලයක තව පියවරක් තමයි මේක.


20 වැනි සංශෝධනයේ කාල රාමුව දෙස බැලුවත් මේ වෙලාවේ මේ සාකච්ඡාව මතුවුණේ අහම්බයකින් හෝ හදිස්සියකින් නොවෙයි නේද?


ඇත්තටම මේක මෛත්‍රීපාල සිරිසේන මහතා 2015 දින 100 ඇතුළේ කරන බව කී දෙයක්. සෝභිත හිමිගේ දේහය ඉදිරිපිට ශපථ කළේත් දින 100ක් ඇතුළත මේක කරන්නට බලය දෙන්න කියලයි. කොහොමත් මේක ගොඩක් කාලයක් තිස්සේ ආ දෙයක්. පහුගිය සැප්තැම්බර් 05 වැනිදා අපි මේක ඉදිරිපත් කළා. මාස 05 ක කාලයක් තිබුණා ආණ්ඩුවේ ස්ථාවරය දැනුම්දෙන්නට. ආණ්ඩුව කිසිවක් කීවේ නැහැ. මාර්තු 05 වැනිදා ඒ මාස හයක කාලය ඉකුත් වුණා. ඒ ඉකුත් වුණාට පස්සේ තමයි අපි මාර්තු 06 වැනිදාම මේ සාකච්ඡාව පටන්ගත්තේ.

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි