No menu items!
21.8 C
Sri Lanka
28 March,2024

ගෝඨාගේ ඇවන්ගාඞ් කතාව

Must read


ඇවන්ගාඞ් ආයතනය පිළිබඳ චෝදනාවලට අදාල එක නිලධාරිනියකගේ එකම එක ¥රකථන ඇමතුමකින් කී කතාවක් හා නඩු පැවරීමක ඇති තාක්ෂණික දෝෂයක් අල්ලාගෙන තමන්ට ඇති චෝදනා සියල්ලෙන්ම නිදහස් වීමට රාජපක්ෂ පවුල මේ වෙද්දී උත්සාහ ගනිමින් සිටී.


‘අල්ලස් පනතේ 70 වැනි වගන්තිය යටතේ විස්තර කර ඇති ¥ෂණය නමැති වරද, එකී වරද සිදුකිරීමට කුමන්ත‍්‍රණය කිරීම හා ඊට අනුබැඳීම් යන වරදවල් එකක් හෝ වැඩි ගණනක් සිදුකර ඇති බව සාක්ෂි තුළින් හෙළිදරව් වී ඇති බව කොමිෂන් සභාවේ නිගමනය වේ.‘


එසේ කියන්නේ ජනාධිපති මෛත‍්‍රීපාල සිරිසේන පත්කළ බරපතළ වංචා, ¥ෂණ, රාජ්‍ය සම්පත්, වරප‍්‍රසාද, බලය සහ අධිකාරිය අනිසි ලෙස භාවිත කිරීම සම්බන්ධයෙන් විමර්ශනය කිරීම සඳහා වූ ජනාධිපති පරීක්ෂණ කොමිෂන් සභාවේ අවසන් වාර්තාවෙහිය.


මෙසේ නඩු පැවරිය යුතු බව කියන්නේ ගෝඨාභය නන්දසේන රාජපක්ෂ මහතා ඇතුළු කිහිපදෙනෙකු වෙතය. එක් චෝදනාවක් වන්නේ ‘නාවික හමුදාව පවත්වාගෙන ගිය අවි ගබඩා ව්‍යාපෘතිය ඇවන්ගාඞ් මැරිටයිම් සර්විසස් සමාගම වෙත පැවරීම සහ නාවික හමුදාවට ලැබිය යුතු ආදායම් ප‍්‍රතිශතය අඩු කිරීම‘ යන්නයි.



ඉහත කී පරීක්ෂණය මෙහෙයවූ කොමිසමේ සිටියේ සේවයේ නියුතු අධිකරණ විනිසුරුවරුන් තිදෙනෙක් සහ විශ‍්‍රාමික විගණකාධිපතිවරයෙකි. කොමිසම ක‍්‍රියාත්මක වුණේ අර්ධ අධිකරණ කටයුත්තක් පරිද්දෙනි. සාක්ෂි විමසීම, හරස් ප‍්‍රශ්න ඇසීම ඇතුළු කටයුතු එහිදී සිදුවීය. දඬුවම් දීමේ බලය පමණක් කොමිසමට නොතිබුණි. ඒ වෙනුවට කොමිෂන් වාර්තාව පදනම් කරගනිමින් නඩු පැවරීමේ හැකියාවක් තිබුණි.


එම කොමිෂන් සභාව ජනාධිපතිවරයා වෙත ලබා දී තිබුණු වාර්තාවේ තිබුණු කරුණු අධිකරණ තීන්දුවක් ලෙස සැලකිය නොහැක. එසේ වුව සත්‍යය සොයන පුද්ගලයෙකුට එම කොමිෂන් සභාවේ වාර්තාව ස්වාධීන හා විධිමත් පරීක්ෂණ වාර්තාවක් ලෙස සැලකිය හැකිය. එය පොලිස් විමර්ශන අංශයක බී වාර්තාවක් හෝ වෙනත් පරීක්ෂණ වාර්තාවකට එහා ගිය එකකි.


චෝදනා


ඉහත කී ජනාධිපති පරීක්ෂණ කොමිෂන් සභාවෙන් නඩු පවරන ලෙස නිර්දේශ කර තිබුණේ චෝදනා හතරකට අදාලවය.
පළවැනි චෝදනාව වන්නේ රක්නා ලංකා සමාගමේ සේවකයන් පසුගිය ජනාධිපතිවරණයේ ප‍්‍රචාරක කටයුතුවලට යොදවා ඇති බවට වන චෝදනාවය. 2014.12.01 වැනි දින සිට 2015.01.05 වන දින අතර කාලය තුළ කිසිදු මුදලක් අය නොකර රක්නා ලංකා සමාගමේ සේවකයන් මහින්ද රාජපක්ෂගේ ප‍්‍රචාරක ව්‍යාපාරයට යොදාගෙන තිබුණි.


දෙවැනි චෝදනාව වන්නේ ඒ වෙද්දීත් ශ‍්‍රී ලංකා නාවික හමුදාව කරමින් සිටි, ලාභ ලැබූ ව්‍යාපාරයක් වන මුහුදු ආරක්ෂක සේවා සපයන ආයතනවලට අයත් අවි තැන්පත් කිරීමේ ව්‍යාපාරය ඇවන්ගාඞ් මැරිටයිම් සර්විසස් සමාගමට බාරදීමයි. ඒ ක‍්‍රියාවෙන් ශ‍්‍රී ලංකා නාවික හමුදාවට ලැබිය යුතු ආදායම් කොටස අඩු කිරීම තුළින් රජයට පාඩු කිරීම හෝ රජයේ ආදායමට හානි සිදු කර ඇති බවයි.


තෙවැනි චෝදනාව වන්නේ මුහුදු ආරක්ෂක සේවාවන් සැපයීමට අදාල ව්‍යාපාර කටයුතු කිරීමේදී ඇවන්ගාඞ් මැරිටයිම් සර්විසස් සමාගමට අයුතු වාසි ලැබෙන ලෙස කටයුතු කිරීමයි.


සිව්වැනි චෝදනාව වන්නේ ඇවන්ගාඞ් ආයතනයට නිසි බලපත‍්‍ර හා බදු අයකිරීමක් නැතිව අවිආයුධ පාවිච්චි කිරීමට සහාය දීමයි.


චූදිතයෝ


මෙම විමර්ශනයේදී ගෝඨාභය රාජපක්ෂට අමතරව තවත් චූදිතයෝ කිහිපදෙනෙක් සිටිති. ඒ මේ අයය.
රක්නා ලංකා සමාගමේ සභාපති කේ.බී. එගොඩවෙල, ප‍්‍රධාන විධායක නිලධාරී පාලිත ප‍්‍රනාන්දු, ආරක්ෂක අමාත්‍යාංශ ලේකම් නන්දසේන ගෝඨාභය රාජපක්ෂ, මනමෙල්දුර රෝහණවීර ද සොයිසා, අච්චි මද්දුමාගේ දොන් හසල ධනසිරි අමරතුංග, අරුමාදුර ලෝරන්ස් රොමෙල්ලෝ දුමින්ද සිල්වා, රණවක ආරච්චිගේ දොන් ජනක, හේවාමාතරගේ උපාලි කොඩිකාර, චන්ද්‍රසේකර රෝහිත බෝගොල්ලාගම, දිසානායක මුදියන්සේලාගේ සුජාතා දමයන්ති ජයරත්න, හිටපු නාවික හමුදාපති ජයනාත් සිරිකුමාර කොළඹගේ, සමරසිංහ ආරච්චිලාගේ මැක්සිමස් ජයන්ත පෙරේරා, වයි. එච්. පී. නිශ්ශංක යාපා සෙනවිරත්න.


කතාව


ඇවන්ගාඞ් කතාව විස්තර ඇතිව මීට පෙර මාධ්‍යවලින් වාර්තා කර තිබුණි. අප මෙහි විස්තර කරන්නේ ඇවන්ගාඞ් සමාගමේ කතාව සරලව හා කෙටියෙනි.
දැන් නිදහසට කරුණු ඉදිරිපත් කරන නිශ්ශංක සේනාධිපති ඇතුළු අය කියන්නේ ඇවන්ගාඞ් සමාගම නිසා රටට විශාල ආදායමක් ලැබුණු බවයි. ඔවුන් එය කියන්නේ ඇවන්ගාඞ් සමාගමෙන් ලංකාවට අලූත්ම ව්‍යාපාරයක් හඳුන්වා දුන්නා සේය. එහෙත් ඇවන්ගාඞ් සමාගමට විශේෂ සැලකිලි කරමින් 2012 ඔක්තෝබර් 15 වන දින සිට හිතුමතේ භාරදී තිබුණේ ඒ වෙද්දීත් ලංකාවේ නාවික හමුදාව කරමින් සිටි ව්‍යාපාරයකි. ඒ ව්‍යාපාරය වන්නේ නෞකාවලට ආරක්ෂාව සැපයීමේ හා ආරක්ෂාව වෙනුවෙන් ආයුධ සැපයීමේ ව්‍යාපාරයයි. විදෙස් නෞකාවලින් ඒ සඳහා විශාල ආදායමක් ගලා එයි.
එය ලංකාවේ නාවික හමුදාවට කළ නොහැකි කටයුත්තක් බව කවුරුන් හෝ හිතනවාද? නාවික හමුදාවට ඒ කටයුත්ත කළ නොහැකි නිසා, තමන් ගැලවුම්කාරයෙකු ලෙස පැමිණ ඒ ව්‍යාපාරයේ යෙදී ලංකාවට ලාභ සෙවූ බව කවුරුන් හෝ කීම විකාරයකි.


එය ඒ වෙද්දීත් නාවික හමුදාව ලාභ ලබමින් සිටි ව්‍යාපාරයකි. ඇවන්ගාඞ් සමාගම නැතිව පහුගිය වසර කිහිපයක් තිස්සේ නාවික හමුදාව ඒ ව්‍යාපාරය සිදුකර ලාභ ලැබීය. ඒ නිසා රටට මහා ආදායමක් හෝ ලාභයක් අත්පත් කරදුන් බව මවා පෙන්වන්නට උත්සාහ කිරීමම විකාරයකි.


ඇවන්ගාඞ් මැරිටයිම් සර්විසස් සමාගම පෞද්ගලික සමාගමකි. ඒ සමාගමත් සමඟ සීයට සීයක් රජයට කොටස් ඇති රක්නා ලංකා සමාගම බද්ධ ගිවිසුම් ඇති කරගෙන තිබුණි. ඉහත කී පරිදි නෞකාවලට ආරක්ෂාව සැපයීමේ කටයුත්ත ඇවන්ගාඞ් සමාගමට දුන්නා පමණක් නොව, ඇවන්ගාඞ් සමාගමට ආයුධ සැපයීම ආදී උදව් පදව් කිරීමද රක්නා ලංකා සමාගමෙන් සිදුකර තිබුණි. එසේ ආරක්ෂක කටයුතුවලට පෞද්ගලික පාර්ශ්වයන් වෙත රජයේ අවි පැවරීම වෙනත් අවස්ථාවලදීත් කර ඇත. එහෙත් එයට විධිමත් ක‍්‍රමවේදයක් තිබේ. ඇවන්ගාඞ්ලාට ආයුධ දී තිබුණේ ඒ ක‍්‍රමවේදයට පිටින්ය.
මෙම අවි ගබඩා කර තිබී ඇත්තේ ගාලූ වරායේය. ගබඩා කිරීම සිදුකර ඇත්තේ නාවික හමුදාවය.


අවි ආයුධ පමණක් නොව, පෞද්ගලික සමාගමක් වන ඇවන්ට්ගාඕ සමාගමේ සීමාෂල්වරුන්ට පුහුණුව ලබාදීමටද ආණ්ඩුවේ පහසුකම් ලබාදී තිබුණි. කටුකුරුන්දේ හමුදා විශේෂ කාර්ය බලකා කඳවුර තුළ අවි පුහුණුව හා ඊට අදාල සහතික නිකුත් කිරීම සිදුකර ඇත. ඒ පුහුණුවට නිසියාකාර බලපත‍්‍ර නැතිව රජයේ අවිආයුධ ලබාදී ඇත. එය 1998 අංක 45 දරන පුද්ගලික ආරක්ෂක නියෝජ්‍යායතතන විධිමත් කිරීමේ පනතෙහි 18 වැනි වගන්තිය උල්ලංඝනය කිරීමකි.


ඒ පුහුණුවෙන් පසුව ඇවන්ගාඞ් ආයතනයෙන් ලබාදුන් සහතිකයට රාජ්‍ය ලාංඡුනයද, ආරක්ෂක අමාත්‍යාංශ ලේකම් ගෝඨාභය රාජපක්ෂගේ අත්සනද යොදා තිබුණි. ඒ අනුව රජයේ ගිනි අවි පුහුණුවක සහතික පත‍්‍ර පවා ඇවන්ගාඞ් ආයතනයට පුදදී තිබේ. ඒ සහතික පත‍්‍ර, පුහුණු ආදි සියල්ල පෙන්වා ඇවන්ගාඞ් නම් පෞද්ගලික ආයතනය ලාභ ලබා තිබුණි. ඒ ලාභයෙන් කොටසක් ආරක්ෂක අමාත්‍යාංශයේ ඉහළ පුටුවලට ගියාදැයි අප දන්නේ නැත. කෙසේවෙතත් ඒ ලාභය පොදු ජනතාවට නම් ලැබුණේ නැත.


සරලව ගත් කල ඇවන්ගාඞ් ගනුදෙනුවට අදාලව ගෝඨාභය රාජපක්ෂට ඇත්තේ රජය සතු දේපළ, තනතුරු, බලය ආදිය බරපතළ ලෙස අවභාවිත කිරීමේ චෝදනාවකි. ඒ අවභාවිත කිරීමෙහි ප‍්‍රතිඵලයක් ලෙස රජයට ලැබිය යුතු විශාල ආදායමක් අහිමි කර ඇත.


ඇවන්ගාඞ් චෝදනාව පමණක් නොව ගෝඨාභය රාජපක්ෂට එරෙහිව ඇති චෝදනා සියල්ලෙන්ම පාහේ ඔහු මේ වෙද්දී නිදහස් වෙමින් සිටිනවා නොවේ. දැන් සිදුවෙන්නේ ඒ චෝදනාවලට විධිමත් නඩු පැවරීම් නැතිව වෙනත් හිල්වලින් රිංගා යෑමකි. ඒ අනුව ලංකාවේ වැඩිම චෝදනා ඇති, එහෙත් ඒවා විධිමත් ලෙස විභාග කොට හරි වැරැුද්දක් තීරණය නොවූ ජනාධිපතිවරණ අපේක්ෂකයා ගෝඨාභය රාජපක්ෂ බවට පත්වනු ඇත. අඩුම තරමේ ඔහු නිර්දෝෂී බව විධිමත් නඩුවකින් ඔප්පු වුණා නම් තමන් වරදකරුවෙකු නොවන බව ඔහුට කිව හැකිය. එහෙත් සිදුව ඇත්තේ එය නොවේ.

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි