No menu items!
29.7 C
Sri Lanka
29 March,2024

කුරුණෑගල උද්ඝෝෂණය ආරම්භයක්ද?

Must read

කුරුණෑගල නගරාධිපති තුෂාර සංජීව විතාරණ ඇතුළු පස්දෙනෙකු අත්අඩංගුවට ගැනීම සඳහා නිකුත් කර තිබූ වරෙන්තුව අගෝස්තු 24 වැනිදා දක්වා වළක්වමින් අභියාචනාධිකරණය නියෝගයක් නිකුත් කර ඇත.

ඒ කුරුණෑගල නගරාධිපතිවරයා සහ තවත් එක් වරෙන්තුකරුවෙකු ඉදිරිපත් කළ තමන් අත්අඩංගුවට නොගැනීමේ නියෝගයක් නිකුත් කරන ලෙස ඉල්ලූ පෙත්සම් අගෝස්තු 12 දින සලකා බලමින්ය.

අධිකරණය කුරුණෑගල නගරාධිපති, එහි කොමසාරිස්, ප්‍රධාන ඉංජිනේරු හා තවත් දෙදෙනෙකුට එරෙහිව වරෙන්තු නිකුත් කළේ දින ගණනාවකට පෙරය. එහෙත් ශ්‍රී ලංකාවේ වත්මන් කාර්යක්ෂම පොලීසියට ඔවුන් අත්අඩංගුවට ගැනීමට බැරි විය.

ඒ නිසා අධිකරණයට ඔවුන් අත්අඩංගුවට ගැනීමට නැවත වරෙන්තු නිකුත් කිරීමට සිදුවිය. එම අත්අඩංගුවට ගැනීම කරන ලෙස වැඩබලන පොලිස්පතිවරයාට දැනුම්දීමට සිදුවිය. වයඹ පළාත් භාර ජ්‍යෙෂ්ඨ නියෝජ්‍ය පොලිස්පතිවරයාට අධිකරණයේ පෙනී සිට ඒ පිළිබඳ කරුණු කියන්නැයි ඉල්ලීමට නීතිපතිවරයාට සිදුවිය.

පුරාවිද්‍යාත්මක වටිනාකමක් ඇති කුරුණෑගල රාජ සභා මණ්ඩපය යැයි කියූ බුවනෙක හෝටලය කැඩීම කුරුණෑගල නගරාධිපතිවරයා ඇතුළු පිරිසට එරෙහි චෝදනාව වේ.

පුරාවිද්‍යා ආඥා පනත හා පොදු දේපළ පනත යටතේ ඒ පිළිබඳ නීතිපතිවරයා කුරුණෑගල නගරාධිපතිවරයා ඇතුළු පිරිසට නඩු පවරා ඇත.

මේ පිරිස අත්අඩංගුවට ගැනීමේ නියෝග නිකුත් කරන්නැයි නීතිපතිවරයා අධිකරණයෙන් ඉල්ලීමෙන් පසු අගෝස්තු 10 වැනිදා කුරුණෑගල නගර මධ්‍යයේදී නීතිපතිවරයාගේ ඉල්ලීමට එරෙහිව උද්ඝෝෂණයක් පැවැත්වුණි. උද්ඝෝෂකයන් අත තිබූ ප්‍රධානතම සටන්පාඨ පුවරුව වූයේ ‘රජයේ නිලධාරීන් බියවද්දන නීතිපති මාෆියාවට එරෙහි වෙමු’ යන්නය.

අදහස් පළකිරීමේ නිදහස හා භාෂණයේ නිදහස තිබිය යුතු බව අපගේ පිළිගැනීමය. එහෙත් මෙම උද්ඝෝෂණයටත් එහි තිබූ ප්‍රධාන සටන් පාඨයටත් පසුබිම් කතාවක් තිබෙන බව අප අමතක කළ යුතු නැත.

එම කඩා බිඳදැමීම සිදුවූ අවස්ථාවේම ප්‍රදේශයේ දේශපාලන බලවතා වූ ජොන්ස්ටන්  ප්‍රනාන්දු කීවේ කුරුණෑගල නගරාධිපතිවරයාගේ මයිලකටවත් අත තැබීමට කිසිවෙකුට ඉඩ නොදෙන බවය. ඒ කුරුණෑගල නගරාධිපති ජොන්ස්ටන් ප්‍රනාන්දුගේද ඔහු මගින් අගමැති මහින්ද රාජපක්ෂගේද ප්‍රබල ආධාරකරුවෙකුව සිටි බැවිනි.

ඒ නිසාම පුරාවිද්‍යා ස්මාරකයකට අත තිබ්බත් ක්ෂණික අත්අඩංගුවට ගන්නා නීතිය කුරුණෑගල නගරාධිපතිවරයා ඇතුළු පිරිසට වලංගු වූයේ නැත. පුරාවිද්‍යා කොමසාරිස්වරයා නීතිය ක්‍රියාත්මක කිරීම වෙනුවට කළේ විග්‍රහ ඉදිරිපත් කරමින් කල් මැරීමය. තමාට පසුගිය යහපාලන ආණ්ඩු සමයේදී බලපෑම් එල්ල වූ බවටත්, ඒවාට අදාළ හඬපට පවා තිබෙන බවටත් අමුතු දේශපාලන කතාවක් කීමය.

ජාතික උරුමයන් පිළිබඳ මොරදෙන අගමැති මහින්ද රාජපක්ෂද මැතිවරණ සමයක් වීත්, බොරුවට හෝ ඒ ගැන කිසිවක් කීවේ නැත. යුක්තිගරුක, නීතිගරුක, විනයගරුක ජනාධිපති ගෝඨාභය රාජපක්ෂද කුරුණෑගල පැවති මැතිවරණ රැළියේදී ඒ පිළිබඳ ජනතාව ප්‍රශ්න කරන විට ප්‍රශ්නය මගහරිමින් කීවේ එම ස්ථානය හෝටලයක් බවය.

ඉහත සඳහන් කළ විරෝධතාකරුවන්ගේ සටන්පාඨය වැදගත් වන්නේ ඉහත කී පසුබිම කථාව සමග මෙම සිදුවීම විග්‍රහ කර බැලීමෙනි.

මතකය දිවයන්නේ කේවල ක්‍රමය යටතේ හයෙන් පහක බලයක් සමඟ තමන්ට පක්ෂපාත තීන්දු ගැනීමට අධිකරණයට ගල් ගැසූ ජේආර් ජයවර්ධන ආණ්ඩු පාලන සමය වෙතය. තුනෙන් දෙකක සමානුපාතික ක්‍රමයක් යටතේ ලැබුණු බලයක් කොතැනින් අවසන් කරාවිදැයි කිව නොහැකිය.

තමන්ට වුවමනා තීන්දු නොදුන් ෂිරාණි බණ්ඩාරනායක යන අගවිනිසුරුවරිය එක් රැයක් තුළ පාර්ලිමේන්තුවේ නඩු අසා ගෙදර යැවූ රාජපක්ෂවරුන්ට අධිකරණයත්, නීතියත් යනු මහාමෙරක් නොවේ.

කුරුණෑගල උද්ඝෝෂණය එහි ආරම්භයක් විය හැකිය.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි