ආන්දෝලනයට ලක්වූ මිලේනියම් චැලේන්ජ් කෝපරේෂන් හෙවත් එම්සීසී ආයතනය සමඟ ගිවිසුම් අත්සන් කොට ශ‍්‍රී ලංකාවේ මාර්ග සංවර්ධනය හා ඉඩම් ප‍්‍රතිසංස්කරණ ව්‍යාපෘතිය සඳහා නියමිත ආධාර මුදල ලබාගැනීමට රජයේ ඉදිරිපෙළ නායකයන් කැමැත්තෙන් පසුවන බව ආණ්ඩුවේ ආරංචිමාර්ග සඳහන් කරයි.
ගිවිසුම පිළිබඳව අධ්‍යනය කොට සවිස්තර වාර්තාවක් කොළඹ විශ්වවිද්‍යාලයේ ආචාර්යවරයෙකු වන ලලිතසිරි ගුණරුවන් මහතා ප‍්‍රධානත්වය දරණ කමිටුවකින් ලබාගැනීම සඳහා කැබිනට් මණ්ඩලය තීන්දුවක් ගෙන තිබේ. එම වාර්තාව අනුව ඉහත කී ගිවිසුම අත්සන් කිරීමට බලාපොරොත්තු වේ.
මිලේනියම් චැලේන්ජ් කෝපරේෂන් ගිවිසුම අත්සන් කිරීම සඳහා අවසන් දිනය වන්නේ දෙසැම්බර් 15 වැනිදාය. ආණ්ඩුවේ ආරංචිමාර්ග සඳහන් කරන්නේ එදිනට පෙර ගිවිසුම අත්සන් කිරීමේ සැලසුමක් නොමැති බවය. කෙසේ වෙතත් මෙම ගිවිසුම අත්සන් කිරීම පිළිබඳව ආණ්ඩුව උනන්දුවක් දක්වන්නේ නම්, එම්සීසී ආයතනය සමඟ සාකච්ඡුා කොට ගිවිසුම අත්සන් කිරීම සඳහා මාස දෙකක පමණ කාලයක් ලබාගැනීමේ හැකියාවක් ඇතැයි වාර්තා වේ.
මිලේනියම් චැලේන්ජ් කෝපරේෂන් ගිවිසුම සඳහා දැනට සකස් කර ඇති කෙටුම්පතෙහි කරුණු වෙනස් කිරීමේ හැකියාවක් නොමැති බවද වාර්තා වේ. එම යෝජනා ශ‍්‍රී ලංකාවේ රජය ඉදිරිපත් කළ යෝජනා වේ. එහි සඳහන් වාහන තදබදය අවම කිරීම පිළිබඳ යෝජනා ඉදිරිපත් කර ඇත්තේ මාර්ග සංවර්ධන අධිකාරියෙන් වන අතර ඉඩම් ප‍්‍රතිසංස්කරණ යෝජනා ඉදිරිපත් කර ඇත්තේ ඉඩම් කොමසාරිස් ජනරාල් දෙපාර්තමේන්තුවෙන්ය.
පසුගිය සතියේ එම්සීසී ගිවිසුම පිළිබඳව මාධ්‍ය සාකච්ඡුාවකදී අදහස් දැක්වූ පාර්ලිමේන්තු මන්ත‍්‍රී උදය ගම්මන්පිළ මහතා ප‍්‍රකාශ කර තිබුනේ ඇමෙරිකාවෙන් ඉදිරිපත් කරන සියළුදේට එරෙහිවීමේ ප‍්‍රතිපත්තියක ආණ්ඩුව නොසිටින බවය. එම්සීසී ගිවිසුමෙන් යෝජිත ආධාර මුදලින් සීයට හැත්තෑවක් මාර්ග සංවර්ධනය වෙනුවෙන් වෙන්වන බවත් මාර්ග සංවර්ධන ව්‍යාපෘතිය යහපත් එකක් බවත් ගම්මන්පිළ මහතා ප‍්‍රකාශ කර තිබුණි. එහෙත් ඉඩම් ප‍්‍රතිසංස්කරණ යෝජනා රටට අහිතකර බව ඔහු කියා තිබේ.
ගිවිසුම පිළිබඳව වාර්තාවක් ලබාදීම සඳහා පත්කර ඇති කමිටුවේ ප‍්‍රධානත්වය දරණ ආචාර්ය ලලිතසිරි ගුණරුවන් මහතා ප‍්‍රවාහනය පිළිබඳ විශේෂඥයෙකු ලෙස පිළිගැනෙන අතර කොළඹ නගරයේ රථවාහන තදබදය අවම කිරීම පිළිබඳව යෝජනා රැුසක් ඉදිරිපත් කර ඇති විද්වතෙකි.
කෙසේ වෙතත් මාධ්‍ය හමුවක් පවත්වමින් අමාත්‍ය විමල් වීරවංශ ප‍්‍රකාශ කර තිබුණේ මිලේනියම් චැලේන්ජ් කෝපරේෂන් ගිවිසුම අත්සන් කළහොත් තමා ආණ්ඩුවෙන් ඉවත්වන බවය.
