පුරවැසිභාවය ඉවත් නොකිරීම ‘රනිල්ගේ කුමන්ත‍්‍රණයක්’ කියයි
ගෝඨාභය රාජපක්ෂට ඉදිරි ජනාධිපතිවරණයට පෙර ඇමෙරිකානු පුරවැසිභාවය ඉවත් කරගැනීමට නොහැකි බව තහවුරු වී තිබියදී ඔහු වටා පෙළගැසී සිටින ජාතිවාදී බලවේග ඒ දක්වා උණුසුම්ව ක‍්‍රියාකාරීව තබා ගැනීමේ අරමුණින් ඔහුගේ නම ජනාධිපති අපේක්ෂකයා ලෙස නම් කිරීමට තීරණය කර ඇතැයි වාර්තා වේ.
ජනාධිපතිවරණ නාමයෝජනා කැඳවීමෙන් පසු ශ‍්‍රී ලංකා පොදුජන පෙරමුණේ අපේක්ෂකයා ලෙස ඒ අනුව වෙනස් අයෙකු ඉදිරිපත් කිරිමටත් තීරණය කර ඇත. එහිදී ගෝඨාභය රාජපක්ෂට ඇමෙරිකානු පුරවැසිභාවය ඉවත් කරගැනීමට නොහැකි වීම අග‍්‍රාමාත්‍ය රනිල් වික‍්‍රමසිංහ හා ඇමෙරිකානු රජය අතර සිදුවූ කුමන්ත‍්‍රණයකින් සිදුවූවක් බවට ප‍්‍රචාරක ව්‍යාපාරයක් ක්රියාත්මක කිරීමටද තීරණය කර ඇත.
මෙම සැලසුමට අනුව අගෝස්තු 11 වැනිදා ගෝඨාභය රාජපක්ෂගේ නම ජනාධිපති අපේක්ෂකයා ලෙස නම් කිරීමෙන් පසු ඔහු අගෝස්තු 13 වැනිදා ශ‍්‍රී මහා බෝධිය වැඳ පුදාගැනීමෙන් ප‍්‍රචාරක කටයුතු ආරම්භ කිරීමට නියමිතය. ඉන්පසු එදිනම මහනුවරට පැමිණ මල්වතු හා අස්ගිරි මහානාහිමිවරුන් බැහැ දැකීමට නියමිත අතර ඒ සඳහා දැනටමත් දින වෙන් කරගෙන ඇත.
එමෙන්ම එදින මහනුවර නගරයේ පිළිගැනීම් ඇතුළු උත්සව පැවැත්වීමටද කටයුතු සූදානම් කර ඇත. තවද පුවත්පත් දැන්වීම් ඇතුළු වෙනත් ප‍්‍රචාරක කටයුතු එම දිනය නිමිත්තෙන් සිදු කිරීමටද නියමිතය.
වාර්තාවන්නේ ගෝඨාභය රාජපක්ෂගේ නම ඇමෙරිකානු පුරවැසිභාවය ඉවත් කළ පුද්ගලයන්ගේ නම් ඇතුළත් දෙවැනි කාර්තු වාර්තාවටද ඇතුළත් නැති බවය. එය මහජනයාට බලා ගැනීම සඳහා තවම නිල වශයෙන් ප‍්‍රකාශයට පත් කර නැත. එහෙත් එය ඉදිරි දිනවලදී ප‍්‍රකාශයට පත්වීමට නියමිතය.
එහි තුන්වන කාර්තුවට අදාළ වාර්තාව නොවැම්බර් මාසයේදී ප‍්‍රකාශයට පත්වීමට ඉඩ ඇති අතර ඒ වනවිට ජනාධිපතිවරණය සඳහා නාමයෝජනා බාරගැනීම අවසන් වී පවතිනු ඇත.
ගෝඨාභය රාජපක්ෂ මහතාට විරුද්ධව අපරාධ සම්බන්ධයෙන් ඇමෙරිකාවේ කර ඇති පැමිණිලිවල විමර්ශනද අවසන් වනතෙක් ඔහුගේ පුරවැසිභාවය අත්හැරීම සම්බන්ධයෙන් ඇමෙරිකාව පියවරක් නොගන්නා බවද එය සාමාන්‍ය ක‍්‍රමවේදය බවද ඇමෙරිකාවට සම්බන්ධ අපගේ ආරංචිමාර්ග ප‍්‍රකාශ කරයි. ගෝඨාභය රාජපක්ෂ අපේක්ෂකයා ලෙස ඉදිරිපත් කළ යුතු යැයි කියන පිරිස්ද ඔහුගේ ඇමෙරිකානු පුරවැසිභාවය ඉවත්කළා යැයි මාධ්‍යයට බොරු ප‍්‍රකාශ කළද ඊට අදාළ සාක්ෂි ඉදිරිපත් නොකරති’ ගෝඨාභය රාජපක්ෂද සාක්ෂි ඉදිරිපත් කරමින් ඒ ගැන කිසිවක් නොකියයි’ සාමාන්‍යයෙන් පුරවැසිභාවය ඉවත් කිරීමේදී ඒ සම්බන්ධයෙන් නිල සහතිකයක් එම පුරවැසියාට ලබාදෙනු ලැබේ’ සාමාන්‍යයෙන් එම සහතිකය නිකුත් කිරීම සඳහා පුරවැසිභාවය ඉවත් කිරීමේ ඉල්ලීමකින් පසු අවුරුද්දක කාලයක් ගතවෙන බව එම ක්ෂේත‍්‍රයට අදාලව කටයුතු කරන නීතිඥ සමාගම්වල මතය වේ’ ගෝඨාභය රාජපක්ෂ ඔහුගේ පුරවැසිභාවය ඉවත් කරගැනීම සඳහා ඉල්ලීම ලබාදී තවම අවුරුද්දක කාලයක් ගතවී නැත’
ශ‍්‍රී ලංකා පොදුජන පෙරමුණ වටා සන්ධානගතවී සිටින සමහර පක්ෂද අගෝස්තු පළමු සතිය වනවිට ගෝඨාභය රාජපක්ෂ ඔහුගේ ඇමෙරිකානු පුරවැසිභාවය ඉවත්කරගත යුතු බවට තහවුරු කිරීම් සිදුකළ යුතු බවට දැනුම්දීම් කර ඇති අතර මෙතෙක් එම පක්ෂවලටද එවැනි තහවුරු කිරීමක් කර නැත’
එමෙන්ම ආගමන විගමන පාලකවරයාටද සිය ඇමෙරිකානු පුරවැසිභාවය ඉවත් කරගත් බවට ගෝඨාභය රාජපක්ෂ මහතා මේ වනතෙක් දැනුම්දීමක් කර නැත’ ඔහුගේ ද්විත්ව පුරවැසිභාවය ඉවත් කරනු ලබන්නේ සාක්ෂි සහිතව සිදුකරන එම දැනුම්දීමෙන් පසුය’x
