No menu items!
21.8 C
Sri Lanka
28 March,2024

ඇමෙරිකාව අත්හරින්න ගෝඨාට උපදෙස්

Must read

ගෝඨාභය රාජපක්ෂට ජනාධිපතිවරණයට ඉදිරිපත්වීම සඳහා දැනට තිබෙන බාධකය වන ඇමෙරිකානු පුරවැසිභාවය පිළිබඳ ප්‍රශ්නය ඉක්මනින් නිරාකරණය කරගන්නා ලෙස මහින්ද රාජපක්ෂ, බැසිල් රාජපක්ෂ හා චමල් රාජපක්ෂ ගෝඨාභය රාජපක්ෂට දැනුම් දී ඇතැයි ඒකාබද්ධ විපක්ෂයේ ප්‍රබලයෝ කිහිපදෙනෙක් පැවසූහ.

ජනාධිපතිවරණයට වැඩි කාලවේලාවක් නොමැති නිසා ඉක්මනින් පුරවැසිභාවයේ ගැටලුව නිරාකරණය කරගන්නා ලෙසත්, එය නිරාකරණය කර නොගෙන අපේක්ෂකත්වය බලාපොරොත්තු නොවෙන ලෙසත් එහිදී ගෝඨාභය රාජපක්ෂට දැනුම් දී ඇතැයි ඔවුහු පවසති.

ඊට අමතරව ගෝඨාභය රාජපක්ෂට දෙමළ හා මුස්ලිම් ජනකොටස්වල අකැමැත්තක් ඇති බවත්, එම ජන කණ්ඩායම්වල කැමැත්ත දිනාගැනීමට කටයුතු කරන ලෙසත් එම සාකච්ඡාවේදී ගෝඨාභයට උපදෙස් දී ඇත. ජනාධිපති මෛත්‍රීපාල සිරිසේනද ජනාධිපතිවරණ අපේක්ෂකත්වය බලාපොරොත්තු වෙන නිසා ඔහුගේ කැමැත්තද ලබාගන්නා ලෙස ගෝඨාභය රාජපක්ෂට උපදෙස් ලබා දී තිබේ. අනිද්දා සමඟ අදහස් දැක්වූ ඒකාබද්ධ විපක්ෂයේ ප්‍රබලයන් පවසන්නේ ගෝඨාභය හා මෛත්‍රීපාල සිරිසේන අතර හිතවත්කමක් පවතින නිසා එසේ උපදෙස් දී තිබෙන බවයි.

මෛත්‍රීපාල සිරිසේනගේ සහයෝගය හා මෛත්‍රී පිළ සමඟ සන්ධානයක් ඇති කරගැනීමට උත්සාහ ගත යුතු බවත්, එය කඩාකප්පල් කර නොගැනීමට හැකි තරම් උත්සාහ ගත යුතු බවත් එම සාකච්ඡාවේදී රාජපක්ෂ පවුලේ සාමාජිකයන් එකඟ වී තිබේ. එහිදී සන්ධානය කඩාකප්පල් වෙන අයුරින් කටයුතු නොකරන ලෙස ගෝඨාභය රාජපක්ෂට මහින්ද රාජපක්ෂ උපදෙස් දී තිබේ.

මාර්තු 14 රාත්‍රියේ කොළඹ විජේරාම පාරේ මහින්ද රාජපක්ෂගේ නිල නිවසේදී පැවති මෙම සාකච්ඡාවට විපක්ෂ නායක මහින්ද රාජපක්ෂ, ගෝඨාභය රාජපක්ෂ, චමල් රාජපක්ෂ, බැසිල් රාජපක්ෂ, නාමල් රාජපක්ෂ, ශෂීන්ද්‍ර රාජපක්ෂ ඇතුළු රාජපක්ෂ පවුලේ සාමාජිකයන් පිරිසක් සහභාගි වී තිබේ. 

මෙම සාකච්ඡාව පිළිබඳව කළ විමසීමකදී බැසිල් රාජපක්ෂ මහතා ප්‍රකාශ කළේ එම සාකච්ඡාව නිල දේශපාලන සාකච්ඡාවක් නොවන බවත්, පවුලේ අභ්‍යන්තර සාකච්ඡාවක් බවත්ය. ගෝඨාභය රාජපක්ෂ පක්ෂයේ අපේක්ෂකයා ලෙස ඉදිරිපත් කිරීම ගැන අවසාන තීන්දුවක් නොගත් නමුත්, රාජපක්ෂ පවුලෙන් අපේක්ෂකයෙකු ඉදිරිපත් කරන්නේ නම් ගෝඨාභය ඉදිරිපත් කිරීම සුදුසු බවට එකඟ වූ බවත් ඔහු කීය. ගෝඨාභයගේ ඇමෙරිකානු පුරවැසිභාවය පිළිබඳ විමසීමේදී බැසිල් රාජපක්ෂ මහතා ප්‍රකාශ කළේ එම ගැටලුව ඇතුළුව ගෝඨාභය රාජපක්ෂ ජනාධිපතිවරණ අපේක්ෂකයා ලෙස ඉදිරිපත් කිරීමේ වාසි හා අවාසි යන දෙපාර්ශ්වයම පිළිබඳව එම සාකච්ඡාවේදී කතාබහට ලක් කළ බවයි. ගෝඨාභයගේ පැත්තෙන් ජනාධිපතිවරණයට ඉදිරිපත් වීමට අවශ්‍ය පසුබිම සම්පූර්ණ කරගැනීමෙන් පසුව, විපක්ෂයේ දේශපාලන පක්ෂවල අනුමැතිය ඔහුට ලබාගැනීමට අවශ්‍ය පසුබිම සකසන බව එම සාකච්ඡාවේදී මහින්ද රාජපක්ෂ මහතා ප්‍රකාශ කළේයැයි බැසිල් රාජපක්ෂ මහතා කීය. ගෝඨාභය රාජපක්ෂ ජනාධිපතිවරණයට ඉදිරිපත් වෙන්නේ පොදුජන පෙරමුණේ අපේක්ෂකයා ලෙස බවද බැසිල් රාජපක්ෂ මහතා වැඩිදුරටත් කීය. ■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි