ජනාධිපතිවරයා සහ අගමැතිවරයා ප්‍රමුඛ එක්සත් ජාතික පක්ෂය අතර ප්‍රසිද්ධ මත ගැටුම් නවතා ඉදිරි කාලසීමාමේදී එකට කටයුතු කිරීම සඳහා එම දෙපාර්ශ්වය අතර එකඟතාවක් ඇතිවූ බව එජාපයේ ප්‍රබල ඇමතිවරයෙක් අනිද්දා සමඟ කීය.

අප්‍රේල්  30 වැනිදා ජනාධිපතිවරයාගේ නිල නිවසේදී එක්සත් ජාතික පක්ෂයේ නායකයන් හා ජනාධිපතිවරයා අතර පැවති සාකච්ඡාවකදී මේ පිළිබඳව එකඟ වී ඇත. ඒ අනුව ආරක්ෂක මණ්ඩලයේ රැස්වීම්වලටද අගමැතිවරයා හා එජාප ඇමතිවරුන් කැඳවීමට ජනාධිපතිවරයා එකඟ වී ඇත. කැබිනට් මණ්ඩලය ඇතුළු අභ්‍යන්තර රැස්වීම්වලදී මතභේද තිබේ නම් ඒවා ගැන සාකච්ඡා කළ යුතු බව දෙපාර්ශ්වය එකඟ වී තිබේ.

අනිද්දා සමඟ අදහස් දැක්වූ එජාප ඇමතිවරයා කීවේ ජනාධිපතිවරයාගේ පාර්ශ්වයෙන්ම ධනාත්මක යෝජනා ඉදිරිපත් වූ නමුත් මෙම සටන් විරාමය කෙතරම් කාලයක් පවතිනු ඇතිදැයි විශ්වාසයක් නොමැති බවය. ජනාධිපතිවරයාම මෙම එකඟතාව

කඩ කරනු ඇතිදැයි සැකයක් තිබෙන නමුත් ජනාධිපතිවරයා සමඟ සහයෝගයෙන් කටයුතු කිරීමට බලාපොරොත්තු වෙන බව ඔහු කීය. මෙම එකඟතාවේ  දිගුවක් ලෙස පොලිස්පති පූජිත් ජයසුන්දර ඉවත් කිරීම සඳහා ආණ්ඩු පක්ෂයෙන් පාර්ලිමේන්තුවට යෝජනාවක් ඉදිරිපත් වීමේ ඉඩක් තිබෙන බවද වැඩිදුරටත් ඔහු කීය. පොලිස්පතිවරයා කෙබඳු පියවරක් ගනීදැයි නොදන්නා නිසාත්, ජනාධිපතිවරයා පත්කළ විශේෂ කොමිසමේ කටයුතු අවසන්ව නැති නිසාත් තවමත් ඒ ගැන නිශ්චිතව කිව නොහැකි බවද ඔහු වැඩිදුරටත් කීය.

අනිද්දා කළ විමසීමකදී ශ්‍රීලනිප මහලේකම් දයාසිරි ජයසේකර ප්‍රකාශ කළේ පොලිස්පතිවරයා ඉවත් කිරීමේ යෝජනාවක් ආණ්ඩු පක්ෂයෙන් ඉදිරිපත් කරනු ඇතැයි බලාපොරොත්තු වෙන බවත්, එසේ වුවහොත් ශ්‍රීලනිප මන්ත්‍රීවරුන් එම යෝජනාවට සහාය දක්වන බවත්ය. ■