• අල්ලස් කොමිසමේ ලේකම්වරිය අප සමග කියූ පරිදි, රෝහිත අබේගුණවර්ධනට එරෙහි නඩුව ගැන ‘අලුත් කොමිසම’ අධ්‍යයනය කරනු ඇත. ඉන් පසු නැවත නඩු පවරනවාද නැද්ද යන්න ගැන තීරණය කරනු ඇත.

අල්ලස් කොමිසම විසින් අධිකරණය ඉදිරියේ පවරා ඇති නඩු 45ක් ඉල්ලා අස්කර ගැනීමට යන බව පසුගියදා දිවයින පුවත්පත වාර්තා කළේය. එහෙත්, පුදුමයකට මෙන්, ඒ ප්‍රකාශය කරනු ලැබ තිබුණේ අල්ලස් කොමිසම විසින් පවරන ලද නඩුවක විත්තිකාරයන් වෙනුවෙන් පෙනීසිටි නීතිඥවරයකු විසින්, කොළඹ ප්‍රධාන මහේස්ත්‍රාත් අධිකරණයේදීය.
ජනාධිපති නීතිඥ ශවේන්ද්‍ර ප්‍රනාන්දු එහිදී පෙනීසිටියේ ලක්සල හිටපු සභාපතිවරයෙකු වන අනිල් කොස්වත්ත, උපාලි ධර්මසිරි, ලක්ෂ්මි මිනෝලි එදිරිවීර පෙරේරා හා රෝහිනි මල්කාන්ති පෙරේා යන විත්තිකරුවන් සිවුදෙනා වෙනුවෙනි. නියමිත ප්‍රසම්පාදන ක්‍රියාවලිය අනුගමනය නොකොට ලක්සල ආයතනයට අවශ්‍ය ගොඩනැගිලි ඉදිකිරීම සඳහා පෞද්ගලික අංශයට පැවරීමෙන් අල්ලස් පනත යටතේ ගැනෙන වැරදි සිදුකර ඇතැයි චෝදනා කරමින් අල්ලස් කොමිසම මෙම නඩුව පවරා තිබුණි.
අල්ලස් හෝ දූෂණ විමර්ශන කොමිෂන් සභාවේ සභාපති ප‍්‍රමුඛ කොමසාරිස්වරුන් තිදෙනාගේම අනුමැතිය නොමැතිව කොමිෂන් සභාවේ අධ්‍යක්‍‍ෂ ජනරාල් පවරා ඇති නඩු 45ක පමණ චෝදනා පත‍්‍ර ඉල්ලා අස්කර ගෙන නඩු කටයුතු අවසන් කිරීමට එම කොමිෂන් සභාවේ නව සභාපතිනිය ඇතුළු නව කොමසාරිස්වරුන් ප‍්‍රතිපත්තිමය තීරණයක් ගෙන ඇතැයි ජනාධිපති නීතිඥ ශවේන්ද්‍ර ප‍්‍රනාන්දු මහතා එහිදි අධිකරණයට පෙන්වා දුන් බවද, දිවයින ප්‍රවෘත්තියේ සඳහන් වෙයි.
කොමසාරිස්වරුන් තිදෙනාගේම ලිඛිත අනුමැතිය නොමැතිව නඩු පැවරීම නීති විරෝධී බවට ශ්‍රේෂ්ඨාධිකරණය විසින්, ‘අල්ලස් කොමිෂන් සභාව එදිරිව අනෝමා පොල්වත්ත’ නඩුවේ තීන්දුව මගින් ප‍්‍රකාශයට පත්කර ඇති බැවින් එකී නඩු තීන්දුව අනුගමනය කිරීමට අල්ලස් කොමිෂන් සභාව තීරණය කර ඇතැයිද ජනාධිපති නීතිඥවරයා එහිදී අධිකරණයට පෙන්වා දුන්නේය.
(අල්ලස් කොමිෂන් සභාව එදිරිව අනෝමා පොල්වත්ත නඩුවේදී බීපී අලුවිහාරේ, නලින් පෙරේරා හා විජිත් මලල්ගොඩ විනිසුරුවරුන් තීරණය කළේ, අල්ලස් කොමිසම් කොමසාරිස්වරුන් තිදෙනාගේ අනුමැතිය නැතිව, මහේස්ත්‍රාත් අධිකරණය ඉිදිරරියේ නඩු කටයුත්තක් ආරම්භ කිරීමට කොමසාරිස්වරුන් හැර අන් කිසිවකුට, ඒ කියන්නේ අධ්‍යක්‍ෂ ජෙනරාල්වරයාට පවා, නොහැකි බවය.)
කෙසේ වෙතත්, කොමිසම මේ නඩු 45 ඉල්ලා අස්කර ගන්නා බව අධිකරණයට පවසා ඇත්තේ විත්තියේ නීතිඥවරයෙකි. ඔහු කියන්නේ කොමිසමේ නව සභාපතිනිය ඇතුළු සාමාජිකයන් ඒ ගැන තීරණය කර ඇති බවයි. එහෙත්, තමන් එවන් තීරණයක් පිළිබඳ දැනුවත් නොමැති බව අල්ලස් කොමිෂන් සභාව වෙනුවෙන් පෙනී සිටි සහකාර අධ්‍යක්‍ෂ ජනරාල්වරිය අධිකරණයට කියා තිබේ. කෙසේ වෙතත් විත්ති පාර්ශ්වය මූලික විරෝධතාවක් ඉදිරිපත් කරන්නේ නම්, ඒ ගැන කොමිසමට වාර්තා කර පිළිතුරු ලබාදිය හැකි බවටද ඇය අධිකරණය ඉදිරියේ පවසා තිබේ.
මේ සිදුවන්නේ කුමක්ද? අල්ලස් කොමිසම තිබෙන්නේ අල්ලස් හෝ දූෂණ චෝදනා ගැන විමර්ශන කර වගකිවයුත්තන්ට එරෙහිව නඩු පැවරීමටය. එවැනි පවරන ලද නඩුවක විත්තියේ නීතිඥවරයා, නඩු 45ක් ඉල්ලා අස්කර ගැනීමට කොමිසම එකඟවී ඇතැයි ප්‍රකාශ කර තිබේ. පැමිණිල්ල වෙනුවෙන් ආ කොමිසමේ නීතිඥවරිය කියන්නේ ඒ ගැන තමන් නොදන්නා බවය. මේ නඩුවේ චෝදනාව, රජයේ ප්‍රසම්පාදන ක්‍රියාවලිය අනුගමනය නොකිරීමය. එදා ලක්සල සභාපති වූ පළවැනි විත්තිකරු දැන් ලිට්‍රෝ ගෑස් සමාගමේ සභාපතිවරයාය.
මේ ගැන අනිද්දා, අල්ලස් කොමිසමේ ලේකම් දයාරත්න මහත්මියගෙන් විමසූ විට, ඇය කියන්නේ නඩු 45ක් ඉල්ලා අස්කර ගැනීමට කොමිසම තීන්දුවක් ගෙන නැති බවත්, පුවත්පත් වාර්තා කර ඇත්තේ විත්තියේ නීතිඥවරයා කියූ කතාවක් පමණක් බවත්ය. සමහර තාක්‍ෂණික ගැටලු තිබෙන නඩු ඉල්ලා අස්කර ගැනුණත්, නැවත ඒවා නිවැරදිව පවරන බවද ඇය අවධාරණය කළාය.
පසුගිය මාර්තු 19වැනිදා අල්ලස් කොමිසම විසින් පැමිණිල්ල ඉල්ලා අස්කර ගැනීම හේතුවෙන් කොළඹ මහාධිකරණ විනිසුරු ආදිත්‍ය පටබැඳි විසින් නිදහස් කරන ලද අමාත්‍ය රෝහිත අබේගුණවර්ධන පිළිබඳ නඩුවද නැවත පවරන්නේදැයි විමසූ විට ඇය කීවේ, ‘කොමිසම ඒ ගැන අධ්‍යයනය කර බලා තීරණයක් ගනු ඇති බව’යි.
රෝහිත අබේගුණවර්ධන මහතාට එරෙහිව තිබුණේ අයථා ලෙස වත්කම් උපයාගැනීම පිළිබඳ නඩුවකි. 2004 මාර්තු 31 හා 2006 මැයි 31 අතර කාලය තුළ රුපියල් මිලියන 41.1ක් හෙවත් කෝටි 4කට ආසන්න වත්කම් උපයාගත් ආකාරය ගැන පැහැදිලි කිරීමට නොහැකි වූ නිසාත්, ඔහුගේ සාමාන්‍ය ඉපැයීම්වලින් එවැනි වත්කම් උපයාගැනීමට නොහැකි බව පෙනෙන නිසාත්, ඇමති අබේගුණවර්ධනට එරෙහිව අල්ලස් කොමිසම මේ නඩුව පවරා තිබුණි. සැක කටයුතු මුදල් ගනුදෙනු 66ක ප්‍රමාණයක් ඔහුගේ බැංකු ගිනුම්වලට අදාළව සිදුව ඇති බවද, ඔහු උපයාගත් වත්කම් අතර නිවෙසක්, ජීප් රථයක් ආදිය තිබෙන බවද අධිචෝදනා පත්‍රයේ සඳහන් ව තිබිණ.
නඩුව විභාගයට ගත් විට විත්තිකරු වෙනුවෙන් පෙනීසිටි ජනාධිපති නීතිඥ කාලිංග ඉන්දතිස්ස, මූලික විරෝධයක් මතු කරමින් පෙන්වා දුන්නේ, අධිචෝදනා පත්‍රයට කොමසාරිස්වරුන්ගේ අනුමැතිය ලැබී නැති නිසා නඩුව පවත්වාගෙන යා නොහැකි බවය. අල්ලස් කොමිසම වෙනුවෙන් පෙනීසිටි නීතිඥවරිය ඒ අනුව නඩුව ඉදිරියට ගෙන යෑමේ අදහසක් නැති බව ප්‍රකාශ කළ අතර, විනිසුරු විසින් විත්තිකරු මුදාහරින ලදි. නිදොස් කොට නොවේ.
අල්ලස් කොමිසමේ ලේකම්වරිය අප සමග කියූ පරිදි, රෝහිත අබේගුණවර්ධනට එරෙහි නඩුව ගැන ‘අලුත් කොමිසම’ අධ්‍යයනය කරනු ඇත. ඉන් පසු නැවත නඩු පවරනවාද නැද්ද යන්න ගැන තීරණය කරනු ඇත. තාක්‍ෂණික කාරණා ගැන ප්‍රශ්න තිබෙන නඩු ඉල්ලා අස්කර ගෙන ඒවා සකසා නැවත පවරන බව ලේකම්වරිය කියන නමුත් අබේගුණවර්ධනට එරෙහි නඩුව එලෙස පවරන්නේදැයි නිශ්චිතවම කීවේ නැත. ශවීන්ද්‍ර ප්‍රනාන්දු ජනාධිපති නීතිඥවරයා කියන්නේ, කොමිසමේ නව කොමසාරිස්වරුන් තිදෙනා නඩු ඉල්ලා අස්කර ගැනීමට තීරණය කර ඇති බවය.
රෝහිත අබේගුණවර්ධන මහතාට එරෙහි වත්කම් අයථා ලෙස උපයාගැනීම පිළිබඳ නඩුව ඉල්ලා අස්කර ගැනුණේ නඩුවේ චෝදනාවලට අදාළ කරුණු හෝ සාක්‍ෂි ගැන ඇති අවුලක් නිසා නොවේ. අනෝමා පොල්වත්ත නඩුවේ තීන්දුව ප්‍රකාරව, කොමසාරිස්වරුන්ගේ අනුමැතිය ලබාගෙන නැතිව, අධ්‍යක්‍ෂ ජෙනරාල්වරයා නඩුව පවරා ඇති නිසාය. අබේගුණවර්ධන මහතාගේ වත්කම් මොනවාද, ඒවා උපයා ගැනීමට ඔහු ලබන සාමාන්‍ය ආදායමෙන් හැකිද යන සරල ප්‍රශ්න දෙක මේ නඩුවේ මූලික කාරණා වෙයි. ඒවා පිළිබඳ විමර්ශනය කොමිසමේ දක්‍ෂ විමර්ශන නිලධාරීන්ට මහා බැරෑරුම් දෙයක් නොවේ. එහෙත්, විමර්ශනය කාලයේ, අබේගුණවර්ධන මහතා අල්ලස් කොමිසමට සහාය වීම අවස්ථා කිහිපයකදීම පැහැර හැරීම නිසා, දීර්ඝ කාලයක් විමර්ශන කටයුතු ප්‍රමාද විය. ඒ නිසා නඩුව පැවරුණේ යහපාලන ආණ්ඩුව කාලයේය.
මේ තත්වය මත දැන් කළ යුතු වන්නේ, නඩුවේ තාක්‍ෂණික කාරණා පිළිබඳ අවුල (එනම් කොමසාරිස්වරුන් තිදෙනාගේ අනුමැතිය ඇතිව) ලිහාගෙන නඩුව නැවත පැවරීමය.
වැදගත්ම ප්‍රශ්නය පැනනගින්නේ එතැන දීය. අල්ලස් කොමිසම දැන් ‘අලුත්’ය. රාජපක්‍ෂ ආණ්ඩුව බලයට ආ පසු එහි නව සභාපතිවරිය හැටියට පත්කරන ලද්දේ හිටපු ශ්‍රේෂ්ඨාධිකරණ විනිසුරු ඊවා වනසුන්දර මහත්මියයි. ‘මහින්ද මගේ නීති විද්‍යාලයේ යාළුවා. මම වැඩ ඇරිලා ගෙදර යන ගමන් අරලිය ගහ මන්දිරයට එන්නට කියා එහි ගිය විට ශ්‍රේෂ්ඨාධිකරණ විනිසුරුකමක් දෙන්න ගන්නවාදැයි ඇසූ’ බව ‘දේශය’ පුවත්පතට කියා තිබුණේ ඇයයි. යහපාලන ආණ්ඩුව කාලයේ, ගෝඨාභය රාජපක්‍ෂ මහතාට එරෙහිව, මැදමුලන රාජාපක්‍ෂ කෞතුකාගාරයට රජයේ මුදල් යෙදවීම පිළිබඳ විමර්ශනය අතරතුර අත්අඩංගුවට ගනීවියැයි සැකය ඇතිවූ විට ඔහු ශ්‍රේෂ්ඨාධිකරණය ඉදිරියේ මූලික අයිතිවාසිකම් නඩුවක් පවරා, තමන් අත්අඩංගුවට ගැනීමෙන් වළක්වන නියෝගයක් ඉල්ලා සිටියේය. එය නිර්ලෝභීව ලබාදුන් විනිසුරුවරුන් අතරින් එක්කෙනකු වන්නේ ඇයයි. රාජපක්‍ෂ මහතා ජනාධිපතිධුරයට පත්වූ පසු, ප්‍රංශයේ තානාපති හැටියට ඇය පත්කරන ලද නමුත් කුමන හෝ හේතුවක් නිසා ඇය ඒ තනතුර බාර නොගත්තාය. පසුව අල්ලස් කොමිසමේ සභාපතිනිය හැටියට ඇය පත්කරන ලදි. විශ්‍රාමලත් ශ්‍රේෂ්ඨාධිකරණ විනිසුරු දීපාලි විජේසුන්දර කොමිසමේ අනෙක් සාමාජිකාවය. ඉතිරි සාමාජිකයා නිමල් චන්ද්‍රා වාකිස්ටය. ඔහු මහින්ද රාජපක්‍ෂ ආණ්ඩුව කාලයේ රාජ්‍ය බුද්ධි අංශයේ ප්‍රධානියා වූ හිටපු නියෝජ්‍ය පොලිස්පතිවරයෙකි.
මේ තිදෙනාගෙන්, අල්ලස් කොමිසමේ වගකීම් ඉටු නොවෙතැයි ඉන් අදහස් වන්නේ නැත. එහෙත්, ඒ බව පෙනෙන්නට තිබිය යුතුය.
ඒ සඳහා ඉතාම වැදගත් ලිට්මස් පරීක්‍ෂාවක් වන්නේ ඇමති රෝහිත අබේගුණවර්ධනට එරෙහි නඩුව නැවත පවරන්නේද යන්නයි. අල්ලස් කොමිෂන් සභාව මේ දිනවල ශීඝ්‍රයෙන් ඉල්ලා අස්කර ගනිමින් යන නඩු කන්ද අතරින් වැඩි ප්‍රමාණයක්, 2015ට පෙර තිබුණු මහින්ද රාජපක්‍ෂ ආණ්ඩුවේ ඉහළ-පහළ නිලධාරීන් හා දේශපාලනඥයන් සම්බන්ධ අල්ලස් හෝ දූෂණ නඩුය. එම නඩු ‘අධ්‍යයනය’ කර, නැවත නොපවරා සිටීමට කොමිෂන් සභාවට හොඳින්ම හැකියාව තිබේ. නැතිනම්, ඒවා යහපාලන ආණ්ඩුව විසින් දේශපාලන වශයෙන් පළිගැනීමට පවරන ලද නඩු හැටියට ලේබල් අලවා ඉවත විසිකර දැමීමටද හොඳටම ඉඩ තිබේ.
එය එසේ නොවන බව පෙන්විය යුත්තේ කොමිසමේ කොමසාරිස්වරුන් තිදෙනාය. ■